Ntshinyi tshitudi ne bua kuenza bua kupandishibua?

MUNTU kampanda wakebeja Yezu dimue dituku ne: “Mfumu, bantu bapanda nebikale bungi bukese anyi?” Mmunyi muakandamuna Yezu? Wakamba ne: ‘Ungitabe amu bu Mukalenge ne Mupandishi webe, bua wewe kupandishibua’ anyi? Tòo! Yezu wakamba ne: “Kebayi mua kubuelela ku tshiibi tshibulakane, bualu ndi nnuambila ne: ba bungi nebakebe mua kubuela kabayi bamona.”​—Lukase 13:23, 24, MMM.

Yezu wakapangila kuandamuna ku lukonko lua muntu eu anyi? Tòo, muntu eu kavua muebeje mushindu uvuabi bikole bua kupandishibua; uvua muebeje né bungi nebuikale bukese. Nunku Yezu wakaleja amu se: bantu bakese batambe badi muntu kayi mua kuelela meji nebakebe ne bukole buonso bua kupeta dibenesha edi dia mpatshi.

‘Atshi ki ntshivuabu bangambile nansha,’ ke mudi bamue babadi mua kulandula. Buobu aba badi mua kutela Yone 3:16, udi wamba ne: “Bualu Nzambi uvua mutambe kunanga bantu, wakabapesha Muanende mulela umuepele, bua se: muntu kayi yonso udi umuitabuja kalu kubutuka, kadi apete muoyo wa kashidi.” (King James Version) Kadi, tudi tuandamuna se: ‘Mbualu kayi mpindieu butudi ne bua kuitabuja? Mbua se: Yezu uvuaku ne muoyo bushuwa anyi? Bidi nanku. Mbua se: m’Muana wa Nzambi anyi? Kamuyi mpata! Ne bu mudi Bible ubikila Yezu ne: “Mulongeshi” ne “Mukalenge,” katuenaku petu ne bua kuitaba tshiakalongeshaye, kumutumikila, ne kumulonda anyi?’​—Yowanese 13:13, MMM; Matayo 16:16.

Dilonda Yezu

Ah, apa ke padi tshilumbu tshijuka! Bantu ba bungi badibu bambile mudibu “bapandishibue” mbamueneke bu badi ne disua amu dikese dia kulonda anyi kutumikila Yezu. Bushuwa, mfumu kampanda wa malu a Nzambi muena Mishonyi wakafunda ne: “Bushuwa, ditabuja dietu mu Kristo didi ne bua kutungunuka. Kadi kuamba ne: didi amu ne tshia bua, anyi bidi bikengela bua diodi kutungunuka, kakuena ne nshindamenu nansha umue mu Bible.”

Bishilangane, Bible udi utela bienzedi bia buenzavi bidi bitangalake munkatshi mua bamue bantu badi bela meji ne: “mbapandishibue.” Pa bidi bitangila muntu kampanda wakatungunuka mu njila ya mushindu’eu, Bible wakashidimuna bena nkristo ne: ‘Umbushayi muntu mubi au munkatshi muenu.’ Bushuwa Nzambi kêna mua kusua bua bantu babi banyange tshisumbu tshiende tshia bena nkristo!​—1 Kolinto 5:11-13.

Nunku, kulonda Yezu kudi kumvuija tshinyi, ne mmunyi mutudi mua kumulonda? Ee, ntshinyi tshiakenza Yezu? Uvua muenzavi? muena masandi? munuavi? muena dishima anyi? Uvua mupange bululame mu bungenda anyi? Tòo! ‘Kadi,’ ke mûdi mua kuebeja, ‘ndi ne bua kukezula nsombelu wanyi ku malu wonso aa anyi?’ Bua diandamuna, konkonona Efeso 4:17 too ne ku 5:5 (NW). Kêna wamba ne: Nzambi neatuitabe nansha tuenza tshintu kayi tshionso. Pamutu pa nanku, udi utuambila bua tuetu kuikala bashilangane ne bantu ba mu bulongolodi ebu badi “kabatshiyi ne kuondo ka muoyo kadi kabasaka ku bimpe, . . . kadi nuenu, ki mmushindu’eu unuakalonga mua kumanya Kristo . . . Vuulayi bumuntu bukulukulu budi tshimuenekelu tshia nsombelu wenu wa diambedi . . . Muivi kiibi kabidi . . . Masandi ne dipanga bukezuke dia mushindu kayi wonso anyi lukuka kabitedibu mene munkatshi muenu nansha, anu bu mudibi biakanyine bansantu . . . Bualu nudi bamanye bimpe bualu ebu, babushindike nuenu bine se: nansha muendi wa masandi anyi muntu mupange bukezuke anyi muena lukuka​—mbuena kuamba ne: mutendeledi wa mpingu—​kêna ne bumpianyi mu bukalenge bua Kristo ne bua Nzambi.”

