Nkuepi kudibu bapetela bukole buabu?
BIWATANGILA bimpe tshibeyibeyi tshidi mu foto eu, neumone se: dimue dia ku masala atshi anayi kadiena ne dikuatshisha nansha dimue. Pabi, tshibeyibeyi etshi tshidi tshitungunuka ne kudidiisha ne kubuuka. Etshi ntshilejilu tshimuepele patupu. Bakaadi bamane kumona bibeyibeyi bienza mudimu wabi wa ku dituku ne bia pa lukama 70 bia bipaapu pa masala abi kabiyiku.
Bia muomumue, bantu ba bungi batu baleja muoyo mukole. Nansha bikale bakenga bua ntatu mikole ya ku mubidi anyi ya mu mpampakenu, kabena bateketa.—Fuanyikija ne 2 Kolinto 4:16.
Mupostolo Paulo wakatantamena ntatu mikole ya ku mubidi mu bule bua ngendu yende ya bu-misionere. Wakapiandibua mfimbu, kudia mututu, kutapibua mabue, ne kuedibua mu buloko. Kusakidila apu, uvua ukengeshibua ne disama kampanda, pamu’apa lutatu bua mêsu ende, divua bu “dieba mu mubidi” misangu yonso buende yeye.—2 Kolinto 12:7-9; Galatia 4:15.
Mukulu kampanda muena nkristo muena dîna dia David, wakaluangana ne dikuatshibua dikole ne tunyinganyinga munkatshi mua bidimu bia bungi, udi witabuja ne: bukole bua Yehowa buvua ne dikuatshisha dia bungi bua disanguluka diende. “Misangu mivule, dilubuluka dikole mua kupeta divua dimueneka bu divua dienda dijimina,” ke mudiye umvuija. “Pa kuluangana ne ditekeshibua dia mushindu’eu, mvua ngeyemena Yehowa mu malu onso, ne bushuwa wakankuatshisha. Kuvua imue misangu imvua nsambila mêba mulongolongo. Pamvua ngakula ne Yehowa, nyanji yanyi ya bunkaya ne dipanga mushinga ivua ijimina. Ndi muluangane mu bikondo bia butekete bunene, kadi ku diambuluisha dia Yehowa, ku butekete ebu nkupatuke bukole—too ne bukole bua kuambuluisha nabu bakuabu mene.”
Yehowa Nzambi wakapetesha Paulo bukole. Nunku, uvua mua kuamba ne: ‘Pangikala mutekete, mpandi ne bukole.’ (2 Kolinto 12:10) Eyowa, mateketa a Paulo akamulongesha bua kueyemena bukole bupetesha kudi Nzambi. “Ndi ne bukole mu malu onso ku diambuluisha dia eu udi umpesha bukole,” ke muakamba mupostolo eu. (Filipoi 4:13, NW) Yehowa udi bushuwa upesha basadidi bende bukole.