Ntshilele tshia patupu anyi?

SACRAMENTO wa konfesiyo mmuenjibue kudi bena Katolike munkatshi mua siekele mivule. Pabi, bua bavule ntshibidilu tshikena ne tshipatshila. Pa kutuma meji ku bunsonga buende, mulombodi kampanda wa kalasa kabandile muena dîna dia Bob udi wamba ne: “Mvua mupiankunde, ne nansha tshikondo atshi tshivua mene mmuangata ne mushinga to.” Mbua tshinyi? Buende yeye, konfesiyo wakalua tshilele tshia patupu. Udi umvuija ne: “Konfesiyo uvua mufuanangane ne dituala dibuki diebe diuule ne mpekatu dionso kudi muena mudimu wa douane ku tshipalu tshia ndeke. Udi ukuela nkonko pa bidi bitangila mpekatu yebe ne pashishe ukupitshisha kunyima kua kufuta tshitadi tshikese bua bintu bia mushinga mukole biuvua musumba pautshivua ku ditunga dienyi.”

Bia muomumue, Frank Wessling, pa kufunda mu tshikandakanda tshia U.S. Catholic, udi umvuija tshienzedi tshia konfesiyo bu “tshiludiki tshia bupepele bunekesha tshia [kulonda] bitulu bitulu, kumbukila ku dilekeledibua dia mpekatu ya pa tshibidilu ku diambuluisha dia masambila makuata ku muoyo a dinyingalala too ne ku tshienzedi tshilomba kudi mikenji ya ekleziya tshia tshidingishilu tshia didinyoka.” Nkomenu wa Wessling udi tshinyi? “Ndi mutuishibue se: Konfesiyo mmuimpe bua anyima,” ke mudiye wamba. “Kadi mushindu udi bena Katolike bamuenza ndutatu.”

Bible udi uleja konfesiyo mu mushindu mushilangane menemene. Tshidi tshitambe mushinga nkonfesiyo kudi Nzambi. (Musambu wa 32:1-5) Ne muyidi Yakobo wakafunda ne: “Kudi wa munkatshi muenu udi ne bubedi anyi? Abikile bakulu ba mu tshisumbu, bua bamusambidile, pa kumuela manyi mu dîna dia Yehowa. Nunku nutondelangane mpekatu yenu patoke bamue kudi bakuabu ne nusambidilangane bamue bua bakuabu, ke bua nuenu kuondopibua.”​—Yakobo 5:14, 16, NW.

Muena nkristo udi muzengeja kudi mpekatu udi mua kubikila batangidi ba mu tshisumbu, badi mua kufila mibelu ya muntu pa nkayende ne mikuatshishi ya mu Bible bua kuambuluisha muenji wa mibi bua alekele njila wende wa mpekatu. Batangidi badi mua kufila dikankamija diakanyine eku bakontolola dilubuluka dia eu udi ne bubedi bua mu nyuma. Ndishilangana kayipu ne tshilele tshia tshidingishilu tshia konfesiyo tshienza kudi ekleziya ya bungi lelu’eu! Bakoleshibue kudi diambuluisha dia muntu pa nkayende dia bakulu ba mu tshisumbu, benji ba mibi banyingaladi badi mua kupetulula disulakana diakumvua Davidi, anu bu muakumvuijaye mu musambu kampanda: “Mpekatu wanyi, ndi mumutonde kûdi, ne tshilema tshianyi, tshiena mubuikile. Meme kuamba ne: ‘Nentonde mpekatu yanyi kudi Yehowa.’ Ne wewe nkayebe wakamfuila luse bua tshilema tshia mpekatu yanyi.”​—Musambu wa 32:5, NW.