‘Oh, bu muntu yonso mua kuikala amu bu buobu!’

Aa avua mêyi a mufundi kampanda mu tshibejibeji tshia Letzebuerger Journal tshia mu Luxembourg. Uvua wakula bua banganyi?

Uvua muya ku Pologne bua kubuela mu disekelela dia mufikilu wa 50 wa dilekedibua dia Auschwitz ne wakamona se: tshisumbu tshimue tshivua tshikenga bikole muaba eu katshivua tshitedibua nansha kakese. Mu milongo yende ya mifundu ya mu dia 2 Luishi 1995, wakasunguluja tshisumbu etshi bu Bantemu ba Yehowa ne kufunda ne: “Nansha dibela ne tshikisu mu lukanu anyi mu kamponya ka disubishibua, nansha dibakanyina bua kubashipa mu dikenga ne nzala anyi kukoshibua ne kasuyi kabivua mua kubenzeja bua buobu kuimansha ditabuja diabu.” Wakatungunuka se: “Nansha balami ba-SS bena tshikisu bavua banyina dikima divua Bantemu ba Yehowa bikala nadi too ne ku lufu.”

Bantemu ba Yehowa kabavua bakeba lufu. Kadi, amu bu bena nkristo ba mu siekele wa kumpala, ba kudibu binunu ne binunu bakasungula lufu pamutu pa kutupa ku mêyi-maludiki a buena nkristo. Ditabuja dia mushindu’eu diakabasunguluja bu bashilangane ne bakuabu mu mushindu wa pa buawu mu bikondo ebi bibi bia Reich Muisatu.

Mufundi eu wakakoma ne: “Oh, bu bantu buonso mua kuikala amu bu Bantemu ba Yehowa!” Bu buobu nanku, mvita mibidi ya buloba bujima kayivua mua kuenzeka nansha kakese.