Bamanyishi ba Bukalenge badi balonda

Bena nkristo balelela nebakengeshibue

KUMBUKILA ku matuku a Abele, basadidi bavule ba Yehowa mbakamangane ne dikengeshibua bua malu a Nzambi. (Luka 11:49-51) Ne kabiena bikemesha, bualu Bible udi udimuija ne: “aba buonso badi basue kuikala ne budiambiki kudi Nzambi pamue ne Kristo Yezu nebakengeshibue pabu”! (2 Timote 3:12, NW) Ke bua tshinyi, mu matunga mapite pa 25 lelu’eu, Bantemu ba Yehowa mbakandikibue mudimu wabu ne badi bakamangana ne dikengeshibua.

Mu ditunga kampanda mudi Bantemu ba Yehowa kabayi amu bakandikibue mudimu wabu kadi mudibu kabidi bakengeshibua kudi bena bitendelelu, bamanyishi ba lumu luimpe bapite pa 12 000 badi batungunuka ne kutumika ne mitalu, pa kulonga Bible ne bantu bapite pa 15 000. Bushuwa, mudimu wabu wa buambi udi wenjibua ne budimu. Pa tshibidilu, batu benzela bisangilu biabu bia bena nkristo mu nzubu ya bantu, ne badi ne bua kutalama padibu babikila bantu badi baleja dijinga dia kumanya bivule mu bisangilu bia mushindu’eu.

Mu matuku adi panshi aa, mbulamatadi mmulue kuangata mmuenenu mujoboke bua Bantemu, badi mpindieu batamba kuenza mudimu wabu kakuyi dibuelakana dia tshikisu. Kadi, tusumbu kabukabu tua malu a ntendelelu ntutumike ne buenzeji buatu bua kujula ndululu.

Mu tshimenga kampanda musumba wa bantu 200 bena ditabuja dinekesha mu malu a ntendelelu bafike munda bakaya batangile ku nzubu kampanda kuvua Bantemu ba Yehowa bu 50 benza tshisangilu tshia tshisumbu. Bamue mu musumba eu bavua bambule mabue ne bela mbila pa kutela mêyi a diyobolangana nawu a ntendelelu yabu. Bivua bimueneke patoke se: dipangadika diabu divua dia kubunda Bantemu ne kunyanga nzubu. Bivua bimueneke se: bamfumu ba malu a ntendelelu bakavua batentekele mêba a bisangilu bua mutantshi kampanda ne bindile tshikondo tshikumbane bua buobu kubunda. Musumba eu ukavua pa kubuela mu nzubu pakafika bampulushi 15 ne kutumina tshisumbu etshi dîyi bua kutangalakatshi. Biakakemesha Bantemu, bualu kakuvua nansha umue wa kudibu uvua mupete dîba dia kumanyisha bampulushi.

Kadi, baluishi mbakumbaje imue misangu tshipatshila tshiabu. Bantemu bavule mbafikishibue mu ntatu ne kuedibua mu buloko. Tshilumbu kampanda tshiakafikishibua ku kabadi tshiakanenga bidimu ne bidimu, ne bivua bimueneke se: banzuji (baprokirere) kabatshivua batshilonda kabidi. Kadi, ku disongakaja dia bamfumu ba ekleziya ba mu ditunga adi, tshilumbu etshi tshiakafidibua kabidi ku kabadi, ne bakakosela Ntemu tshibawu tshia buloko.

Mu muaba mukuabu, kasumbu kampanda ka Bantemu kavua kasangila mu nzubu wa muntu bua kuvuluka Didia dia Dilolo dia Mukalenge. Ku shòò dilolo adi bampulushi ba bungi bakakuata mulume muena nzubu ne mukulu uvua mulombole tshisangilu. Ku biro bia bampulushi, bakabakuma bikole. Diedibua nkonko ne dikumibua diakatungunuka mêba mulongolongo. Ntemu umue wakakama kabidi kasuba pa kutekibua mu tshina tshiûle ne mâyi matalale.

Bua tshinyi bampulushi bavua benza dibunda dia mushindu’eu? Apa kabidi, tshisumbu tshia bena ditabuja dinekesha mu malu a ntendelelu, ne diambuluisha dia bamfumu ba bitendelelu ba mu ditunga, ke bavua basake bampulushi ku dienza nunku. Pashishe shefu wa bampulushi wakasokolola se: bavua bakuata bantu kabiyi ku dîyi diende. Wakalomba luse, ne bantu bavua batutshishangane bakanyokibua.

Pa buloba bujima Bantemu ba Yehowa badi batungunuka ne kumanyisha lumu luimpe lua Bukalenge bua Nzambi, nansha kuikale buluishi bua tshikisu. Badi balonda mubelu wa Yezu wa ne: “Ndi nnutuma bu mikoko munkatshi mua mibuabua. Ikalayi ne budimu bu nyoka, kabidi ne muoyo wa buobumue bu nyunyu ya nkudimba.”​—Matewuse 10:16, MMM.

[Tshimfuanyi mu dibeji 31]

Abele uvua muntu wa kumpala wakakengeshibua