Padi “lupepele nansha lumue kaluyi luimpe”

“PADI muntu kayi mumanye ku dibungu kudiye uya, lupepele nansha lumue kaluena luimpe.” Mêyi aa, malamika muena nkindi wa mu siekele wa kumpala wa bena Roma Lucius Annaeus Seneca, adi ajadika bulelela buanyisha bua musangu mule bua se: Bua muoyo kuikalawu ne njila, bidi bikengela bipatshila.

Kadi, pa tshibidilu, nsombelu [wa bavule] katu ne tshipatshila nansha. Bavule mbashiikile anu ku diepuka mabue ne mvunde bia mu nsombelu wa dituku dionso. Bu mudibu bapange ngimanyinu mushimate, badi balua anu bu mudi mavuala adi “asakibua kumpala kudi lupepele tshikondo kampanda ne apingajibua tshianyima pashishe.” (Yakobo 1:6, “Philips”) Bua bantu ba mushindu’eu, “lupepele nansha lumue kaluena luimpe.”

Bible udi ufila bilejilu bia aba bavua bashindamene pa bipatshila, bua nunku badi bambuluisha bu bitembelu bua bena nkristo lelu’eu. Mozese “uvua muludike mêsu ende ku difutu.” (Ebelu 11:26, NW) Paulo wakafunda ne: “Ndi nyema buludiludi mutangile ku tshipatshila bua kupeta difutu.” Wakakankamija bena kuitabuja nende bua “bikale ne mmuenenu umue umue eu.”​—Filipoi 3:14, 15, “Today’s English Version.”

Ne mêsu etu maludika ku malaya a Bible, tuidikijayi ditabuja dia bantu ba mushindu’eu bavua bashindamene pa bipatshila.​—Fuanyikija ne Ebelu 13:7.