Nkonko ya babadi

Efeso 3:14, 15 (NW) udi wamba ne: kudi Nzambi “ke kudi dîku dionso mu diulu ne pa buloba ne bua kupetela dîna diadi.” Kudi mêku mu diulu, ne dîku ne dîku dia bantu didi mu mushindu kampanda dipetela dîna diadi kudi Yehowa anyi?

Kakuena mêku mu diulu bu mudiwu pa buloba, mikala ne tatu, mamu, ne bana​—buonso bikale ne malanda a ku mubidi. (Luka 24:39; 1 Kolinto 15:50) Yezu wakaleja patoke se: banjelu kabena baselangana, ne kakuena bualu nansha bumue budi bufila tshijadiki tshia se: badi mu mushindu kampanda mua kulela bana.​—Matayo 22:30.

Kadi, Bible udi wakula mu ngakuilu wa mu tshimfuanyi bua Yehowa Nzambi bu musele bulongolodi buende bua mu diulu; mmusele mu ngumvuilu wa mu nyuma. (Yeshaya 54:5) Bulongolodi abu bua mu diulu budi bupatula ndelanganyi, bu mudi banjelu. (Yobo 1:6; 2:1; 38:4-7) Nunku, mu ngumvuilu eu kudi dîku dia dikema dia mu nyuma mu diulu.

Kusakidila apu, dîku dipiadipia kampanda dia mu tshimfuanyi didi dienda didiunda mu diulu, dia Yezu Kristo ne mukajende muenza kudi tshisumbu tshia bantu 144 000. (2 Kolinto 11:2) Bavule ba ku bela manyi aba bakaadi bamane kufua, ne ditekemena dia muoyo wa mu diulu. Bamue batshidi ne muoyo pa buloba. Buonso badi batekemena ne luzuku “dibaka dia Muan’a mukoko” mu diulu. Bible udi usuikakaja dibaka adi ku tshikondo tshia dikenga dinene didi dienda disemena​—dibutudibua dia Babilone Munene, ne pashishe dibutudibua dia tshishadile tshia ndongoluelu wa Satana.​—Buakabuluibua 18:2-5; 19:2, 7, 11-21, NW; Matayo 24:21.

Pa bidi bitangila mêku a pa buloba, mupostolo Paulo kêna uleja mu Efeso 3:15 ne: dîku ne dîku dionso dia bantu didi dipetela dîna diadi buludiludi kudi Yehowa. Bishilangane, mbimueneke patoke se: Paulo mmutume lungenyi luende ku milongo milondangane ya mêku malabale idi ilama dîna kampanda. Yoshua 7:16-19 udi upetesha tshilejilu tshimue. Yehowa uvua muikale utandula muaba eu mpekatu wa Akana. Kumpala, dipiila divua ditangija anyi diunguijila pa tshisa tshia Yuda. Pashishe bualabale buadi buakakepeshibua pa kudiunguija pa dîku dia bena Zela. Ndekelu wa bionso, nzubu wa Akana e kuedibua patoke. Akana pamue ne mukajende ne bana bende bakangatshibua, anyi bakakula bualu buabu, bu bena mu nzubu (anyi, dîku) wa Zabdi, kaku-mulume wa Akana. Dîku adi, ku luadi luseke, divua kasumbu kalabale kavua kalama dîna dia nkambua wabu Zela.

Munkatshi mua bena Ebelu, milongo milondangane ya mêku a mushindu’eu ivua ya mushinga munene, mivule mikale mifunda mu Bible. Nzambi wakambuluisha bua dilamibua diayi pa kupetesha ndongoluelu, pavuabi bikengedibua, bua bampianyi kusambulujabu dîna dia dîku ku diambuluisha dia dibaka dia bumpianyi, peshi dibakibua dia mukaji kudi bayende-tshina.​—Genese 38:8, 9; Dutelonome 25:5, 6.

Bu tshilejilu tshikuabu tshia mêku manene anyi malabale a mushindu’eu, angata Yezu bu muana wa Davidi. Mbimueneke patoke ne: kavua buludiludi ndelanganyi wa Mukalenge Davidi, bu muvuaye kayi muanji kuledibua siekele mivule kunyima kua lufu lua Davidi. Pabi, tshimanyinu kampanda tshifunkunyi tshia Masiya tshivua tshia se: uvua ne bua kuikala wa mu dîku dia Davidi, bu muvua bena Yuda buonso bamanye. (Matayo 22:42) Yezu uvua wa mu mulongo wa Davidi ku luseke lua mamuende ne lua tatuende mudila buledi.​—Matayo 1:1; Luka 2:4.

Kadi mmunyi mudi mêku a mushindu’eu apetela mêna awu kudi Yehowa? Bualu budiku mbua se: kuvua misangu mikese​—bu mu muanda udi utangila Abrahama ne Izaka—​ivua Yehowa winyika bushuwa mfumu kampanda wa dîku. (Genese 17:5, 19) Eyi ivua misangu ya pa nkayayi. Misangu mivule, Yehowa kêna upesha dîku ne dîku dia bantu dîna didi ne bua kusambulujibua kudi bana.

Kadi, Yehowa wakenza dîku dia bantu pakatuminaye Adama ne Eva dîyi bua ‘balelangane, bakumbane ba bungi, buuje buloba tente.’ (Genese 1:28) Ne Yehowa wakalekela Adama ne Eva bapange bupuangane bua kupatula ndelanganyi, pa kuasa nunku tshishimikidi bua mêku wonso a bantu. (Genese 5:3) Nunku mu ngumvuilu mupite pa umue, Nzambi udi mua kubikidibua bu Muenji wa mêna a mêku.

Nshidimukilu mivule lelu’eu kayena yumvua kabidi dikengedibua dia kulama mêna a dîku mu bipungu bivule. Nansha nanku, mu matunga wonso bena nkristo badi bela Yehowa tuasakidila bua dilongolola dia dîku ne bamunemekela pa kutumika bikole bua kulubuluja muntu ne muntu diende dîku.