Mukanda wa misambu wa pa muoyo wa Irina

MATUKU adi panshi aa, Irina, muana mukese wa bakaji wa bidimu tshitema wa ku Sofia, Bulgarie, uvua mutambuishibue bu umue wa ku Bantemu ba Yehowa. Mmunange kuimba ne mmusue nangananga misambu idi mu mukanda wa Louons Jéhovah par nos chants. Nunku Irina wakadifundila tshipatshila tshia kukuata ndambu wa misambu ku muoyo ngondo wonso.

Tshimue tshia ku biena-bualu bia pa muoyo bia Irina mu kalasa m’mijiki. Nunku mulongeshi wende wa mijiki wakapampakajibua pakabenga Irina dilomba bua kuimba mu kasumbu ka bimbi ba misambu mu kalasa. Bua tshinyi Irina wakabenga? Wakasunguluja ne: mivule ya ku mijiki yamulombabu bua kuimba idi itumbisha bilobo bia ditunga ne mafesto adi mafumine ku bumpangano. Imue misambu idi mene ibingisha buntomboji ne tshikisu bua kulubuluja bipatshila bia ditunga. Mulongeshi kavua ukumbana bua kumvua mmuenenu wa Irina pa bualu ebu. Irina wakaditua mu difundila mulongeshi wende mukanda bua kuleja mitabuja ende mu malu a ntendelelu​—kadi kakuyi tshipeta.

Tatuende wa Irina wakapeta lungenyi kampanda. Wakapa mulongeshi eu kopi wa mukanda wa Louons Jéhovah par nos chants, udi ne misambu idi Irina munange kuimba. Matuku makese panyima, mulongeshi eu wakabikila Irina mu tshibambalu tshia mijiki. Wakalomba Irina bua kuimba imue misambu yende ya pa muoyo ya mu mukanda eu​—kumpala kua balongi nende—​eku mulongeshi umuimbila tshiombelu tshia piano. Bule bua dimba edi buvua bupite dîba dimue! Mulongeshi eu wakafika ku ditonda ne: mukanda wa misambu wa pa muoyo wa Irina uvua ne bimue bikuma bilengele.