Tudi tulonda Yezu patudi katuyi tuteta nansha kakese bua kuikala ne nsombelu udi mu diumvuangana ne tshilejilu tshiende anyi? Katuenaku ne bua kutumika bua kutamba kuvuija nsombelu wetu mufuanangane ne wa Kristo anyi? Lukonko alu lua mushinga lutu amu misangu mikese, anyi kalutu mene lukonkononyibua kudi bantu badi bamba, anu bu mudi trakte kampanda wa malu a Nzambi wamba ne: “Vuaku kudi Kristo mpindieu​—anu mûdi amu.”

Umue wa ku bayidi ba Yezu wakadimuija ne: bantu bakena bena Nzambi bavua “bakudimuna buimpe bukena butuakanyine bua Nzambi wetu bu kabingila bua bienzedi bia didilekelela ne bavila Mfumu wetu umuepele ne Mukalenge Yezu Kristo.” (Yuda 4, NW) Bushuwa, mmunyi mutudi mua kukudimuna luse lua Nzambi bu “kabingila bua bienzedi bia didilekelela”? Tudi mua kuenza nunku pa kudianjila kuela meji ne: mulambu wa Kristo udi ubuikidila mpekatu mienza ku bukole itudi basue kutungunuka ne kuenza pamutu pa mpekatu ya ku dipanga bupuangane dia muntu itudi tudikolesha bua kulekela. Bushuwa katuakusua kutua ku tshia umue wa ku bamanyishi ba evanjeliyo muena Amerike muende lumu, wakamba ne: kabiena bikengela bua “udikezule, ulekele, anyi ukudimuke.”​—Sulakaja ne Bienzedi 17:30; Lomo 3:25; Yakobo 5:19, 20.

Ditabuja didi disaka ku dienza

Bantu ba bungi mbabambile ne: “ditabuja Yezu” ntshienzedi kampanda tshia kuenza musangu umue ne se: ditabuja dietu kadiena ne bua kuikala dikole dikumbanyine bua kusaka ku butumike. Kadi Bible kêna witaba bualu ebu. Yezu kakamba ne: bantu badi batuadija njila wa Buena-nkristo mbapandishibue. Bishilangane, wakamba ne: “Wananukila too ne ku ndekelu neapande.” (Matewuse 10:22, MMM) Bible udi ufuanyikija njila wetu wa Buena-nkristo ku lubilu lua ditembangana, ludi ne lupandu bu difutu ku ndekelu kualu. Ne udi ubela ne: “Nyemayi mushindu wa kudipeta.”​—1 Kolinto 9:24, NW.

Nunku, “ditaba Kristo” didi dikonga bivule kupita ne kule ditaba mabenesha adi mulambu wa Yezu wa mushinga mukole upetesha. Butumike mbulombibue. Mupostolo Petelo udi wamba ne: dilumbuluisha didi dituadija ne ‘ba mu nzubu wa Nzambi,’ ne udi usakidila se: ‘Ne biadianjiladi kubanga kutudi, nshikidilu wa badi kabayi batumikila lumu luimpe lua Nzambi neikale tshinyi?’ (1 Petelo 4:17) Nunku tudi ne bua kuenza bipitshidile pa kuteleja ne kuitabuja patupu. Bible udi wamba ne: tudi ne bua ‘kuvua benji ba dîyi, ki ng’anu bateleji patupu, [tudidinga nkayetu] ne mmuenenu ya dishima.’​—Yakobo 1:22, NW.

Mikenji mine ya Yezu

Mukanda wa mu Bible wa Buakabuluibua udi ne mikenji ya kudi Yezu, mitumina bisumbu muanda-mutekete bia bena nkristo ba mu tshikondo tshia kumpala ku butuangaji bua Yone. (Buakabuluibua 1:1, 4) Yezu wakamba ne: bu muvua bantu bavua mu bisumbu ebi bamane “kumuitaba,” abi bivua bikumbane anyi? Tòo. Wakatumbisha bienzedi biabu, mudimu wabu mukole ne dinanukila diabu ne kuakula bua dinanga, ditabuja, ne mudimu wabu. Kadi wakamba ne: Diabolo uvua ne bua kubateta ne se: bavua ne bua kufutshibua “muntu ne muntu bilondeshile bienzedi [biabu].”​—Buakabuluibua 2:2, 10, 19, 23, NW.

