“Kanudisuiki ku tshikokedi tshimue tshikena tshiakanangane”

NGOMBE ibidi idi mileja pa tshimfuanyi etshi idi ne bukole bua bungi, budi buyipetesha mushindu wa kuambula majitu manême kakuyi lutatu. Kadi anji kufuanyikija biatekabu mpunda pa muaba wa ngombe umue. Bu mudi mpunda mukese ne mutekete kupita ngombe, udi mua kutomboka pamu’apa pa kututa ku mitshi idi mimusuike mu tshikokedi etshi tshikena tshiakanangane. Nunku, ne kabingila kimpe, mukenji wa Nzambi muelela Izalele uvua wamba ne: “Kanusuiki ngombe ne mpunda ku mutshi wa tshikokedi umue.”​—Dutelonome 22:10.

Mupostolo Paulo wakafunda bualu kampanda bua muomumue budi butangila bantu. Wakamba ne: “Kanudisuiki ku tshikokedi tshimue tshikena tshiakanangane ne badi kabayi bena kuitabuja.” (2 Kolinto 6:14, NW) Bualu ebu budi nangananga ne bua kulamibua mu tshieledi tshietu tshia lungenyi patudi tusungula muena dibaka netu. Dibaka ntshisuikidi tshia kashidi, bualu Yezu Kristo wakamba ne: “Muntu katapuludi tshidi Nzambi musange muaba umue.” (Matayo 19:6, NW) Kutu dibungama divule padi bena dibaka kampanda kabayi ne mitabuja, mêyi-maludiki, ne bipatshila bia muomumue. Nunku’eu mbitambe kuikala bia meji bua kulonda mubelu wa mu Bible wa kuselangana “anu mu Muk[a]lenge.” (1 Kolinto 7:39) Dibuela mu dibaka ne muntu kampanda udi kayi ne ditabuja mu malu a Nzambi dia mumue ne diebe didi mua kukebesha lutatu lutambe bunene lupite lua disuika ngombe ne mpunda ku tshikokedi tshimue.

Dishilangana mu ditabuja dia malu a Nzambi didi anu bumue bua ku malu adi mua kufikisha bena dîku kampanda ku dikala basuikakaja ku tshikokedi tshikena tshiakanangane. Badi basue kuselangana​—nansha bena ditabuja dia muomumue—​badi ne bua kudiebeja ne: ‘Tudi ne bipatshila bia muomumue anyi? Netusombele muaba kayi? Nnganyi watabalela mfranga ya dîku? Netuikale buonso ne bua kutumika mu mudimu wa ku mubidi anyi? Netulele bana anyi? Bulenga ne diangatangana ne mushinga nebiludike dîku dietu anyi?’

Mu bualabale kampanda, mushindu unudi nuyukidilangana pa malu a nunku udi mua kuleja bikala tshikokedi tshiakanangane anyi katshiyi tshiakanangane. Bushuwa, kakuena bantu babidi badi bakanangane menemene. Kadi, pa tshibidilu, pikala babangila mua kuakama ne kujikija ntatu yabu pamue ne pikalabu mua kutungunuka ne kuyukidilangana kakuyi tshipumbishi, pamu’apa kabakuikala basuikakaja ku tshikokedi tshikena tshiakanangane.