Ditshimuna ku kabadi

MU Tshisanga 1995, ditshimuna dia mushinga mukole ku kabadi diakapetshibua. Bionso biakatuadija mu dia 28 Tshiongo 1992, pavua Luz Nereida Acevedo Quiles, uvua ne bidimu 24, mubuejibue mu Lupitadi lua El Buen Pastor ku Porto Rico bua dipandibua. Mumane kubuela mu lupitadi, wakamba ku mêyi ne pa kufunda ne: bu muvuaye Ntemu wa Yehowa, kavua ne bua kuitaba diedibua mashi nansha. (Bienzedi 15:28, 29) Bena mudimu wa lupitadi bavua bualu ebu butangile, pa kukonga ne munganga uvua umuondapa, bavua bamanye bimpe disua diende.

Matuku abidi kunyima kua dipandibua diende, Luz wakajimija mashi mapite bungi ne kutokoloka bikole bua dipatuka dia mashi. Munganga muondapi, Doktere José Rodríguez Rodríguez, wakela meji ne: mushindu umu’epele wa kumuambuluisha uvua anu dimuela mashi. Nunku, Luz kamanyi anyi kabiyi ku dianyisha diende, wakakeba dipangadika-difunda dia ku tubadi bua kumuela mashi.

Nansha muvua Luz muikale ne lungenyi luende luonso ne mukumbane bua kudiakuila, Doktere Rodríguez Rodríguez wakafiatutuka amu se: bu muvuaku nsombelu wa njiwu, kakuvua dîba dia kukeba dianyisha dia muntu kayi yonso. Mulumbuluidianganyi wa distrike, Eduardo Pérez Soto, wakatua tshiala pa mukanda eu, ne nzuji wa distrike, Wa-kunemeka Ángel Luis Rodríguez Ramos, wakapatula dipangadika-difunda dia kabadi bua diela mashi.

Nunku, mu dia 31 Tshiongo 1992, bakabueja Luz mu nzubu wa dipanda bantu, muakedibuaye mashi. Munkatshi mua diedibua edi dia mashi, wakumvua bamue ba ku bena mudimu wa lupitadi baseka. Bakuabu bavua bamutandisha, pa kuamba ne: tshivuabu bamuenzela etshi tshivua bua buimpe buende yeye muine. Wakaluangana muende muonso muvuaye mua kuenza​—bionso amu patupu. Ku ndekelu wa dituku adi, Luz wakedibua bibombi binayi bia mashi.

Tshilumbu tshia Luz katshivua tshia kumpala anyi tshia ndekelu pa diedibua mashi ne Bantemu ba Yehowa mu Porto Rico. Kumpala kua bualu ebu kumufikilabu, mapangadika-mafunda a tubadi mapite pa 15 akavua mapatudibue bua diela mashi kabiyi ku dianyisha dia Bantemu ba Yehowa bakulumpe, ne mavule mmapatudibue kutuadija ku tshikondo atshi. Bia dibungama, bua mubedi kampanda dipangadika-difunda edi dia kabadi diakakumbajibua, ne diedibua dia mashi diakenjibua ku bukole pa mubedi eu pavuaye kayi mumanye.

Kadi, diluangana dia Luz kadiakashikila anu mu nzubu wa dipanda bantu. Mu Kasuamansense 1993 bakafunda ditunga dia Porto Rico ku kabadi. Tshilumbu etshi tshiakalumbuluishibua kudi Kabadi Kakulu, ne mu dia 18 Tshisanga 1995, dipangadika divua dimubingisha diakapatudibua. Kabadi aka kakamba ne: dipangadika-difunda bua kuela mashi divua “dibengangane ne mêyi ne mikandu ne dinyenge mufundianganyi bukenji buende bua dilonda ne budikadidi ntendelelu wende, malu ende adi amutangila ne dienza tshidiye musue ne mubidi wende kayi mulumbuluishibue kudi kabadi.”

Mukandu eu uvua ne mushinga mukole, bualu bivua musangu wa kumpala uvua kabadi kampanda mu Porto Rico kangate dipangadika divua dibingisha Bantemu ba Yehowa mu tshilumbu kansanga tshidi tshitangila diela mashi. Nkosedi wa tshilumbu eu wakajudija ngandamuinu udi ukemesha bikole. Muyuki ne bamuangalaji ba ngumu wakenjibua, ne ba-kamona-kamba ba bibejibeji binene, ba tudiomba, ne ba televizion bavuaku.

Butuku bumue bumue abu programe kampanda wa tudiomba wakamanyisha diela nkonko dienza ne umue wa ku balumbuluidianganyi ba Luz. Bakalomba bateleji bua kubikila ku nshinga ne kuela nkonko. Ba-minganga bavule ne balumbuluidi bakabikila ne kuleja ngandamuinu wabu muimpe wa dianyisha ku tshilumbu etshi. Muedi wa nshinga umue wakamba ne: “Sianse ki mmukumbane bua kutujadikila se: diela mashi nedipandishe mioyo, ne nditupakana pa kuela meji mushindu’au.” Wakamba kabidi ne: “Mu katupa kîpi emu, diela mashi nedifundibue mu miyuki bu umue wa ku ntupakanyi ne bilema bitambe bunene bia mu malu a luondapu a buena-lelu.”

Profesere kampanda wa mikenji munemeka bikole wakabikila pashishe biro bia filiale wa Société Watch Tower bua kumvuija disankishibua diende diondoke ne tshiakabikilaye bu “ditshimuna dituè.” Wakasakidila ne: mukandu muela kudi kabadi udi ubingisha manême adi alonda mêyi ne mikandu, ki ng’anu bua Bantemu ba Yehowa nkayabu, kadi bua bena-muabu buonso ba mu Porto Rico.