Didiunda ne dibenesha dia kudi Yehowa

PROGRAME kampanda wa dibanjija mu dilolo dia 18 Kabitende 1995, wakazangika se: Yehowa Nzambi mmubeneshe bushuwa didiunda dia Bantemu bende ku muaba wa bilombuelu biabu bia buloba bujima ku Brooklyn, New York.

Bantu bapite pa 6 000 bakateleja programe eu wa dibanjija. Bavua badisangishe pamue ku Brooklyn, muaba uvua programe eu wenzekela, pamue ne mu miaba mikuabu kabidi, pa kukonga ne nzubu minene ya Bantemu ba Yehowa pabuipi ne Patterson ne Wallkill, mu New York, ne ku filiale wabu pabuipi ne Toronto, mu Canada. Aba bavua kabayi ku Brooklyn bakateleja dilondangana dia programe ku nshinga.

Programe údí usanguluja mutshima

Bena Betele, mbikidilu wa bena mudimu bena budisuile, bavua bateleja programe eu bavua tshitupa tshinene tshia dîku dia Betele dia pa buloba bujima didi ne benamu bapite pa 16 400. Bonso aba badi basadila mu matunga bu lukama, mudibu bapatula mikanda miumvuiji ya Bible ne benza midimu mikuatshishi bua bisumbu bipite pa 78 600 bia Bantemu ba Yehowa pa buloba bujima.

Didianjila kusanka divua dinene pakatuadija programe wa dibanjija pa dîba 6:30 ku dilolo ne musambu, mulonda kudi disambila dienza kudi Karl Klein. Mulombodi wa programe, Lloyd Barry, wakajingila bonso ne musangelu difika dilenga ne kufila mumvuija mu mêyi makese pa ngumvuilu wa tshibilu etshi. Albert Schroeder wakakonkonona dilonga dia Tshibumba tshia Nsentedi dia ku lumingu, ne pashishe Daniel Sydlik wakakula pa tshiena-bualu tshia “Mudimu wetu wa tshijila ku Betele.” Bantu aba ba kumpala mu programe bavua bonso bena mu Kasumbu Kaludiki ka Bantemu ba Yehowa.

Bitupa bibidi bia programe biakalonda​—“Diakama makengela etu a didiundisha nzubu, 1974-1995,” ne “Malu manene mu diakajilula ne luibaku bia Betele ku Brooklyn”​—malu manene mazangika a luibaku anyi dipeta dia nzubu yakabanjijibua. Mumvuija akakoka ntema ku nzubu wa disombela mujikija matuku adi panshi aa mùdì bena Betele batue ku tshinunu basombele mpindieu. Nzubu eu wa disombela udi ne butumbuke bua mètre 115 mu musesu wa Sands nimero 90 mmulamate ku nzubu wa tshiapu.

Programe eu wakazangika muyuki wa dibanjija muenza kudi Milton Henschel, mulombodi wa Watch Tower Bible and Tract Society. Wakazangika malu menzeke ku kale a mu Bible avua atangila dibanjija dia nzubu ivuabu ne bua kutumika nayi mu mudimu wa Yehowa. Kunyima kua musambu dilondangana dia programe diakakomeshibua ne disambila dienza kudi Carey Barber, udi pende muena mu Kasumbu Kaludiki. Kadi ng’amue malu manene kayi akazangikibua mu programe eu?

Nzubu mibanjija

Mutangidi wa Nzubu ya Betele, George Couch, wakumvuija ne: nzubu ya disombela 17 mmisakidibue katshia ku dibanjija dia ndekelu dia nzubu wa disombela wa Betele ku Brooklyn mu dia 2 Lumungulu 1969.a Yoyi eyi ivua nzubu mipiamipia miibaka anyi nzubu ivua misumba ne miakajilula. Dibanjija edi divua bushuwa dia nzubu eyi 17 ya disombela, dia nzubu mikese ya bisasa ibidi​—misumba mu bidimu bia 1940 kadi mikudimuna bu nzubu ya disombela ya Betele—​pamue ne dia nzubu ya tshiapu ne biro ivua miibakibue anyi misumbibue katshia ku dibanjija dia biro bia bilombuelu bia mudimu bia Bantemu ba Yehowa mu dia 15 Luabanya 1982.b

Mutambe bunene ku nzubu yonso yakabanjijibua ng’eu udi mu musesu wa Furman nimero 360. Muibaka diambedi mu 1928, wakasumbibua kudi Bantemu ba Yehowa mu dia 15 Luabanya 1983, ne kukudimunyibua mu ka-bujima kende. Udi ne bualabale panshi bua mètre-carré 93 000, anyi pamue ne ektare 9. Nzubu mikuabu mikonga mu dibanjija edi ivua tshiapu tshia mu musesu wa Pearl nimero 175 ne bilaminu bia mashinyi binene bivua biibakibue mu bidimu bidi panshi ebi.

