Bamanyishi ba Bukalenge badi balonda

“Bantu bebe badi badifila kûdi ne disanka”

NÂMANA, mfumu wa bukole wa tshiluilu tshia bena Siriya udi ne nsudi. Disama edi dibi diodi kadiyi diondapa, didi mua kufikisha muntu ku dinyanguka kuisu ne ku lufu. Ntshinyi tshidi Nâmana ne bua kuenza? Munkatshi mua bena mu nzubu mua Nâmana mudi muana mutekete wa bakaji, ‘mupika mufume nende ku buloba bua Izalele.’ Ne dikima dionso udi wakula patoke ne uleja ne: muprofete Elisha ke muntu udi mua kuondopa Nâmana.​—2 Bakelenge 5:1-3.

Bua dikima dia muana wa bakaji eu, Nâmana udi ukeba Elisha ne badi bamondopa. Kusakidila apu, Nâmana udi ulua mutendeledi wa Yehowa! Bualu bumona ebu, bufunda mu Bible, buakenzeka mu siekele wa dikumi K.B.B. (2 Bakelenge 5:4-15) Lelu, bana bavule badi baleja dikima dia muomumue mu diakula patoke bua bipatshila bia Bukalenge. Bualu bumona budi bulonda ebu bua mu ditunga dia Mozambique budi bujadika muanda eu.

Nuno muana wa bidimu bisambombo mmumanyishi wa lumu luimpe ukena mutambule. Kumpala mene kua kuluaye mumanyishi ukena mutambule, Nuno uvua unguija bana ba pabuipi nabu, wenza disambila, ne ubalongesha Bible, pa kutumika ne mukanda wa Miyuki ya mu Mukanda wa Nzambi.

Misangu mivule Nuno utu ubika kumpala kua dîba mu Disambombo mu dinda ne uvuluija dîku diabu ne: “Lelu tudi tupatuka mu mudimu wa budimi.” Lukunukunu luende bua mudimu ludi lumueneka mu mishindu mikuabu. Padiye ufila baledi bende mu mudimu wa mu misesu mu Maputo, misangu mivule Nuno utu uyukila ne bantu pa nkayende. Umue musangu, ngenda kampanda wakalua kudiye e kumuebeja ne: “Bua tshinyi udi usumbisha bibejibeji ebi?” Nuno wakamba ne: “Tshiena nsumbisha bibejibeji, kadi ndi ngitaba mapa bua kuambuluisha mudimu wa diyisha ne mfranga.” Ngenda eu wakandamuna ne: “Nansha mudibi kabiyi binsankisha, mmuenenu ne nzanzu yebe bidi binkemesha. Ndi musue kufila dipa bua mudimu eu.”

Musangu mukuabu, Nuno wakayukila ne munga muntu mu musesu ne wakamupesha mukanda wa La paix et la sécurité véritables: Comment est-ce possible? Muntu eu wakebeja ne: “Kutu ulonga mu tshilongelu tshiatshia anyi?” Nuno wakandamuna ne: “Eyowa, ntu ndongamu, kadi lelu ndi mmanyisha mukenji wa mushinga wa mu mukanda eu. Udi ukuleja ne: udi mua kuikala ne muoyo mu bulongolodi bupiabupia buateka Nzambi, bu mudibi bileja pa tshimfuanyi mu mukanda eu.” Nuno kakajingulula ne: muntu uvuaye wakula nende uvua mulongeshi wa mu tshilongelu tshiabu nansha. Mulongeshi eu kakitaba anu mukanda patupu kadi mpindieu udi upeta kabidi pa tshibidilu bibejibeji bia Tshibumba tshia Nsentedi ne Réveillez-vous! kudi Nuno.

Patubu bakonka Nuno bua tshinyi mmusue kudifila mu mudimu wa diyisha, utu wamba ne: “Ndi musue kuakula ne bantu ne kubalongesha pa bidi bitangila Yehowa ne Muanende Yezu Kristo.” Udi usakidila ne: “Ne bikala bantu kabayi basue kuteleja, kakuena tshia kunyingalela.”

Pa buloba bujima, bana binunu bivule bu Nuno “badi badifila ne disanka” bua kulongesha ne kuyisha pa bidi bitangila Bukalenge bua Nzambi. (Musambu 110:3) Kadi bualu ebu kabuena buenzeka mu mpukapuka. Baledi badi balongesha bana babu pa bidi bitangila Yehowa kubangila ku buana, badi bafila tshilejilu tshimpe mu mudimu, ne balonda ne lukunukunu luonso bipatshila bia Bukalenge nebabeneshibue bikole.