Nunku Yezu wakaleja bujitu butambe bunene kupita pa tshidi bantu bavule bumvue pakabambilabu se: lupandu luabu luvua “mudimu mukumbaja” diakamue pavuabu “bamuitabe” mu tshisangilu kampanda tshia malu a Nzambi. Yezu wakamba ne: “Pikala muntu musue kundonda, adibenge, ambule [mutshi wende wa tshinyongopelu, NW] andonde. Bualu, muntu wajinga kupandisha muoyo wende, neaujimije; kadi wajimija muoyo wende bualu buanyi, neaupete.”​—Matewuse 16:24, 25, MMM.

Tudibenge? Tulonde amu kulonda Yezu? Abi nebilombe madikolela. Nebishintulule nsombelu yetu. Kadi, Yezu wakamba bushuwa ne: bamue ba kutudi bavua nansha mua ‘kujimija mioyo yabu’​—kufua bualu buende anyi? Eyowa, ditabuja dia mushindu’au didi dilua amu ne dimanya dia malu a dikema audi mua kulongela ku dilonga dia Dîyi dia Nzambi. Diakamueneka patoke dituku diakasabu Etienne mabue kudi banangi banekeshi ba malu a Nzambi bavua ‘kabayi bamona bua kumutshimuna, bualu uvua wakula ne meji avua [spiritu, NW] mumupeshe.’ (Malu Menza 6:8-12; 7:57-60, MMM) Ne ditabuja dia mushindu’eu ndilejibue mu bikondo bietu ebi kudi binunu bia Bantemu ba Yehowa bakafua mu tumponya tua disubishilangana tua ba-Nazi pamutu pa kunyanga tuondo tuabu tua muoyo tulongesha kudi Bible.a

Mitalu ya bena nkristo

Tudi ne bua kukuata bikole ku ditabuja dietu dia Buena-nkristo bualu, bishilangane ne tshiudi mua kumvua mu bimue bitendelelu anyi mu programe ya malu a Nzambi ku televizion, Bible udi wamba ne: tudi mua kupona. Udi wakula bua bena nkristo bakalekela ‘njila mululame.’ (2 Petelo 2:1, 15) Nunku tudi tukengela ‘kudienzeja bua kujikija lupandu luetu ne ditshina ne dizakala.’​—Filipoi 2:12; 2 Petelo 2:20.

Eu ke mushindu uvua bena nkristo ba mu siekele wa kumpala, bantu bakumvua bushuwa Yezu ne bapostolo bende balongesha, bumvue bualu ebu anyi? Eyowa. Bavua bamanye se: bavua ne bua kuenza tshintu kampanda. Yezu wakamba ne: “Nunku, ndayi ne nuvuije bantu ba mu matunga wonso bayidi, . . . nubalongeshe mua kutumikila malu wonso andi munutumine dîyi.”​—Matayo 28:19, 20, NW.

Ngondo ibidi Yezu mumane kuamba nunku, bantu 3 000 bakatambuishibua mu dituku dimue tshianana. Bungi bua bena kuitabuja buakavula lukasa ne kufika ku 5 000. Aba bavua bitabuja bavua balongesha bakuabu. Pavua dikengeshibua dibatangalaje, diakasadila amu bua kutangalaja mukenji wabu. Bible udi wamba ne: kabivua amu bamfumu bakese kadi ‘bavua batangadike bakendakana bamba dîyi dia lumu luimpe.’ Bidimu bu 30 pashishe, mupostolo Paulo wakafunda ne: lumu luimpe lukavua “lumanyishibue mu bifukibua bionso bidi muinshi mua diulu.”​—Bienzedi 2:41; 4:4; 8:4; Kolosai 1:23, NW.

