Udi muvuluke anyi?

Uvuaku muele meji ne ntema yonso ku nimero ya ndekelu ya Tshibumba tshia Nsentedi anyi? Udi mua kusanka bua kuvuluka malu adi alonda aa:

◻ Mmunyi mudi muntu ‘ulua kudi Yezu’ mu diumvuangana ne dibikila diende dia mu Matayo 11:28?

Yezu wakamba ne: “Biasua muntu kundonda, adipidie ne atuale mutshi wende wa tshinyongopelu dituku dionso ne atungunuke ne kundonda.” (Matayo 16:24, NW) Nunku, kulua kudi Yezu kudi kumvuija ne: muntu ùdi wimansha disua diende nkayende bua kusungula dia Nzambi ne dia Kristo, pa kuanyisha bujitu kampanda bua midimu mimomekela, ne pa kutungunuka ne kuenza nunku.​—15/8, dibeji 17.

◻ Bua tshinyi amu “bakese” ke badi bapeta ‘njila mufimpakane udi ufikisha ku muoyo’ uvua Yezu mutele mu Matayo 7:13, 14?

Njila mufimpakane mmuelela mikalu kudi mikenji ne mêyi-maludiki bia Nzambi. Nunku, nealengelele anu muntu udi ne mutshima mujima usua bua nsombelu wende ikale mu diumvuangana ne mêyi-makulu a Nzambi. Nansha mudiye umueneka bu udi welelangana mikalu, ‘njila mufimpakane’ udi upikula muntu mu malu wonso a mushinga. Mikalu yende mmiela kudi “mukenji mupuangane wa budikadidi.” (Yakobo 1:25, NW)​—1/9, dibeji 5.

◻ Mmunyi mudi busunguluji mua kudimibua?

Busunguluji kabuena budiluila kakuyi lutatu anyi ku tshilelelu. Kadi ku diambuluisha dia lutulu, masambila, madikolela malelela, bulunda bua meji, dilonga dia Bible ne dieleelapu meji, ne dieyemena spiritu munsantu wa Yehowa, busunguluji budi mua kudimibua.​—1/9, dibeji 21.

◻ Mmunyi mudi mukawu wa muntu mua kukumbaja tshipatshila tshimpe?

Udi mua kusaka muntu ku dikuba munangibue kampanda ku buenzeji bubi. Kupita apu, bantu badi mua kuleja mukawu muimpe bua Yehowa ne ntendelelu wende. (1 Bakelenge 19:10)​—15/9, mabeji 8, 9.

◻ Tshiambilu tshia ne: “Bakaledibua pa binu bia Yozefe” tshidi mu Genese 50:23 pa bidi bitangila bikulu ba Yozefe tshidi tshiumvuija tshinyi?

Bidi mua kumvuija patupu se: Yozefe wakanyisha bana aba bu tunkanunuina tuende. Bidi kabidi mua kuleja ne: uvua ne disuangana dionso unaya ne bana, ubakongoluela pa binu biende. Batatu ba lelu badi ne bua kuenza nunku bua kuleja bana babu disuangana dia muomumue.​—15/9, mabeji 20, 21.

◻ Ntshintu kayi tshidi ne mushinga mukole bua dibaka ne nsombelu wa dîku kulubulukabi?

Bua kupeta bipeta bimpe bia mushindu’eu, bena dibaka badi ne bua kuteka misangu yonso disua dia Nzambi pa muaba wa kumpala. Bua kuenza nunku, bena dibaka badi benza madikolela bua kulamatangana ne kujikija ntatu yabu pa kutumikila mibelu ya mu Dîyi dia Nzambi. Nunku badi bepuka mishindu yonso ya bisama bia mu mutshima bidi bifumina ku dilengulula dia disua diende. (Musambu wa 19:7-11)​—1/10, dibeji 11.

◻ Mmunyi mudi dijingulula dia buena Nzambi dia kuenza lukasa dikengedibua lelu’eu?