Bua tshinyi nzubu ya bungi idi ikengedibua

Mu 1969, pavua nzubu wa disombela wa ndekelu wa Betele wa Brooklyn mubanjijibue, kuvua bungi bubandile bua Bantemu 1 336 112 bavua bamanyisha lumu luimpe lua Bukalenge bua Nzambi pa buloba bujima. Kadi mu 1995 kuvua bantu 5 199 895 mu dienza mudimu eu, bungi bupite budi kuulu eku misangu isatu ne tshitupa! Nunku, bua kuakama dilomba didi dienda didiunda edi bua mikanda miumvuiji ya Bible, dîku dia Betele wa Brooklyn ndidiunde kumbukila ku benamu 1 042 ba pa tshibidilu mu 1969 bua kutua ku bantu bapite pa 3 360, badi mpindieu mu nzubu ya disombela 22!

George Couch wakakonkonona mushindu uvuabu bakame dikengedibua dia kusakidila nzubu mikuabu kumbukila ku 1974 too ne mu 1995. Ku ntuadijilu wa bidimu bia 1970, bisasa bivule mu Towers Hotel wa pabuipi bivua bifutshila kudi Bantemu ba Yehowa bua kuakama didiunda dia dîku dia Betele. Mu Tshisua-munene 1973, Nathan Knorr, uvua tshikondo atshi mulombodi wa Société Watch Tower, wakafundila Biro bia Betele ne balombodi ba Towers, wamba ne: Société uvua mupangadije bua ‘kupatuka ku Towers Hotel mu dia 1 Kasuamansense 1974.’

Muanetu Couch wakamba ne: wakakemeshibua bikole bualu kakuvua muaba mukuabu wa kuteka bena Betele bavua basombele mu Towers. Balombodi ba Towers bakakemeshibua pabu, bualu bavua batekemena mfranga ya difutshila nzubu ya Société bua kufutabu mabanza abu. Bu tshipeta tshia ndekelu, balombodi ba Towers bakalomba Bantemu ba Yehowa bua kusumba nzubu eu wa tshilala benyi. “Nudi nuenda nuvula amu kuvula katshia mene ku tshikondo tshituvua ku mutumba kuenu,” ke muakambabu, “ne nudi nukengela nzubu eu.”

“Mmuule tente ne bafutshidi,” ke muvua diandamuna dia baleji-mpala ba Société. “Bituasumba nzubu eu, netuikale ne bua kutekamu bantu betu nkayetu.”

“Netupatule bonso badi mu nzubu buenu,” ke muakalaya balombodi ba Towers. Ee, katupa kîpi pashishe Bantemu ba Yehowa bakasumba nzubu wa Towers ku mushinga mukumbanyine. “Bua tshinyi muanetu Knorr wakafunda mukanda au?” ke muakebeja Couch bateleji bakokibue ne ntema. “Kavua mumanye pamu’apa yeye muine, kadi ke tshintu tshiakafikisha ku dipanyisha Towers Hotel kudi Société Watch Tower.”

Ngamba-malu eu wakumvuija kabidi mushindu uvua Bantemu ba Yehowa basumbe nzubu wa mu Columbia Heights nimero 97, muaba uvua ku kale nzubu muende lumu wa Margaret Hotel, amu dinsambu dia njila kumbukila ku Nzubu wa Betele wa ku ntuadijilu. Muaba eu mmuimpe, bualu uvua mua kutuangajibua mu mushindu mupepele ne mulongo wa nzubu ya Betele pa kumbula njila mukosolole musesu muinshi mua buloba. Mu Luishi 1980, pakavua nzubu eu pa kukudimunyibua, wakuoshika yonso. Pashishe, bu muvua muenaye ne ntatu mivule bua kuibaka nzubu mupiamupia pa muaba eu, wakasumbisha buloba ebu kudi Bantemu ba Yehowa.

Muanetu Couch wakaleja ne: “Mbimueneke se: nzubu yonso wa ku nzubu eyi udi ne muyuki kampanda udi ukoka ntema munyima muende uvua uleja tshintu tshimue​—se: Yehowa Nzambi ke eu uvua ulombola bulongolodi budi bumueneka bua kupeta nzubu ayi ya pa buayi.”

Muyuki pa nzubu udi mu musesu wa Sands nimero 90

Nzubu wa disombela mupiamupia ne mualabale ku yonso ng’eu udi mu musesu wa Sands nimero 90. Pakasumbibua tshitupa etshi tshia buloba kudi Bantemu ba Yehowa mu Tshisua-munene 1986, tshivua ne tshiapu tshinene mu musesu wa Jay nimero 160.c Tshiapu etshi tshiakupudibua, ne mu dia 30 Tshimungu 1990, bakambila dîku dia Betele ne: dianyisha dikavua dipatula bua kuibaka nzubu wa disombela wa bisasa 30 pa muaba eu.

