Dikubibua dilelela​—Mpindieu ne bua kashidi

KAKUENA mpata pa muanda wa se: Yehowa Nzambi udi mua kupetesha bantu bende dikubibua dilelela. Udi “Wa-Bukole-Buonso.” (Musambu wa 68:14, NW) Dîna diende dia pa buadi didi diumvuija “Udi uvuija.” Ebi bidi bimusunguluja bu Eu umuepele mu bukua-mabulunge udi mukumbane bua kutshimuna tshipumbishi kayi tshionso bua kukumbaja malaya ende ne disua diende. Nzambi yeye muine udi wamba ne: “Ke mudi muaku udi upatuka mukana muanyi; kawena upingana kundi tshianana kauyi muanji kukumbaja tshindi musue, kauyi muenze bualu bundi muutumine.”​—Yeshaya 55:11, MMM.

Nzambi udi upetesha aba badi bamueyemena dikubibua. Dîyi Diende didi dijadika bualu ebu. ‘Dîna dia Yehowa didi tshibumba tshikole,’ ke muakamba Mukalenge muena meji Solomo ku buenzeji bua spiritu wa Nzambi. “Muntu muakane udi unyemenaku, udi upanduka.” Wakasakidila ne: ‘Udi weyemena Yehowa neapanduke.’​—Nsumuinu 18:10; 29:25.

Dikubibua bua basadidi ba Nzambi

Yehowa utu misangu yonso upetesha aba badi bamueyemena dikubibua. Tshilejilu, muprofete Yelemiya wakapeta dikubibua dia Nzambi. Pakajingila biluilu bia Babilone Yeruzaleme mutontolodi, bantu bavua ne bua ‘kudia bidia biabo bilonda tshipiminu ne bakuatshika buôwa.’ (Yehezekele 4:16) Bu muakatamba kukolakana nsombelu, bamue bakaji bakafika too ne ku ditumpa ne didia bana babu bine. (Muadi wa Yelemiya 2:20; 4:10) Nansha muvua Yelemiya muedibue mu buloko bua buambi buende bua bukitu, ku ditabalela dia Yehowa, “dituku dionso bavua bamupesha mukata wa diampa, uvuabo bamuenzela mu musesu wa balambi ba mampa, too ne pakajika mampa onso a mu tshimenga.”​—Yirmeya 37:21, MMM.

Pakakuatshibua Yeruzaleme kudi bena Babilone, Yelemiya kakashipibua peshi kutuadibua bu mupika ku Babilone. Bishilangane, “Mutangidi [muena Babilone] wa balami ba mfumu kumupesha biakudia ne milambo, kumulekelaye bua aye.”​—Yirmeya 40:5, MMM.

Siekele mivule pashishe Yezu Kristo wakajadikila basadidi ba Nzambi ne: “Lekelayi kutata ne: netudie tshinyi? netunue tshinyi? nansha ne: netuvuale tshinyi? Bionso abio, bantu ba bisamba bikuabo ke badi babikeba. Kadi Tatuenu udi mu diulu mmumanye ne: nudi nukengela bionso abio. Bangabanga kebayi Bukalenge bua Diulu ne buakane [buende, NW]; bikuabo bionso abio nebanusakidilebio.”​—Matewuse 6:31-33, MMM.

Ebi bidi biumvuija ne: basadidi ba Yehowa nebapete dikubibua dia kudi Nzambi ku bipupu bionso bia matuku adi panshi aa anyi? Tòo, ki nnanku to. Bena lulamatu ki mbepula ku njiwu nansha. Bena nkristo balelela batu basama, bakamangana ne dikengeshibua, bapetangana ne buenzavi, bafua ku njiwu, ne bakenga mu mishindu mikuabu.

Nansha mudi Yehowa kayi muanji kupetesha dikubibua dijima ku njiwu, luapolo idi ileja ne: udi utumika ne bukole buende bua kukumbaja majinga a basadidi bende ne kubakuba. Bena nkristo mbakuba kabidi ku ntatu ya bungi bualu badi batumikila mêyi-maludiki a mu Bible mu nsombelu wabu. (Nsumuinu 22:3) Kupita apu, badi balabula dikubibua dia nsangilu wa pa buloba bujima wa bana betu ba balume ne ba bakaji bena dinanga, badi bambuluishangana mu bikondo bia dikenga. (Yone 13:34, 35; Lomo 8:28) Tshilejilu, mu diandamuna ku nsombelu mukuate luse wa bana babu mu Rwanda musunsula kudi mvita, Bantemu ba Yehowa ku Mputu bakafila ne lukasa luonso mapa ne kutuma tone 65 ya bilamba ne manga, biakudia, ne bintu bikuabu bia mushinga wa dolare 1 600 000.​—Fuanyikija ne Bienzedi 11:28, 29.

