Bamanyishi ba Bukalenge badi balonda

Bukole bushintuludianganyi bua Dîyi dia Nzambi

KU DITONDA diende yeye muine, uvua misangu yonso ‘mupendi wa Nzambi ne mukengeshi wa bantu bende ne muena luonji kudibu.’ (1 Timote 1:13) Kadi wakashintuluka! Bualu dishintuluka dia mupostolo Paulo divua ditambe bunene diakamufikisha kunyima ku diamba ne: ‘Nuikale bidikiji banyi, bu mundi meme muidikiji wa Kristo.’​—1 Kolinto 11:1.

Lelu’eu, nkama ya binunu ya batendeledi bena muoyo mululame pa buloba bujima badi benda benza mashintuluka a muomumue. Ntshinyi tshidi tshibapetesha mushindu wa kuenza nunku? Badi bapukila dimanya dia Dîyi dia Nzambi ne baditumikila mu nsombelu yabu. Bualu buenzeke budi bulonda ebu budi buzangika bukole bushintuludianganyi bua Dîyi dia Nzambi.

Mu Slovenie bena dibaka kampanda babidi bakulakaje bavua baditole kule ne musoko kansanga. Mulume, Jože, uvua ne bidimu bitue ku 60 ne uvua ne lutatu lukole lua dikuatshika maluvu. Nansha nanku, uvua utabalela mukajende muena bubedi, Ljudmila. Dimue edi bamanyishi babidi ba Bukalenge bakaya kudiye. Wakalomba Bantemu aba bua kubuelabu mu nzubu muende, muakapetabu mukajende. Pa kumvua mukenji wa Bukalenge, binsonji bia disanka biakapueka pa mpala wa Ljudmila. Jože wakasanka pende bua biakumvuaye ne kuela nkonko ya bungi. Kunyima kua difila mikanda miumvuiji ya Bible kudi bena dibaka aba babidi, Bantemu aba bakumbuka.

Ngondo umue kunyima Bantemu aba bakapeta mushindu wa kupingana, ne kumonabu mukanda wa Udi mua kuikala ne muoyo wa kashidi pa buloba bukudimuna mparadizu muteka pa mesa. Pakamuebejabu muaba uvuaye muupetele, Jože wakamba ne: “Mvua mumone dimanyisha kampanda panyima pa dibeji dia tshimue tshia ku bibejibeji binuvua banshiile. Nunku ngakafundila biro bienu mu Zagreb ne kulomba mukanda eu.” Pa kumona dijinga diende dia kumanya bivule, wakalombibua bua kubuelaye mu Tshivulukilu tshia lufu lua Yezu tshivua ne bua kulua tshiakenjibua mu Nzubu wa Bukalenge. Bualu buakasankisha Bantemu, wakalua!

Katupa kîpi kunyima dilonga dia Bible diakatuadija, ne dilubuluka dimpe diakamueneka. Tshilejilu, pakalejabu Jože mu Bible ne: ‘kudisongedi lupingu . . . kubinaminyi, kubitendeledi,’ wakasangisha diakamue bimfuanyi bionso bia malu a Nzambi bivua mu nzubu, pa kukonga ne tupingu, ne kubimansha.​—Ekesode 20:4, 5.

Nyota ya Jože bua bulelela bua mu nyuma ivua yenda ijika. Kadi, bia dibungama, utshivua ne nyota mikuabu. Mu bule bua bidimu bitue ku 18, uvua unua litre ya mvinyo mitue ku 10 ku dituku. Bua lutatu luende lua dinua, kavua utamba kutabalela mmuenekelu wende yeye muine. Kadi kunyima kua dilonga mmuenenu wa Nzambi pa ditumika bibi ne maluvu, wakapangadija bua kushintuluka.

Wakenza madikolela bua kutshimuna lutatu luende lua dinua ku kakese ku kakese, pa kukontolola bungi bua maluvu avuaye unua ku dituku. Katupa kîpi kunyima katshivua kabidi mupika wa mvinyo. Mu bule bua malonga ende a Bible, wakalonga kabidi ne: bena nkristo balelela mbalombibue bua kuikala ne mankenda a mubidi. Nunku, wakapesha Bantemu mfranga ne kuamba ne: “Ee, ndayi nusumbe bivualu kayi bionso bindi nkengela bua kuikala ne mmuenekelu muimpe mu bisangilu bia bena nkristo ne mu mudimu wa budimi!” Bantemu bakalukila ne bilamba bia muinshi, nsheshete, bisabata, mitelu, kostime, tulavuanda, ne tshibuta.

Kunyima kua dilonga Bible munkatshi mua tshidimu tshijima, Jože ne Ljudmila bakakumbaja malu malomba bua kupatuka ne Bantemu ba Yehowa mu mudimu wa buambi bua ku nzubu ne ku nzubu. Ngondo isatu kunyima bakaleja tshimanyinu tshia diditshipa diabu kudi Nzambi ku batismo wa mâyi ku mpuilu kampanda wa distrike wa Bantemu ba Yehowa. Nansha muvuaye mukulakaje ne muena bubedi, Jože uvua udifila pa tshibidilu mu buambi bua lumu luimpe ne pashishe, too ne ku lufu luende mu Lumungulu 1995, uvua utumika ne lulamatu luonso bu musadidi wa mudimu mu tshisumbu. Mamuma mimpe makuama mu nsombelu wa mulume eu mudipuekeshi ne mukajende adi afila bujadiki pa bukole bushintuludianganyi bua Dîyi dia Nzambi!