Bakenza disua dia Yehowa

Muana mutekete wa bakaji uvua muakule ne dikima

MUNKATSHI mua siekele wa dikumi K.B.B., malanda avua anu a buluishi pankatshi pa Izalele ne Syrie. Dibundangana mvita ke divua ditangalake ne pavuaku kupita bidimu bisatu kakuyi tshinyangu, bivua muanda munene mu miyuki yabu.​—1 Bakelenge 22:1.

Njiwu ivua itamba kufumina mu bikondo abi nangananga ku bisumbu bia bapawudi bena Syrie, bimue bienza kudi nkama ya basalayi. Baluanganyi aba bavua mua kubuelela bena Izalele ne kubapawula, pa kukuata ku bukole ne kuvuija bavule bapika​—too ne bana.

Mu dibuela diabu kampanda, bakabuluja ‘nsongakaji mukese’ kansanga kakuyi luse ne dîku diende ditshinyi dia Nzambi. (2 Bakelenge 5:2) Pakayabu nende ku Syrie, wakenzejibua bua kusombela munkatshi mua aba bavua pamu’apa bamufikisha ku diumvua buôwa ne bavuaye kayi muibidilangane nabu​—tshisamba kampanda tshivua tshitendelela dîba, ngondo, mitoto, mitshi, bikunyibua, too ne mabue. Mmunyipu muvuabu bashilangane ne bena mu dîku diende ne balunda bende, bavua batendelela Nzambi umue mulelela, Yehowa! Kadi, nansha mu tshinsanga etshi tshia benyi, muana wa bakaji eu wakaleja dikima dia pa buadi pa bidi bitangila ntendelelu wa Yehowa. Bu tshipeta, wakashintulula nsombelu wa mfumu kampanda munene uvua usadila muinshi mua bukokeshi bua mukalenge wa Syrie. Tuanjayi kumona muvuabi bienzeke.

Dikima dia kuakula patoke

Muana mutekete eu wa bakaji ki mbatele dîna diende mu muyuki wa mu Bible. Wakalua musadidi wa mukaji wa Namana, mfumu wa tshiluilu muena bukitu muinshi mua bukokeshi bua Mukalenge Ben-hadad II. (2 Bakelenge 5:1) Nansha muvuaye unemekibua bikole, Namana uvua ne disama dibi dia nsudi.

Pamu’apa ngikadilu wa kanemu wa muana eu wa bakaji wakasaka mukaji wa Namana ku dikala ne dieyemena kudiye. Mukaji eu uvua mua kuikala muebeje muana wa bakaji ne: ‘Ntshinyi tshitubu benzela bena nsudi mu Izalele?’ Muana wa bakaji eu muena Izalele kakafua bundu pa kuamba ne dikima dionso ne: ‘Bu mukalenge wanyi muikale [kumpala kua, NW] muprofete udi mu Samariya, yeye uvua mua kumuondapa disama diende dia nsudi.’​—2 Bakelenge 5:3.

Mêyi a muana eu wa bakaji kaakalenguludibua bu difuikakaja dia lungenyi dia buana. Bishilangane, bakaamanyisha Mukalenge Ben-hadad, wakatuma Namana ne bakuabu mu luendu lua kilometre 150 ku Samariya bua kukeba muprofete eu.​—2 Bakelenge 5:4, 5.

Diondapibua dia Namana

Namana ne bantu bende bakaya kudi Mukalenge Yoram wa Izalele, pa kutuala mukanda wa dibabueja nawu mufunda kudi Ben-hadad ne dipa divumvuke dia lupetu. Kabiyi mua kukemesha, Mukalenge Yoram mutendeledi wa kana ka ngombe kakaleja ditabuja divua muana wa bakaji musadidi muleje kudi muprofete wa Nzambi. Bishilangane, wakela meji ne: Namana uvua mulue kumutekela diyoyo. Pakumvua muprofete wa Nzambi Elisha dielelangana meji mabi edi dia Yoram, wakatuma diakamue mukenji ulomba bua mukalenge atume Namana ku nzubu kuende.​—2 Bakelenge 5:6-8.

Pakafika Namana ku nzubu kua Elisha, muprofete eu wakamutumina muntu pambelu bua kumuambila ne: ‘Uye udine mu mâyi a Yordane misangu muanda-mutekete, mubidi webe neupingane muawu mua kale.’ (2 Bamfumu 5:9, 10, MMM) Namana wakafiika munda bikole. Mutekemene dileja kampanda dia mu tshishima ne dìdì bantu mua kuanyina, wakakonka ne: ‘Musulu wa Abana ne wa Parpare idi mu Damase, kayena mipite mâyi onso a mu Izalele anyi? Tshiena mua kuowamu bua kunkezulabo anyi?’ Namana wakumbuka ku nzubu wa Elisha ne tshiji tshikole. Kadi pakalua basadidi ba Namana kuelangana nende meji, wakanyisha ndekelu wa bionso. Kunyima kua didiina misangu muanda-mutekete mu musulu wa Yordane, “mubidi wende kupingana muawu mua kale bu wa muana mutekete.”​—2 Bamfumu 5:11-14, MMM.

Upingana kudi Elisha, Namana wakamba ne: ‘Katataka ndi mumanye ne: kakuena Nzambi mukuabu pa buloba buonso anu mu Izalele.’ Namana wakenza mutshipu se: kavua kabidi ne bua ‘kufila mulambu kudi nzambi mikuabo, anu kudi Yehowa.’​—2 Bakelenge 5:15-17.

Malongesha buetu

Namana kavua mua kuikala muye kudi muprofete Elisha bu muana wa bakaji eu musadidi kayi muakule patoke ne dikima dionso. Lelu’eu, bansonga bavule badi benza mushindu wa muomumue. Mu kalasa, badi mua kuikala banyungulula kudi balongi badi kabayi banyisha bua kusadila Nzambi. Nansha nanku, badi bakula patoke pa bidibu bitabuja. Bamue ba kudibu badi batuadija kuenza nunku patshidibu batekete menemene.

Tangila Alexandra, muana kampanda wa bakaji wa bidimu bitanu mu Australie. Pakatuadijaye kalasa, mamuende wakadilongolola bua kumvuija mulongeshi mitabuja a Bantemu ba Yehowa. Kadi mamuende wa Alexandra wakakemeshibua. “Nkadi mumane kumanya bungi kampanda bua mitabuja enu, pamue ne malu ikala Alexandra mua kuenza anyi kubenga kuenza mu kalasa,” ke muakamba mulongeshi. Mamuende wa Alexandra wakakemeshibua bikole, bualu kakuvua bana bakuabu Bantemu mu kalasa aku. “Alexandra mmutumanyishe mitabuja ende,” ke muakumvuija mulongeshi. Eyowa, muana wa bakaji eu mukese ukavua mumane kuenza diyukidilangana dia kanemu ne mulongeshi wende.

Bana ba mushindu’eu badi bakula patoke ne dikima dionso. Badi benza nunku mu diumvuangana ne Musambu wa 148:12, 13 (NW): “Nuenu bansongalume ne kabidi nuenu bansongakaji, nuenu bantu banunu pamue ne bana ba balume. Basamune dîna dia Yehowa, bualu dîna diende nkayadi didi kuulu kudi kakuyi kufika. Bunême buende budi ku mutu kua buloba ne diulu.”