Dijingulula dia buena Nzambi dia kuenza lukasa didi tshitupa tshinene tshia mudimu muenza ne anyima mujima bua Yehowa. Didi diepula ku njiwu ne diambuluisha bua kutantamena mateta a Diabolo menza bua kufikisha basadidi ba Nzambi ku ‘diteketa mu maboko bua butekete budi mu [anyima yabu, NW].’ (Bena Hebreyi 12:3, MMM) Didi dibakuba ku didibuejakaja ne kasuki dikena ne mushinga mu malu a mu bulongolodi ebu ne mu dikeba diabu dibi dia bintu bia ku mubidi, pa kushindamija bieledi biabu bia lungenyi pa malu adi muulu​—“muoyo wa bushu[w]a mene.” (1 Timote 6:19)​—1/10, dibeji 28.

◻ Mu mufuanu wa mikoko ne mbuji, ntshikondo kayi tshidi Yezu usomba mu nkuasa wende wa bumfumu ne mbua kuenza tshinyi? (Matayo 25:31-33)

Mufuanu eu kawena umuleja musombe mu ngumvuilu wa dilua Mukalenge. Bishilangane, udi usomba bu Mulumbuluishi. Dilumbuluisha adi ki ntshintu kampanda tshidi tshitungunuka mu lupolo lule lua bidimu bia bungi. Pamutu pa nanku, mufuanu udi ufunkuna matuku atshilualua palua Yezu mu tshikondo tshijadika kukosa [nsambu] ne kukumbaja dilumbuluisha pa matunga.​—15/10, mabeji 22, 23.

◻ “Tshipungu” tshidi Yezu mutele misangu ne misangu ntshipungu kayi?

Yezu wakatumika ne mbikidilu “tshipungu etshi” bua kufunkuna misumba ya bantu ba mu tshikondo tshiende pamue ne “balombodi bafofo” babu bavua benze ditunga dia bena Yuda. (Matayo 11:16; 15:14; 24:34)​—1/11, dibeji 14.

◻ Mu dikumbana dia ndekelu dia mulayi wa Yezu mu Matayo 24:34-39, mbikidilu “tshipungu etshi” udi ufunkuna tshinyi?

Mbimueneke patoke ne: Yezu udi ufunkuna bantu ba pa buloba badi bamona tshimanyinu tshia dikalaku dia Kristo kadi bapanga kuakaja nsombelu yabu.​—1/11, mabeji 19, 31.

◻ Mmunyi muvua bantu mu Izalele wa kale bababidila ndongoluelu wa bimenga bia disokomena ne mikandu yabi?

Uvua mubueje mu lungenyi lua bena Izalele bualu bua se: kabavua ne bua kuikala ne kalèngù anyi dipungakana bua muoyo wa muntu. Wakazangika kabidi dikengedibua dia kuleja luse padi kuenza nunku kuakanyine. (Yakobo 2:13)​—15/11, dibeji 14.

◻ Tshimenga tshia disokomena tshidianjila kuleja ntshinyi?

Tshidi ndongoluelu wa Nzambi bua ditukuba ku lufu bua ditupa ku dîyi-dituma diende didi ditangila ngikadilu wa tshijila wa mashi. (Genese 9:6)​—15/11, dibeji 17.

◻ Mmunyi mudi buena-muntu bua bena nkristo mua kutuambuluisha bua ‘kupetulula bukole’? (Yeshaya 40:31)

Munkatshi mua bana betu bena nkristo, mudi bamue badi mua kuikala bakame bifimpakaji anyi ntatu ya mumue ne yetu ne badi mua kuikala bumvue nyanji anu bu itudi bapete. (1 Petelo 5:9) Bidi bikolesha ku muoyo ne bipetesha dikanda pa kumanya ne: bitudi tuluangana nabi ki mbipangike kumanyibua kudi bakuabu ne se: nyanji yetu kayena anu kutudi tuetu nkayetu.​—1/12, mabeji 15, 16.