Mu diela nkonko kampanda dilombola kudi muena mu Kasumbu Kaludiki Theodore Jaracz, Max Larson, mutangidi wa tshiapu tshia Brooklyn tshia Société, wakumvuija mushindu wakapetshibua dianyisha bua diibaka dia nzubu wa disombela mu musesu wa Sands nimero 90. Bualu buvua buenzeke ku kale mu 1965, ke muakumvuija muanetu Larson, buvua bua mushinga mukole.

Tshikondo atshi Société uvua usua kuibaka tshiapu tshia bisasa dikumi kaba kamue pabuipi ne biapu biende bikuabu, kadi mikenji ya diibaka bua tshitupa atshi ivua yanyishila amu nzubu wa bisasa bibidi patupu. Mumanyi kampanda wa malu a diibaka wakitaba bua kuzola plan ya nzubu bua tshiapu tshipiatshipia tshivuabu basua kuibaka, kadi wakamba ne: “Tshiena musue kudikebela bilumbu pa kuleja plan eyi kudi komité.” Uvua mutuishibue se: Komité wa Mêyi-makulu ne Mapangadika kavua mua kushintulula nansha kakese mikenji yende pa bitupa bia buloba bua mulongo eu wa nzubu. Pakanyishabu plan ya diibaka, wakakema ne: “Mmushindu kayi unuvua bapete dianyisha edi!”

Kabingila, ke muakatungunuka Larson ne kuamba, kavua ka se: tshikondo tshiakatekibua mulongo awu wa nzubu mu mulongo mushilangane bua tshiapu tshietu tshia bisasa dikumi, milongo ya nzubu ya pabuipi yakashintuludibua payi mulongo, pa kukonga ne eu wa nzubu wa mu musesu wa Jay nimero 160. Ne, mu mushindu udi ukemesha, dishintulula dia milongo diakapetesha mushindu wa kuibaka nzubu wa tshilala benyi. Kadi, Larson wakaleja ne: bivua bualu kampanda buvua muntu nansha umue kayi mubambishe​—bidimu bu 25 pashishe, kunyima kua tuetu kutuadija kukeba muaba bua kuibaka nzubu wa Betele mupiamupia. Pashishe dîyi-diakaji pa malu a buloba diakafidibua tshiakabidi!

Muanetu Larson wakumvuija tshivua tshienzeke: “Patuakalongolola plan ya nzubu wetu wa disombela wa bisasa 30 ne kuya kuyileja ku tshibambalu tshia mianda ya luibaku, bakatuambila ne: ‘Kanuena mua kuikala ne nzubu wa kusombela muaba au. Mmuaba mulongolola bua biapu, ne kabakushintulula mikenji eyi buenu nuenu.’

“‘Kabena ne bua kuyishintulula,’ ke mutuakamanyisha banene. ‘Mmumana kulongolola bua nzubu wa tshilala benyi.’ Pakatangilabu rejistre, bakakemeshibua bikole! Ee, au ke mushindu utuakapeta nzubu wetu wa bisasa 30,” ke muakakomesha Larson.

Dibenesha dia kudi Yehowa ndimueneke

Mufundi kampanda wa misambu ya mu Bible wakafunda ne: ‘Bikala Yehowa kayi wasa nzubu, badi bamuasa badi bakuata mudimu eu patupu.’ (Musambu wa 127:1) Mbimueneke patoke se: dibenesha dia kudi Yehowa divua pa mudimu wa luibaku wa Bantemu ba Yehowa bua kupepeja mudimu wa pa buloba bujima wa diyisha ne dilongesha uvua Yezu mutumine balondi bende dîyi bua kuenza.​—Matayo 24:14; 28:19, 20.

Aba bavua ne disanka dia kulonda programe eu mu dia 18 Kabitende 1995, bakalengibua mutshima ku dimueneka patoke dia dibenesha dia mushindu’eu pa didiunda ku bilombuelu bia buloba bujima bia basadidi ba Yehowa. Bantu ba Yehowa badi mua kutekemena dibenesha diende ditungunuja eku batungunuka ne kuenza tshidiye ulomba.

[Mêyi adi kuinshi]

[Tshimfuanyi mu dibeji 23]

90 Sands St. • 1995

[Bimfuanyi mu mabeji 24, 25]

Imue ya ku nzubu ya disombela misakidila ivua mibanjijibue

97 Columbia Hts. • 1986

Bossert Hotel, 98 Montague St. • 1983

34 Orange St. • 1945

Standish Hotel, 169 Columbia Hts. • 1981

67 Livingston St. • 1989

108 Joralemon St. • 1988

Towers Hotel, 79-99 Willow St. • 1975

[Bimfuanyi mu dibeji 26]

175 Pearl St. • 1983

69 Adams St. • 1991

360 Furman St. • 1983