Bilele bidi mua kubengangana ne bulelela anyi?

MARTIN LUTHER uvua mutuishibue ne: uvua wamba bulelela. Bible, ke muakelaye meji, uvua utua ku tshiende. Ku luseke lukuabu, mumanyi wa ngendu ya mitoto wa bena Pologne Copernic, uvua wela meji ne: ditabuja dia kale divua ditangila dituku divua dia mafi.

Nditabuja kayi adi? Ng’edi dia se: buloba ke buvua pankatshinkatshi pa bukua-mabulunge ne dia se: bionso bivua binyunguluka [buloba]. Bulelela, ke muakamba Copernic, buvua se: buloba buobu buine buvua bunyunguluka dîba. Luther wakabenga kuitaba bualu ebu, pa kuamba ne: “Bantu badi bateya matshi kudi muena lubuku lua mitoto eu utshidi utuadijilapu uvua wenza madikolela bua kuleja ne: buloba budi bunyunguluka, ki mmawulu peshi tshibuashibuashi, anyi dîba ne ngondo.”​—History of Western Philosophy.

MISANGU mivule mitabuja a kale atu abengangana ne malu a bushuwa, ne bulelela. Adi mua kufikisha bantu too ne ku dienza malu mabi.

Bushuwa, ebi kabiena biumvuija ne: misangu yonso bilele bia kale bitu amu bibengangana ne bulelela. Eyowa, mupostolo Paulo wakakankamija bena nkristo ba mu tshikondo tshiende bua kutungunuka ne kulonda bilele bivuaye mubamanyishe ne: ‘Meme ndi nnutumbisha bualu . . . nudi nulamata ku bilele anu bu mumvua munupeshabi.’​—1 Kolinto 11:2; tangila kabidi 2 Tesalonike 2:15; 3:6.

Ntshinyi tshivua Paulo usua kumvuija pa kutela muaku “bilele”? Tshibungu tshia Insight on the Scriptures, Volime 2, dibeji 1118, tshidi tshileja ne: muaku wa tshiena-Greke wakatumikaye nau bua “bilele,” pa·raʹdo·sis, udi umvuija bualu kampanda budi “bumanyishibua mukana anyi pa kufunda.” [Udi kabidi mua] kumvuija “mamanyisha, malongesha a nshindamenu, anyi bienzedi bidi baledi bashiila bana babu anyi bidi bivue mushindu mujadika wa diela meji anyi dienza malu.”a Bu muvua bilele bivua mupostolo Paulo mubapeshe bifumine ku mpokolo muimpe, bivua bimpe bua bena nkristo kubilama.

Nunku, mbimueneke patoke ne: bilele bidi mua kuikala bilelela anyi bia mafi, bimpe anyi bibi. Tshilejilu, muena nkindi muena Grande-Bretagne Bertrand Russell, udi utumbisha bantu bu mudi Copernic wa mu siekele wa 16 eu uvua ne muoyo mululame ne dikima dia kutontolola mitabuja a kale. Bakalubuluja “dianyisha kampanda dia se: tshivuabu bitabuja katshia ku bikondo bia kale tshivua pamu’apa mua kuikala tshia mafi.” Udiku pebe mumone meji mu dibenga kulonda bilele bu mpofu anyi?​—Fuanyikija ne Matayo 15:1-9, 14.

Mpindieu, tuambe tshinyi pa bidi bitangila mitabuja ne bilele bia malu a Nzambi? Tudi mua kubiangata amu ne: mbiakane ne kabiyi bubi anyi? Mmunyi mutudi mua kumanya? Ntshinyi tshituikala ne bua kuenza bituasangana se: bilele bia malu a Nzambi mbibengangane bushuwa ne bulelela? Tshiena-bualu tshidi tshilonda netshikonkonone malu aa.

[Mêyi adi kuinshi]

[Mêyi a dianyisha bua tshimfuanyi mu dibeji 2]

Tshizubu: Jean-Leon Huens © National Geographic Society

[Mêyi a dianyisha bua tshimfuanyi mu dibeji 3]

Universität Leipzig