“Mmudimu wa Yehowa”

Ke tshivua mutu wa tshiena-bualu kampanda mu tshikandakanda tshia El Norte tshia mu tshimenga tshia Monterrey, mu Mexique. Tshiena-bualu etshi tshivua tshitangila Nzubu mupiamupia wa mpuilu wa Bantemu ba Yehowa.

Monterrey ntshimenga tshidi ne bantu 2 300 000 (pa kukonga ne misoko ya pabuipi) mu tshitupa tshia ku Nord wa Mexique, ne tshidi ne bamanyishi ba Bukalenge 19 200. Munkatshi mua tshidimu bu tshimue ne ndambu, Bantemu aba bakasangisha madikolela abu bua kuibaka Nzubu wa mpuilu mulengele ne mupepele bua kutumika nende udi ne miaba mimpe ya kusomba 3 000 ne biamu bia difila kapepe katalale. Bantemu ba pa muaba eu bakasangala pakenza umue wa ku bena mu Kasumbu Kaludiki ka Bantemu ba Yehowa muyuki wa dibanjija. Programe uvua ukonga dilonda mu mêyi makese muyuki wa mudimu mu Monterrey, ne kuvua dielangana nkonko ne aba bavua badisangishe mu diibaka. Pashishe bantu 4 500 bakabuela mu tshisangilu bakateleja muyuki wa dibanjija.

Nzubu eu udi muisatu ku Nzubu ya mpuilu mipiamipia idi miibakibue mu Mexique mu tshiakumvuijibua bu kampanye ka “Nzubu ya Bukalenge ne Nzubu ya mpuilu mitambe bunene, ne mitambe bulengele.”

Ne bamanyishi bapite pa 443 000 mu Mexique, ne bantu 1 492 500 bakabuela mu Tshivulukilu mu 1995, Nzubu ya mpuilu mipiamipia, bu mudi eu wa ku Monterrey, neasadile bushuwa dilongolola dia Nzambi.