Kampanye kalenga ka bumanyishi mu Grèce

BANTEMU BA YEHOWA mbakamangane mutantshi mule ne buluishi mu Grèce. Bamue banene ba bampulushi, ba ku tubadi ne ba mbulamatadi mbakengeshe Bantemu, misangu mivule ku buenzeji bua bamfumu ba ekleziya wa Ortodokse wa bena Grèce. Imue misangu kabingila kavua kashila pa mukenji mukandiki wa diandamuija ditabuja dia bakuabu, misangu mikuabu kavua kashila pa dibenga dishindamene pa Bible dia Bantemu bua kuya ku mvita anyi kuitaba diedibua mashi.​—Yeshaya 2:2-5; Bienzedi 15:28, 29.

Mu madikolela menza bua kulubuluja ngumvuilu mutambe bunene munkatshi mua banene ba ditunga bena muoyo mululame ba mu Grèce, Bantemu bu 200 badi banyishibue kudi mbulamatadi wa bena Grèce bu ba-ministre ba malu a Nzambi, pamue ne bamue Bantemu bena mudimu wa bundumbulula, mbatuadije matuku adi panshi aa kampanye mu ditunga dijima. Bavua babanye broshire mulongolola wa pa buende, udi ne tshiena-bualu tshia Jehovah’s Witnesses in Greece (Bantemu ba Yehowa mu Grèce), pamue ne mukanda wa Les Témoins de Jéhovah: Prédicateurs du Royaume de Dieu. Bakapetesha kabidi bungi kampanda bua mikanda mifunda idi ileja ne: kakuena kabingila kalelela kashila pa mikenji bua dikengeshibua dia Bantemu ba Yehowa. Bantemu bakakumbula bamfumu ba bampulushi, bamfumu ba bimenga, ba-prokirere, ne banene bakuabu ba mbulamatadi.

Diandamuna? Nkama ya malu mimpe mamona. Tangila bimue bilejilu.

Mfumu wa biro kampanda bia bampulushi mu Macédoine wa ku Ouest wakakidila bana betu ne kuamba ne: “Ndi munumanye kukadi mutantshi mule, . . . ne ndi nganyina bulongame buenu. . . . Tshiena ngitabija mukenji muela pa diandamuija ditabuja dia bakuabu, ne bu meme ne bukenji, mvua mua kuwumbusha.”

Bamfumu ba biro kabukabu bia bampulushi mu bimenga bia bungi bakamba malu bu mudi: “Ndi nnuela ka-lumbandi bua mudimu unudi nuenza mu nsangilu wa bantu.” “Tshisumbu tshienu katshitu nansha kakese tshikebela bampulushi ntatu; nudi nukumbaja mudimu mu diakaja nsangilu wa bantu.” “Katuena nenu bualu nansha bumue. Tudi tununemeka ne tunuanyina.”

Mu Le Pirée mfumu munene kampanda wa bampulushi ba bukubi wakambila bana betu, ne binsonji ku mêsu, ne: mmumanye mua kusambila Yehowa Nzambi ku dîna diende ku butuangaji bua Yezu Kristo. Wakatamba kukemesha mene Bantemu pakabambilaye pashishe ne: uvua mumanye se: bavua mu ditekemena dia dikengeshibua kampanda kumpala kua Armagedon, ne uvua utekemena se: Nzambi uvua mua kutumika nende bua kubambuluisha mu tshikondo atshi! Wakitaba dilomba dia bana betu bua kuyukidilangana kabidi.

Banene ba mbulamatadi badi bandamuna

Mfumu wa tshimenga kampanda mu Thessalie wakamba pa bidi bitangila mukanda wa Prédicateurs ne: “Mmukumbanyine kupeta muaba mu tshilaminu tshia mikanda tshia mu tshimenga​—muaba wa kumpala!” Wakumbusha diakamue mikanda ivua pa tshitekelu kampanda ne kuteka mukanda wa Prédicateurs muaba au mushindu uvua tshizubu tshiawu ne bua kumueneka.

Mu Grèce wa ku Nord mfumu kampanda wa tshimenga wakakidila bana betu ne musangelu wonso ne kuamba ne: “Nudi bantu batambe buimpe bandi mua kujinga mua kuikala nabu mu kasumbu kanyi kaludiki ka tshimenga.” Mfumu kampanda wa tshimenga muena bulenga ku Nord wa Eubée wakambila bana betu ne: “Ndi mfumu wa kale wa basalayi. Kadi nuenu​—ndi nnuanyina bikole menemene.” Wakitaba ne luya luonso mamanyisha akamupabu kudi Bantemu. Pakalejabu mikanda kampanda misungula mipatula kudi Société Watch Tower, wakamba ne: “Binganulaya bua kuyibala yonso, nenuyimpeshe anyi?” Bakandamuna se: “Bushuwa​—idi buebe wewe!” E kumvuaye milowo ne kakasua bua bana betu bumbuke.

