Dilongela ku nyunyu ne bilongo

NTSHINYI tshidi bantu batamba kuditatshishila lelu kupita tshintu tshikuabu tshionso? Bua bavule, nkuikala ne mfranga mikumbane bua kupetesha dîku diabu tshididi dikengela anyi kukumbana bua kulubuluja ngikadilu wa nsombelu wabu.

Dikeba mfranga mikumbane bua kudipetela bintu bia ku mubidi divua kabidi diditatshisha dinene tshikondo tshivua Yezu Kristo pa buloba. Kadi wakadimuija se: diditatshisha edi dikena dibi divua mua kulua kanyinganyinga katambe bunene kafuana kubuitshidija malu a mu nyuma. Bua kufila tshilejilu pa didimuija diende, Yezu wakambila bayidi bende bua kubandila bimpe nyunyu ne bilongo.

Nyunyu idi ne bua kudia dituku dionso​—misangu mivule kutupita bualu biakudia bitu biandamuka lukasa lukasa mu tshifu tshiayi. Kusakidila apu, kayena mua kukuna ntete, kunowa, anyi kulama biakudia bua matuku atshilualua. Pabi, amu bu muakaleja Yezu, “Tatue[t]u wa mu diulu udi uyidisha.” (Matewuse 6:26, MMM) Bia muomumue, Nzambi udi uvuadika mu mushindu muimpe mutambe ‘bilongo [bilengele] bia kapapankole mu mpata.’​—Matewuse 6:28-30, MMM.

Yezu udi utujadikila se: bitualama mmuenenu muakane pa majinga a ku mubidi ne kuteka malu a mu nyuma pa muaba wa kumpala, Nzambi neenze bushuwa bua se: tuikale kabidi ne biakudia ne bivualu bitudi tukengela. Bikala Yehowa Nzambi utabalela nyunyu ne bilongo, bushuwa neatabalele aba badi bamunange ne ‘batungunuka ne kukeba diambedi bukalenge ne buakane Buende.’ (Matayo 6:33, NW) Udi muteke bipatshila bia Bukalenge bua Nzambi pa muaba wa kumpala mu nsombelu webe anyi?