Paulo kakakudimuija bantu mitshima, bu mudi bamue bamanyishi ba evanjeliyo ba ku TV benza, pa kuamba ne: ‘Itaba Yezu amu mpindieu, bua wewe kupandishibua bua kashidi.’ Kavua kabidi ne dishindika dia mfumu wa malu a Nzambi muena Amerike wakafunda ne: “Bu nsongalume wa bidimu dikumi, . . . nkavua mumane kupandishibua.” Bidimu bipite pa 20 kunyima kua Yezu mumane kusungula nkayende Paulo bua kutuadila bantu ba matunga makuabu mukenji wa Buena-nkristo, mupostolo eu muenji wa mudimu ne disuminyina wakafunda ne: “Mubidi wanyi, ndi ng’ututa ne ng’ulombola bu mupika, bua se: panyima pa meme mumane kulongesha bakuabu, meme muine tshivu muntu udi kayi muanyishibue, mu mushindu kampanda peshi kansanga.”​—1 Kolinto 9:27, NW; Bienzedi 9:5, 6, 15.

Lupandu ndipa kadiyi kusumba dia kudi Nzambi. Kaluena mua kupetshibua bu difutu. Kadi ludi lulomba madikolela ku luetu luseke. Biakupa muntu kampanda dipa kansanga dia mushinga mukole ne biwabenga kuleja dianyisha dikumbanyine bua kudiangata ne kuya nadi, dipanga kuleja dianyisha diebe didi mua kusaka mupianganyi eu bua kudipa muntu mukuabu. Ee, mmushinga mukole kayipu udi nau mashi mafidi a muoyo a Yezu Kristo? Ndipa kadiyi kusumba, kadi tudi ne bua kuleja dianyisha diondoke buadi.

Bena nkristo balelela badi mu ngikadilu kampanda wa dipandishibua bu mudibu mu nsombelu kansanga wa dianyishibua kumpala kua Nzambi. Bu tshisumbu, lupandu luabu ndujadikibue. Ku muntu ku muntu, badi ne bua kukumbaja malu malomba a Nzambi. Kadi, tudi mua kupangila, bualu Yezu wakamba ne: “Bikala muntu ka[y]i ushala munda muanyi, nebamuimanshe bu ditamba, neafube.”​—Yone 15:6.

‘Dîyi dia Nzambi didi ne muoyo’

Diyukidilangana ditela ku ntuadijilu wa tshiena-bualu tshishale diakenzeka kukadi pamue ne bidimu 60. Johnny utshidi witabuja ne: lupandu ludi lulua amu ku butuangaji bua Yezu Kristo, kadi mmujingulule ne: tudi ne bua kuluipatshila. Mmushale mutuishibue se: Bible udi ufunkuna mpokolo anu umu’epele mulelela wa ditekemena bua bukua-bantu ne se: tudi ne bua kulonga mukanda au wa mpatshi, kulengibua ku muoyo kudiwu, ne kuwulekela bua utusake ku bienzedi bia dinanga, ditabuja, bulenga, butumike, ne dinanukila. Mmukoleshe bana bende bua kuitabuja malu a muomumue, ne mpindieu udi usanka bikole pa kubamona pabu bakolesha babu bana mu njila umue umue eu. Udi ujinga se: muntu yonso ikale ne ditabuja dia mushindu au, ne udi wenza muende muonso bua kudiasa mu mitshima ne bieledi bia lungenyi bia bakuabu.

Mupostolo Paulo uvua muenzejibue kudi spiritu bua kufunda ne: ‘Dîyi dia Nzambi didi ne muoyo ne bukole.’ (Ebelu 4:12) Didi mua kukudimuna nsombelu ya bantu. Didi mua kukusaka ku bienzedi bìdì bilenga mutshima bia dinanga, ditabuja, ne butumike. Kadi udi ne bua kuenza bipitshidile pa “kuitaba” patupu mu lungenyi tshidi Bible wamba. Longa Bible ne anyisha bua mutshima webe usonsodibue kudiye. Anyisha bua meji ende akulombole. Bantemu ba Yehowa bena budisuile bapite pa 5 000 000 mu matunga mapite pa 230 badi bapetesha malonga a Bible kumbelu kakuyi dilomba mfranga. Bua kumona tshiudi mua kumanyina ku dilonga dia mushindu’eu, fundila bapatudi ba tshibejibeji etshi. Ditabuja ne dikanda dia mu nyuma biwapeta nebikusankishe bikole!

[Mêyi adi kuinshi]

[Kazubu mu dibeji 7]

Bua tshinyi “kuluangana bikole bua ditabuja”?