Mu tshitupa kampanda tshia Attique, mfumu kansanga wa tshimenga wakanyisha ne disanka mikanda ivua bana betu bamupeshe ne kubalombaye bua kutungunukabu ne kumutuadila mikanda mifunda kudi Société. Pakaavuabu bambula makasa bua kuya, wakabambila ne: “Bantu mbedibue bikole mâyi ku makasa kudi bena tshididi ne badi bakeba bulelela bua bushuwa muaba mukuabu. Ndi mushindike se: biangatshile ku mpindieu nenupete bia bungi bia kuenza bualu nudi ne bulelela ebu.”

Ba-prokirere badi bandamuna

Bana betu bavua bakumbule prokirere musungula mu Grèce wa ku Nord bakavuluija ne: “Uvua mukemeshibue bikole kudi mikanda yetu ne kudi dileja, pamue ne kudi madikolela atudi tuenza bua kujadika se: bantu betu kabena bapanga diambuluisha padibu bakama lutatu lunene lua diedibua mashi. Ndekelu wa bionso wakatuela tuasakidila ne kutuela ka-lumbandi ne musangelu bua didianjila kuela tshiidia dietu pa kumukumbula ne kumumanyisha malu. Pashishe, tuakalua kusokolola se: bidimu binayi kumpala uvua mubikile bampulushi ne kutuma dîyi bua kukuatabu bana betu babidi bavua mu mudimu wa budimi.”

Balumbuluidi babidi Bantemu bavua bakumbule biro bia ba-prokirere ku Athènes bakakemeshibua pa kumona prokirere kampanda wa kale mumanyibue bimpe ne munemekibue usemena kudibu. Wakaya nabu ku luseke ne kubambila ne: mukenji ùdì ukandika diandamuija ditabuja dia bakuabu kawena ne nshindamenu ne udi ulela dikondakana mu ndongoluelu wa tubadi wa bena Grèce. Wakabela tuasakidila pa kubanyukula tshianza ne musangelu.

Ku Nord wa Grèce, prokirere kampanda muena bulunda menemene wakangata mikanda. Pavuaye wenda utangila ku dibeji ku dibeji mukanda wa Les jeunes s’interrogent—Réponses pratiques, wakakemeshibua bikole pa kumona dishilangana dia nshapita mu tshikebelu. Wakamba ne: “Bidi mukanda eu uleja, tshiena muanji kubimona mu ekleziya mujima wa Ortodokse.”

Prokirere kampanda mu Béotie wakatonda se: yeye, ku kale, wakatuma dîyi bua kuelabu Bantemu mashi kabiyi ku disua diabu. Kadi pakamana bana betu kuelangana nende meji pa bualu ebu, wakamba se: “Tshiakupatula kabidi nansha kakese dîyi kampanda dia mushindu’au mu matuku atshilualua!” Wakapangadija bua kukudimuka kudi Komité wa diumvuangana ne mpitadi wa muaba au wa Bantemu ba Yehowa bua se: mishindu yonso ya diondapa ikena ilomba mashi ikonkononyibue. Wakangata ne disanka mukanda wa Les jeunes s’interrogent.

Balami ba mikanda badi bandamuna

Mikanda eyi bakayileja kabidi balami bavule ba mikanda. Mu tshilaminu kampanda tshia mikanda mu Athènes, mulami wa mikanda wa kunemeka wakitaba mikanda ne kuamba ne: “Mbimpe bitambe munudi batutuadile mikanda yenu bualu mivule ya ku mikanda itudi nayi mu tshilaminu tshietu tshia mikanda idi ya baluishi benu. . . . Nsaserdose kampanda uvua mumvue bibi pa kumona mikanda yenu mu tshilaminu tshia mikanda. . . . Kabiena ne bualu. Mmuenenu yonso idi ne bua kutelejibua.”

Mfumu kampanda mu tshilaminu tshia mikanda tshia tshimenga mu Crète, eu uvua mumanyine Bantemu ba Yehowa mu kamponya kampanda ka basalayi, wakambila bana betu ne: uvua mukemeshibue bikole kudi dibenga dia Bantemu dia kubuelakana mu mvita. Uvua mutungunuke ne kudiebeja yeye muine se: ‘Bua tshinyi bantu aba badi ne bua kukenga?’ Wakangata mikanda mimupesha kudi bana betu ne kuamba pa bidi bitangila kampanye kabu ka matuku adi panshi aa ne: “Nudi benze mudimu muimpe mutambe ne nuvua ne bua kuikala bawenze bidimu bivule kumpala. . . . Mu Grèce mmutambe kuvula ngenyi midifumbila.” Wakalomba bana betu bua balue kumukumbula kabidi kabiyi kunenga.

Mu kupita kua kampanye aka ka pa buaku, bana betu bakashiya mikanda ya Prédicateurs mipite pa 1 000, broshire 1 600 ya Jehovah’s Witnesses in Greece, pamue ne nkama ya mikanda ne bibejibeji. Tshivua tshitambe buimpe kabidi, bakakula mpala ne mpala ne nkama ya banene ba ditunga bena Greke. Mpindieu ditekemena dia basadidi ba lulamatu ba Yehowa mu Grèce ne pa buloba bujima didiku ndia se: baludiki bena mutshima muakaja ba mu Grèce nebikale ne mmuenenu ukena wa kansungasunga bua Bantemu ba Yehowa.