Tendelela Yehowa ne bianza bipeluke

MUINSHI mua buenzeji bua spiritu, mufundi wa misambu Davidi wakimba ne: “Ndi ngowa bianza bianyi tshiyi ne tshilumbu; nunku, Yehowa, ndi nyunguluka ku tshioshelu tshiebe.”​—Musambu wa 26:6.

Pa kufunda mêyi aa, Davidi uvua pamu’apa utuma meji ku tshilele tshia bakuidi bena Lewi ba mu Izalele tshia kubanda ku tshioshelu ne pashishe kuteka milambu yabu pa kapia. Kadi kumpala kua dienza tshienzedi etshi tshia ntendelelu, bakuidi bavua balombibue bua kuowa mâyi ku bianza ne ku makasa. Ebu kabuvua bualu bukese. Dipanga kuela tshiidia etshi tshia kumpala divua mua kukebesha lufu bua muakuidi!​—Ekesode 30:18-21.

Diowa mâyi dia mu tshimfuanyi didi difikisha ku bupeluke bua mu nyuma ne mu malu a tshitembu. (Yeshaya 1:16; Efeso 5:26) Yehowa mmusue bua tuetu ‘kunyunguluka tshioshelu tshiende’ lelu’eu pa kumusadila. Kadi udi utulomba bua kuenza nunku ne bianza bipeluke​—anu bu mudi Davidi mufunde, bianza bidi biowesha ‘kabiyi ne tshilumbu.’ Bualu bulomba ebu ki mbukese, bualu bantu badi benza malu akêna mapeluke kabakupiana Bukalenge bua Nzambi. (Galatia 5:19-21) Nsombelu kampanda mu midimu ya buena Nzambi kêna upetesha muntu njila wa kudifila mu ngikadilu wa tshiendenda. Nunku mupostolo Paulo wakafunda ne: “Mubidi wanyi, ndi ng’ututa ne ng’ulombola bu mupika, bua se: pangikala mumane kulongesha bakuabu, meme muine tshivu muntu udi kayi muanyishibue, mu mushindu kampanda peshi kansanga.”​—1 Kolinto 9:27, NW.

Aba badi bakeba dianyishibua dia kudi Nzambi ne disanka dilelela badi ne bua kusadila Yehowa ne bianza bipeluke. Anu bu Davidi, badi benda “mu buimpe ne mu buakane bua mutshima.”​—1 Bakelenge 9:4.