Ukadi mupandishibue anyi?

JOHNNY uvua ne bidimu dikumi pakamuimanyika muntu mulume kampanda ku tshisalu tshia dimuenesha bintu ne kumuebeja ne: “Nsongalume, udi witaba Yezu Kristo bu Mukalenge webe ne Mukupandishi anyi?” Abi biakumvuika bu lukonko lua munga mushindu mene kudi Johnny, bualu ukavua misangu yonso muitabe Yezu. Nunku wakandamuna se: “Bushuwa ndi ngitaba.” “Samunayi Mukalenge!” ke muakamba muntu eu ne dîyi dikole bua buonso kumvuabu. “Anyima mukuabu mupandishibue bua Kristo!”

Lupandu ludi bushuwa lupepele nanku anyi? Johnny uvua “mupandishibue” bituadijila ku dîba diakambaye mêyi au, kabiyi kutangila tshivuaye mua kuenza bua matuku ende a muoyo avua mashale anyi? Bena mpokò bavule badi mua kuandamuna ne: eyowa. Imue trakte ya malu a Nzambi idi yamba bua kufunda dituku diuvua “mupandishibue” bua wewe kumona mua kudivuluka.

Mfumu kampanda wa tshitendelelu wakafunda ne: pa “dîba dia ditabuja patupu Kristo . . . lupandu lua muntu yonso ludi lujadikibua kashidi.” Wakamba mudi Bible wamba ne: lupandu ndusuikakaja ku “tshienzedi tshia ditabuja [tshimue, tshienza musangu umue], ki nku ditungunuka dia ditabuja nansha.” Mufundi mukuabu wa malu a Nzambi wakafunda ne: “Tshienzedi etshi tshia ditabuja tshimue mmudimu mujikija. Mmumana kukumbajibua buebe wewe . . . ‘Diluangana diebe dikadi dijike.’ ‘Mpekatu webe ukadi mumbushibue.’” Kadi nansha bantu badi batuishibue menemene se: bualu ebu mbulelela badi mua kumona lutatu kampanda muaba eu. Kakuyi mpata, bantu bavule badibu bambile mudibu “bapandishibue” kabena ne nsombelu udi Bible wamba ne: ng’udibu ne bua kuikala nende. Diumvuija ditangalake ndia se: pamu’apa kabavua bushuwa “bitabe” Kristo.

Nunku, ntshinyi tshidi “ditaba” Yezu diumvuija bushuwa? Ntshienzedi tshia ditabuja tshienza musangu umue, peshi mmushindu kampanda mutungunuke wa nsombelu? Ditabuja dietu didi ne bua kuikala dikole bua kutusaka ku tshienzedi anyi? Tudiku bushuwa mua kuitaba masanka atudi tupetela ku mulambu wa Yezu katuyi tuitaba bujitu bua dimulonda anyi?

Bantu ba bungi mbasue mabenesha kadi ki mbujitu bua kulonda ne kutumikila Yezu. Bushuwa, muaku “kutumikila” udi ubasuya. Pabi Yezu wakamba ne: “Ulue kundonda meme.” (Luka 18:18-23) Ne Bible udi wamba ne: ‘Aba badi kabayi batumikila lumu luimpe lua Mukalenge wetu Yezu . . . nebapete dikenga, dibutuka dia tshiendelele mene.’​—2 Tesalonike 1:8, 9; Matayo 10:38; 16:24.

Bible udi wamba malu a bungi adi ajula nkonko ya nsongo pa bidi bitangila tshidi tshilongeshibue pa bidi bitangila lupandu. Biwasua kumanya tshidi Bible wamba bushuwa pa bualu ebu, neumone mabeji adi alonda aa mikale akoka ntema ya pa buayi. Bulula Bible webe, ne bala mvese mitela bua kumona tshivua Yezu ne bapostolo bende balongeshe pa bidi bitangila bualu ebu bua mushinga mukole.