Nkonko ya babadi

Nzambi uvua ne kansungansunga mu disungula bua kasumbu kaludiki ka kumpala bantu bavua bena tshisa tshimue ne ditunga dimue​—bualu buonso bavua bena Yuda anyi?

Tòo, kavua naku to. Buonso bavua Yezu mubikile bua musangu wa kumpala bu balongi bende bavua bena Yuda. Pashishe, dia Pantekoste wa 33 B.B., bena Yuda ne balamatshi ku buena Yuda ke bavua ba kumpala bua kuedibua manyi a spiritu munsantu ne nunku kukumbaja malu malomba bua kukokesha ne Kristo mu diulu. Anu pashishe ke kuakasakidibua bena Samariya ne bena kuitabuja bapiabapia bampangano bakena batengula. Nunku, bidi biumvuika se: kasumbu kaludiki mu tshikondo atshi kavua kenza ne bena Yuda, “bapostolo ne bakulu mu Yeruzaleme,” bu mudibi bifunda mu Bienzedi 15:2, NW. Balume aba bavua ne nshindamenu mualabale wa dimanya dia Mifundu ne bidimu bia dimonamona malu mu ntendelelu mulelela, ne bavua bapitshishe tshikondo tshile bua kulua bakulu bena nkristo bapie.​—Fuanyikija ne Lomo 3:1, 2.

Tshikondo tshiakenzeka tshisangilu tshia kasumbu kaludiki tshilonda mu Bienzedi nshapita wa 15, bantu ba bisamba bavule bakavua balue bena nkristo. Munkatshi muabo muvua bena Afrike, bena Mputu, ne bantu ba ku miaba mikuabo. Kadi, ki mbafunde ne: bantu ba bisamba ba mushindu’eu bakasakidibua ku kasumbu kaludiki bua kuvuija buena-nkristo tshintu tshidi tshilengelela bakena bena Yuda. Nansha muvua bena kuitabuja bapiabapia bena bisamba aba bikale bena mulongo umue mu “Izalele wa Nzambi,” bavua ne bua kunemeka bupiluke ne dimanya kuenza dinene bia bena nkristo bena Yuda, bu mudi bapostolo bakadianjila kuenza kasumbu kaludiki. (Galatia 6:16) Tangila mu Bienzedi 1:21, 22 muvua dimanya kuenza dia mushindu’eu diangatshibua ne mushinga.​—Ebelu 2:3; 2 Petelo 1:18; 1 Yone 1:1-3.

Munkatshi mua siekele mivule Nzambi uvua ne malanda a pa buawu ne ditunga dia Izalele, muvua Yezu musungule bapostolo bende. Kabivua tshilema peshi kansungansunga bua se: bapostolo kabakapatukila ku tshidi mpindieu Amerike wa ku Sud anyi Afrike peshi Extrême-Orient. Kunyima balume ne bakaji ba ku miaba ayi bakababidila tshikondo tshia kupeta masanka a mudimu mapite ne kule kuikala mupostolo pa buloba, kuikala muena mu kasumbu kaludiki ka mu siekele wa kumpala, peshi kuikala ne mudimu mukuabo kayi wonso munkatshi mua tshisamba tshia Nzambi lelu’eu.​—Galatia 3:27-29.

Mupostolo umue wakasakibua bua kuamba ne: “Nzambi kêna ne kansungansunga, kadi mu ditunga dionso muntu udi umutshina ne wenza buakane udi wanyishibua kudiye.” (Bienzedi 10:34, 35, NW) Eyowa, masanka a ku tshia-bupikudi tshia Yezu mmatekela buonso kumpala, kakuyi kansungansunga. Ne bantu ba tshisa tshionso ne muakulu wonso ne ditunga dionso nebasakidibue mu Bukalenge bua mu diulu ne mu musumba munene wikala ne muoyo kashidi pa buloba.

Bantu bavule badi balua ne kansungansunga bua bisa, miakulu, peshi matunga. Ebi mbilejibue kudi tshitudi tubala mu Bienzedi 6:1 pa bidi bitangila bualu buakajudija midiabakenu pankatshi pa bena nkristo ba tshiena-Greke ne ba tshiena-Ebelu. Pamu’apa tudi bakolesha ne mmuenenu wa kansungansunga kakole peshi tudi bakasungule pa bidi bitangila miakulu, bisa, bisamba, peshi bulume ne bukaji. Pa kutangila nsombelu eu, mbimpe bua tuenze madikolela ne disuminyina bua se: nyanji yetu ne ngandamuinu bifumbibue kudi mmuenenu wa Nzambi, udi wa se: bantu buonso mbena mulongo umue kumpala kuende, nansha tshilunji tshiabo tshikale tshia mushindu kayi. Pakafundisha Nzambi ngikadilu bua bakulu ne basadidi ba mudimu, kakatela tshisa peshi ditunga nansha. Tòo, wakashindamena pa ngikadilu ya mu nyuma ya aba bavua mua kudiakaja bua kusadila. Abi bidi lelu’eu bilelela bua bakulu, batangidi bena ngendu, ne bena mudimu ba biro bia filiale, anu bu muvuabi bilelela bua kasumbu kaludiki mu siekele wa kumpala.