Nkonko ya babadi

Mu Filipoi 2:9 (NW), Paulo wakamba pa bidi bitangila Yezu ne: “Nzambi wakamubandisha pa muanzu mubandile ne kumupesha ku budisuile dîna didi ku mutu kua mêna makuabu wonso.” Dîna dipiadipia edi ndîna kayi? Ne bikala Yezu mupuekele kudi Yehowa, mmunyi mudi dîna dia Yezu ku mutu kua mêna makuabu wonso?

Tudi tubala mu Filipoi 2:8, 9 (NW) ne: “Kupita apu, pavuaye [Yezu] mu tshimfuanyi tshia muntu, wakadipuekesha yeye muine ne kulua muena butumike too ne ku lufu, eyowa, lufu pa mutshi wa tshinyongopelu. Bua kabingila aka menemene, Nzambi wakamubandisha pa muanzu mubandile ne kumupesha ku budisuile dîna didi ku mutu kua mêna makuabu wonso.”

Mvese eyi kayena yumvuija ne: bu mudi amu Yehowa nkayende ne dîna didi ku mutu kua mêna makuabu wonso menemene, Yezu udi ne bua kuikala muntu wa mumue ne Yehowa. Anu bu mudi mvese idi minyungulule Filipoi nshapita 2 ileja, Yezu wakapeta dîna diende ditumbuke edi panyima pa dibiishibua diende ku lufu. Kavua nadi kumpala to. Ku luseke lukuabu, Yehowa utu amu ku mutu kua bionso, ne muanzu wende katshia ki mmushintuluke. Muanda wa se: Yezu wakapeta dîna dibandile kupita divuaye nadi kumpala kua mudimu wende pa buloba udi uleja ne: kêna wa mumue ne Yehowa nansha. Pakamba Paulo ne: Yezu wakapeshibua dîna didi ku mutu kua mêna makuabu wonso, uvua umvuija ne: Yezu udi mpindieu ne dîna ditambe kubandila ku mutu kua bifukibua bionso bia Nzambi.

Dîna dia Yezu dibandile ndîna kayi? Yeshaya 9:6 (NW) udi utuambuluisha bua kuandamuna. Pa kudianjila kumanyisha malu pa dilua dia Masiya, Yezu, mvese au udi wamba ne: “Mbulamatadi neikale pa dikaya diende. Nebamubikile ku dîna dia: Mubedi wa dikema, Nzambi wa bukole, Tatu wa kashidi, Muan’a mfumu mufidi wa ditalala.” Apa “dîna” dia Yezu didi ditangila muanzu wende mubandile ne bukokeshi, ke mushindu utudi kabidi tumvua “dîna didi ku mutu kua mêna makuabu wonso” ditela mu Filipoi 2:9. Binu bionso mbilombibue bua kutuibua panshi mu dianyisha dia muanzu mubandile wa bukokeshi budi Yehowa mumupeshe​—muanzu wa bukokeshi mubandile kupita eu udi mupesha tshifukibua kayi tshionso. Muaku “makuabu” mu nkudimuinu eu kawena muleja buludiludi mu mifundu ya tshiena-Greke ya ku tshifundilu, kadi mmuzangika kudi ngumvuilu wa mvese. “Dîna” dia Yezu kadiena ku mutu kua dîna diende yeye muine kadi didi ku mutu kua mêna a bifukibua bikuabu bionso.

Ndisanka kayipu ditudi nadi pa kudisangisha pamue ne banjelu ne bantu bena lulamatu bua kutua binu panshi mu dianyisha dia dîna dia Yezu! Tudi tuenza nunku pa kukokela Yezu mu muanzu mutumbuke ne wa bukole mumupesha kudi Yehowa​—bua “butumbi bua Nzambi Tatu.”​—Filipoi 2:11; Matayo 28:18.