Mukanda wa mu Bible wa Yuda mmufundila ‘babikidibue . . . , balamibue bua Yezu Kristo.’ Udi wamba ne: bu mukavuabu ‘bitabe Yezu,’ lupandu luabu lukavua lujadikibue anyi? Tòo, Yuda wakambila bena nkristo aba bua “kuluangana bikole bua ditabuja.” Wakabapa tubingila tusatu tua dienzela nunku. Ka kumpala, Nzambi “wakapandisha tshisamba kampanda kumbukila mu ditunga dia Ejipitu,” kadi bavule ba kudibu bakapona pashishe. Kibidi, nansha banjelu bakatomboka ne kulua ba-demon. Kisatu, Nzambi wakabutula Sodome ne Gomore bua tshiendenda tshia masandi tshibiatshibi tshìvuà mu bimenga abi. Yuda udi uleja miyuki eyi ya mu Bible “bu tshilejilu tshia didimuija.” Eyowa, nansha bena kuitabuja “balamibue bua Yezu Kristo” badi ne bua kudimuka bua kabalu kusesuka ku ditabuja dilelela.​—Yuda 1-7, NW.

[Kazubu mu dibeji 8]

Ntshinyi tshidi tshilelela?

Bible udi wamba ne: ‘Muntu udi ubingishibua ku ditabuja, ki nku [midimu ya, NW] mikenji nansha.’ Udi wamba kabidi ne: ‘Muntu udi ubingishibua ku [midimu, NW], kêna ubingishibua anu ku ditabuja.’ Ntshinyi tshidi tshilelela? Tudi tubingishibua ku ditabuja anyi ku midimu?​—Lomo 3:28; Yakobo 2:24.

Diandamuna dia nkatshinkatshi dia mu Bible ndia se: bionso bibidi mbilelela.

Munkatshi mua siekele mivule Mikenji ivua Nzambi mufile ku butuangaji bua Mozese ivua ilomba batendeledi bena Yuda bua kufila milambu ne mapa bisunguluke, kunemeka matuku a mafesto, ne kulonda mikenji pa biakudia ne makuabu malu malomba. “Midimu ya mikenji” ya mushindu’eu, anyi “midimu” patupu, kayitshivua kabidi ikengedibua pakaavua Yezu mupeteshe mulambu mupuangane.​—Lomo 10:4.

Kadi bualu bua se: midimu eyi mienza muinshi mua Mikenji ya Mozese ivua mipinganyibue kudi mulambu wa mushinga mukole wa Yezu kabuvua bumvuija ne: tudi mua kulengulula mêyi-mashidimunyi a mu Bible. Udi wamba ne: ‘Mashi a Kristo . . . neatambe misangu bungi munyi kulengeja [tuondo tuetu tua muoyo, NW] ku midimu mifua [ya kale] bua [tuetu] kukuatshila Nzambi udi ne muoyo mudimu wa tshijila?’​—Ebelu 9:14.

Mmunyi mutudi ‘tukuatshila Nzambi udi ne muoyo mudimu wa tshijila’? Tshilejilu, Bible udi utuambila bua kuluisha midimu ya mubidi, bua kukandamena buenzavi bua mu bulongolodi ebu, ne kuepuka mateyi abu. Udi wamba ne: ‘Uluangane mvita mimpe ya ditabuja,’ umbushe “mpekatu udi utupumbisha mu mushindu mutekete,” ne ‘nyema ne dinanukila lubilu ludi lututekela kumpala, batangile ne ntema kudi Yezu, Ntunga-mulongo ne Mupuangaji wa ditabuja dietu.’ Ne Bible udi utubela bua ‘katupungidi ne katuteketshi mu anyima yetu.’​—1 Timote 6:12; Ebelu 12:1-3, NW; Galatia 5:19-21.

Katuena tupeta lupandu bu difutu pa kuenza malu aa, bualu muntu nansha umue kêna mua kuenza bivule bua kukumbanyina dibenesha dia dikema dia mushindu’eu. Nansha nanku, katuena bakumbanyine dipa edi dia mushinga mukole patudi tupangila kuleja dinanga dietu ne butumike pa kuenza malu adi Bible wamba ne: Nzambi ne Kristo mbasue bua tuetu kuenza. Bikalaku kakuyi midimu bua kuleja ditabuja dietu, didituta dietu pa tshiadi mutudi tulonda Yezu nedipangile menemene, bualu Bible udi wamba patoke ne: ‘Ditabuja kabidi, bikaladi kadiyi ne kuenza, didi didifuila.’​—Yakobo 2:17.

[Tshimfuanyi mu dibeji 7]

Longa Bible, ne usonsodibue kudiye