Bena disanka mu bulongolodi bukena disanka
“PA KUMUTANGILA ne mmuenenu ukena ditekemena, siekele eu ng’wa Satana,” ke muakatuadija tshiena-bualu kampanda mu tshikandakanda tshia The New York Times tshia dia 26 Tshiongo 1995. “Mu tshikondo tshishale nansha tshimue bantu ki mbaleje makokeshi, ne nzala bivule nunku bua kushipa miliyo ya bantu bakuabu bua tubingila tua dikoba, ntendelelu, anyi milongo mu bantu.”
Mufikilu wa 50 wa dilekedibua dia bantu bakena bualu bela mu buloko mu tumponya tua lufu tua Nazi wakafundishisha biena-bualu bu mudi tshidi tshitela kuulu eku. Pabi, mushindu umue umue eu wa dishipangana dia tshikisu utshidi wenzeka mu bitupa bia Afrike ne Mputu wa ku Est.
Dishipangana dilongolola, dikezula bisa, dishibeya bisamba—nansha babibikile mu mushindu kayi—bidi bifikisha ku kanyinganyinga kanene. Pabi, munkatshi mua ndululu ya mushindu’eu mudi mupatuka mêyi makole a disanka. Tshilejilu, tuanjibi kutangila Allemagne mu bidimu bia 1930.
Mu Tshisanga 1935, Bantemu ba Yehowa bakipatshibua ku mudimu kayi wonso wa mbulamatadi wa bena ditunga kudi Hitler ne tshisumbu tshiende tshia Nazi. Bantemu bakakuatshibua kabidi, kuedibua mu maloko, ne kutumibua mu tumponya tua disubishilangana bualu bakalama ndubidilu wabu wa bena nkristo. (Yone 17:16) Ku ndekelu kua Tshimungu 1936, kuvua dikuatshibua dia mu tshi-bungi dia Bantemu ba Yehowa. Binunu bia kudibu bakatumibua mu tumponya tua disubishilangana, muakashala bavule ba kudibu too ne mu 1945 bua bàvuà bapanduke. Kadi, mmunyi muakandamuna Bantemu ku kanyawu kabenzela mu tumponya etu? Nansha mudibi mua kumueneka bu bualu bua dikema, bakakumbana bua kulama disanka nansha muvuabu mu nsombelu ikena ya disanka.
“Dibue mu bitotshi”
Mushikuluji wa malu a kale muena Grande-Bretagne Christine King wakela mukaji kampanda muena Katolike uvua mu tumponya atu nkonko. “Wakatumika ne tshiambilu tshindi tshiyi mua kupua muoyo,” ke muakamba profesere King. “Wakakula pa kusulakaja menemene pa bidi bitangila nsombelu mukuate buôwa, nsombelu mikuate muengu muvuaye musombele. Ne wakamba ne: uvua mumanye Bantemu, ne Bantemu aba bavua dibue mu bitotshi. Muaba kampanda mukolesha mu bitotshi bionso abi. Wakamba ne: anu buobu ke bavua kabayi batua mate pavua balami [ba tumponya] bapita. Anu buobu ke bavua babenga kuandamuna ku nsombelu eu ne lukinu kadi [bavua bandamuna] ne dinanga ne ditekemena ne nyanji ya se: kuvua tshipatshila.”
Ntshinyi tshiakapetesha Bantemu ba Yehowa mushindu wa kuikala ‘mabue mu bitotshi ebi’? Ditabuja dikena ditenkakana mu Yehowa Nzambi ne Muanende, Yezu Kristo. Nunku, madikolela a Hitler akapangila bua kujìkila dinanga ne disanka biabu bia bena nkristo.
Teleja mudi bapanduki babidi ba mu tumponya bavuluka bidimu makumi atanu kunyima kua bamane kutshimuna ditetshibua edi dia ditabuja. Umue udi wamba ne: “Disanka dianyi didi disapalala pa kumanya se: mvua ne muabi wa pa buawu wa kuleja dinanga dianyi ne dianyisha kudi Yehowa munkatshi mua nsombelu eyi ya tshikisu tshipite bukole. Muntu nansha umue kavua mumbambidika bua kuenza nanku! Bishilangane, aba bàvuà bateta bua kutubambidika bàvuà batuluishi bakateta ku diambuluisha dia mikanu bua se: tutumikile Hitler kupita Nzambi—kadi kakuyi ditshimuna! Ndi ne disanka ki ng’anu mpindieu, kadi bua kuondo kimpe ka muoyo, mvua ne disanka nansha pamvua panyima pa bimanu bia buloko.”—Maria Hombach, bidimu 94.
Ntemu mukuabu udi wamba ne: “Ndi ngela meji ku matuku anyi mu buloko ne dianyisha ne disanka. Bidimu bipitshisha mu bukokeshi bua Hitler mu nkanu ne tumponya tua disubishilangana bivua bia ntatu ne biuwule tente ne mateta. Kadi tshivua musue bua kubiepuka, bualu biakandongesha bua kueyemena Yehowa mu malu wonso.”—Johannes Neubacher, bidimu 91.
“Kueyemena Yehowa mu malu wonso”—ke tshivua nsapi wa disanka dilabula kudi Bantemu ba Yehowa. Nunku, badi bena disanka, nansha mudibu banyungulula kudi bulongolodi bukena disanka. Disanka diabu diakamueneka patoke mu Mpuilu ya distrike ya “Basamunyi bena disanka” mu ngondo mishale eyi. Tuanjibi kukonkonona mu tshikoso madisangisha a disanka aa.
[Tshimfuanyi mu dibeji 4]
Maria Hombach