Nansha mudi Yehowa ulekela bena nkristo balelela bapetangana ne mateta, badi ne dieyemena se: neabapeteshe bukole, dikuatshisha, ne meji bua kuatantamena. Mu difundila bena kuitabuja nende, mupostolo Paulo wakamba ne: “Kanuena bapetangane ne mateyi [mateta] mashilangane ne adi matangalake kudi bantu. Kadi Nzambi udi muena lulamatu, ne kakulekela nuteyibua [nutetshibua] bipitshidile tshinudi mua kuakama ne lutulu, kadi tshiapamue ne ntebela [matetshibua] neapeteshe tshipatukilu bua numone mua kutantamena.”​—1 Kolinto 10:13; The Emphatic Diaglott.

Tshidi Nzambi wenza bua bantu bende

Lelu’eu, miliyo ya bantu badi bumvua milowo bua kuenza disua dia Nzambi. Kabena babambidika bua kusadila Nzambi; badi benza nunku bualu mbamumanye ne mbamunange. Ku luende luseke, bualu Yehowa mmunange basadidi bende bena lulamatu, mmulongolole bua kukudimuna buloba mparadizu mualabula bukua-bantu bena butumike ditalala, makanda a mubidi, ne dikubibua bua kashidi.​—Luka 23:43.

Nzambi neenze nunku ku diambuluisha dia mbulamatadi kampanda wa mu diulu, udi ne Mukalenge wende muteka, Yezu Kristo, bu Mulombodi wabu. (Danyele 7:13, 14) Bible udi ufunkuna mbulamatadi eu bu “Bukalenge bua Nzambi” ne bu “bukalenge bua mu muulu.” (1 Kolinto 15:50; Matayo 13:44, NW) Bukalenge bua Nzambi nebupingane mbulamatadi yonso ya bantu. Pamutu pa kuikalaku mbulamatadi ya bungi pa buloba, nekuikale anu mbulamatadi umuepele. Nealombole buloba bujima mu buakane.​—Musambu wa 72:7, 8; Danyele 2:44.

Yehowa udi utangalaja kudi bonso dibikila dia kuikala ne muoyo muinshi mua Bukalenge ebu. Mushindu umue udiye wenza nunku nku diambuluisha dia diabanya dialabale dia Bible, mukanda udi umvuija tshialua Bukalenge ebu kuenzela bukua-bantu. Bible mmukanda ùdì mutambe kumuangalajibua pa buloba bujima, ne udi mpindieu mua kupetshibua, mujima anyi tshitupa, mu miakulu mipite pa 2 000.

Yehowa Nzambi udi ne dinanga dionso wambuluisha bantu bua kujingululabu tshidi Bible ulongesha pa bidi bitangila Bukalenge ebu. Udi wenza nunku pa kushidimuna ne kutuma bantu bua kumvuijabu Mifundu kudi bakuabu. Bantemu ba Yehowa bapite pa miliyo itanu badi mpindieu bamanyisha lumu luimpe lua Bukalenge bua Nzambi mu matunga mapite pa 230.

Dikubibua dilelela mbua bonso anyi?

Muntu yonso neandamune bilenga ku dibikila dia kulua mukokedi wa Bukalenge bua Nzambi pa kutumikila mêyi-makulu ende a buakane anyi? Tòo, bualu bantu ba bungi kabena baditatshisha bua kuenza disua dia Nzambi. Badi babenga kuanyisha madikolela menza bua kubambuluisha bua kuakajabu nsombelu wabu. Bushuwa, badi badileja buobu bine mudibu bafuane aba bavua Yezu muakule bualu buabu ne: “Muoyo wa bantu aba udi mupape, mbajibike matshio, babuikile mesu, bua mesu abo kaamonyi, matshio abo kaumvu, mioyo yabo kayijinguludi, kabakudimunyi muoyo wabo, bua tshibondapi.”​—Matewuse 13:15, MMM.

Mmunyi mudiku mua kuikala dikubibua dilelela pa buloba munkatshi mua aba badi babenga kuikala ne nsombelu udi mu diumvuangana ne njila ya buakane ya Nzambi? Kadiena mua kuikalaku nansha. Bantu bakena batshinyi ba Nzambi badi bateka dikubibua dia aba badi basue bua kusadila Yehowa mu njiwu.

Nzambi kêna wenzeja bantu ku bukole bua kushintulukabu, kadi nansha nanku kakulekelela bubi tshiendelele. Nansha mudi Yehowa mutungunuke ne lutulu ne kutuma Bantemu bende bua kulongesha bantu pa bidi bitangila njila yende ne malongolola ende, kakutungunuka ne kuenza nunku bua mutantshi mutambe bule. Yezu Kristo wakadianjila kumanyisha ne: “Lumu luimpe elu lua bukalenge nelumanyishibue pa buloba bujima budi bantu bâse, neluikale tshimanyinu bua matunga onso; apu, ke nshikidilu kushishaye kulua.”​—Matayo 24:14, NW.

