Dikubibua dilelela​—Tshipatshila tshikole bua kukumbaja

ARNOLD uvua muana kampanda uvua munange bikole nkashama wende wa bilamba. Muaba kayi wonso uvuaye uya, uvua umutuala​—ku dinaya, ku mesa dîba dia didia, ku bulalu buende. Buende yeye, nkashama eu uvua upetesha disambibua, dikubibua. Dimue edi, kuvua dikondakana dia malu. Nkashama wakajimina!

Bu muvua Arnold udila, mamuende, tatuende, ne ba-tutuende basatu bakakebulula mu nzubu wabu mualabale bua kumona nkashama eu. Umue wa kudibu wakamumona ndekelu wa bionso mu kabadi. Mbimueneke se: Arnold uvua mumuteke muaba au ne pashishe kupua diakamue muoyo muaba uvuaye. Bakamupesha nkashama eu, ne Arnold wakakupula binsonji biende ku mêsu. Wakumvua tshiakabidi milowo ne dikubibua.

Mmushindu kayipu uvuabi mua kuikala bilenga bu ntatu yonso mua kujikijibua mu mushindu mupepele nunku​—mupepele bu kumona nkashama wa dinaya mu kabadi! Kadi, bua bantu ba bungi, bunene ne bujingakane bia ntatu ya dikubibua mbipite apu ne kule. Muaba bu wonso, bantu badi badiebeja ne: ‘Nempetangane ne buenzavi peshi tshinyangu anyi? Ndi mu njiwu ya dilua mulofo anyi? Dîku dianyi ndijadike muikaladi ne biakudia bikumbanyine anyi? Bakuabu nebangepuke bua tshitendelelu tshianyi peshi nshidimukilu wanyi wa tshisa anyi?’

Bungi bua bantu badi bapange dikubibua mbuvulavulayi. Bilondeshile Matunga Masanga, miliyare bu isatu ya bantu mbapange ki ng’anu mushindu wa kudiondapisha bua masama adi matangalake kuonso kadi kabidi ne manga adi akengedibua. Bantu bapite pa muliyare mujima mbapele ba kalanda musenga. Pabuipi ne muliyare, nansha mudibu bakumbane mua kutumika, ki mbangata ku mudimu mu mushindu wa kupatula bipeta. Bungi bua bena tshimuangi budi buenda buvula. Ku ndekelu kua 1994, muntu bu 1 pa 115 pa buloba bujima uvua mubambidika bua kumuangala. Miliyo ya bantu badi banyangibua bu tshipeta tshia bungenda bua miliyare 500 ya dolare ku tshidimu bua bintu bia lulengu budi bukebesha buenzavi ne tshinyangu bikena kubadika. Mvita idi ibutula mioyo ya miliyo mivule. Munkatshi mua tshidimu tshia 1993 nkayatshi, matunga 42 avua maditue mu mvita minene, eku makuabu 37 akamangana ne tshinyangu tshia malu a tshididi.

Mvita, bupele, buenzavi, ne njiwu mikuabu kabidi bua dikubibua dia bantu mbisuikakaja, ne bungi buabi budi buenda buvula. Kakuena dijikija difuane dimona dia nkashama mu kabadi bua ntatu ya mushindu’eu. Bushuwa, bantu kabakuyijikija yonso nansha.

“Kanueyemenyi baminyampala, anyi muana wa muntu, unudi kanuyi mua kusangana dikuatshisha kudiye,” ke mudi Dîyi dia Nzambi, Bible, didimuija. Nunku, nnganyi utudi mua kueyemena? Mufundu eu udi utungunuka ne: ‘Disanka didi kudi muntu udi ne dikuatshisha diende kudi Nzambi wa Yakoba, udi ne ditekemena diende mu Yehowa Nzambi wende, wakafuka diulu ne buloba, mâyi manene ne bintu bionso bidimu.’​—Musambu wa 146:3-6.

Bua tshinyi tudi mua kueyemena Yehowa bua kufikisha dikubibua pa buloba ebu? Kudiku mushindu wa kulabula nsombelu wa dikubibua ne disanka mpindieu anyi? Mmunyi mumbusha Nzambi bipumbishi bia dikubibua dia bantu?