“Nshikidilu” neumvuije tshinyi bua aba badi babenga mêyi-makulu a Nzambi? Neumvuije dilumbuluishibua diabu dia dipiishibua ne dibutudibua. Bible udi wakula bua divuijibua dia “didisombuela pa bantu badi kabayi bamanye Nzambi ne pa aba badi kabayi batumikila lumu luimpe ludi lutangila Mukalenge wetu Yezu. Buobu aba nebapetangane ne dinyokibua dia bunzuji dia dibutudibua dia kashidi.”​—2 Tesalonike 1:6-9, NW.

Ndekelu wa bionso​—Dikubibua dilelela bua kashidi!

Kunyima kua dibutudibua dia aba badi babenga njila ya Yehowa ya ditalala, Bukalenge bua Nzambi nebutuadije tshikondo tshia butumbi tshia dikubibua bua diakalenga dia bantu bakane pa buloba. (Musambu wa 37:10, 11) Ndishilangana kayipu dikala pankatshi pa bulongolodi abu bupiabupia ne ebu butudi basombele lelu’eu!​—2 Petelo 3:13.

Biyole ne nzala kabiakuikalaku kabidi. Muntu yonso neikale ne biakudia bivule. Bible udi wamba ne: ‘bantu bonso nebikale ne biakudia bia disanka bia manyi.’ (Yeshaya 25:6) Kakuakuikala dipangika dia biakudia, bualu ‘blé neikale mivule pa buloba, too ne pa mitu pa mikuna.’​—Musambu wa 72:16.

Bantu kabakusombela kabidi mu bitandatanda ne bizubuzubu. Muinshi mua Bukalenge bua Nzambi, bonso nebikale ne nzubu milenga, ne nebadie biakudia bidima mu mpangu yabu bine. Bible udi ulaya ne: ‘Nebase nzubu, nebashikamemu; nebatentule mionji ya tumuma tua mvinyo mu madimi, nebadie tumuma tuayi.’​—Yeshaya 65:21.

Pamutu pa ditangalaka dia bulofo, nekuikale mudimu mulenga, ne bantu nebapeteleku bipeta bimpe. Dîyi dia Nzambi didi diamba ne: ‘Bantu banakasungula nebasanke musangu mule mu mudimu wa bianza biabu. Kabena bakuata mudimu wabu patupu.’​—Yeshaya 65:22, 23.

Muinshi mua bukokeshi bua Bukalenge, bantu kabakukenga ne kufua bua masama. Dîyi dia Nzambi didi ditujadikila ne: “Musombi nansha umue kakuamba ne: ‘Ndi nsama.’”​—Yeshaya 33:24, NW.

Mu Mparadizu eu wa pa buloba ukaadi pa kulua mu katupa kîpi emu, dikenga ne bisama, dibungama ne lufu, nebijike. Eyowa, nansha lufu! Bantu nebikale ne muoyo wa kashidi mu Mparadizu! Bible udi utuambila ne: Nzambi “neakupule tshinsonji tshionso ku mêsu abu, ne lufu kaluakuikalaku kabidi, nansha madilu, nansha mbila, nansha bisama kabiakuikalaku kabidi. Bintu bia kale biajiminyi.”​—Buakabuluibua 21:4, NW.

Muinshi mua bukokeshi bua Yezu Kristo, “Muana wa mfumu mufidi wa ditalala,” nsombelu pa buloba neikale ndekelu wa bionso wa dikubibua dilelela. Bushuwa, dikubibua dia buloba bujima nedikaleku muinshi mua bukokeshi buakane, ne bua dinanga bua mbulamatadi umuepele​—Bukalenge bua Nzambi.​—Yeshaya 9:6, 7, NW; Buakabuluibua 7:9, 17.

[Lungenyi lunene lua mu dibeji 4]

“Dikubibua dia bantu didi diumvuija kueyemena matuku atshilualua, . . . [kueyemena] bushindame bua nsombelu wa malu a tshididi ne a bubanji.”​—Mukaji kampanda udi musombele mu Azi

[Lungenyi lunene lua mu dibeji 5]

“Tshidi tshitamba kuenza bua udiumvue mupange dikubibua ntshinyangu ne dibunda dia bibawu.”​—Mulume kampanda udi musombele mu Amerike wa ku Sud

[Lungenyi lunene lua mu dibeji 6]

“Tshivua ndiumvua mukubibue munkatshi mua . . . dibundangana. Bikala ditunga kampanda mu mvita, mmunyi mudi bantu mua kudiumvua bakubibue?”​—Muana mutekete muena kalasa kapuekele mu Moyen-Orient

[Lungenyi lunene lua mu dibeji 7]

“Nendiumvue mukubibue pangikala mumanye se: ndi mua kuenda mu misesu butuku kakuyi dinyangibua.”​—Mulongi muana mutekete wa bakaji mu Afrike