Nkonko ya babadi

Imue misangu tusombele tumvua bana betu bakula anyi basambila bua Bukalenge bua Nzambi kuluabu pa buloba. Ngakuilu eu mmujalame anyi?

Mu ngakuilu wa tshishiki, mushindu eu wa dilomba bua Bukalenge kulua kawena ulonda Mifundu nansha. Bukalenge bua Nzambi mbua mu diulu. Nunku, mupostolo Paulo uvua mua kufunda ne: ‘Mukalenge neampandishe ku midimu yabo yonso idi mibi, neansungile [bua, NW] bukalenge buende bua mu diulu; butumbi buikale kudiye ku bikondo ne ku bikondo. Amen.’​—2 Timote 4:18; Matayo 13:44; 1 Kolinto 15:50.

Bukalenge ebu buakajadikibua mu diulu mu 1914, ne kabuena mua kutentuludibua nansha kakese bua kutekibuabu mu Mparadizu muasulula pa buloba anyi mu muaba mukuabu kayi wonso. Yezu Kristo udi Mukalenge wa Bukalenge ebu. Bu mudiye Mukalenge, Yezu udi ne bukokeshi ku mutu kua banjelu. Nunku’eu, muaba wende wa bukalenge muakanyine udi ku dia balume dia Nzambi mu muulu. Bena nkristo bela manyi badi badisangisha kudiye bu bakalenge ne bakuidi mu diulu.​—Efeso 1:19-21; Buakabuluibua 5:9, 10; 20:6.

Nunku, ebi bidiku biumvuija ne: katuena kabidi ne bua kuenza kudi Nzambi milombo itudi tusangana mu bitupa bia Disambila dia Mukalenge dìdì diamba ne: “Bukalenge buebe bulue. Disua diebe dienzeke pa buloba bu mudidi dienzeka mu diulu” anyi? (Matayo 6:10, NW) Nansha, disambila adi ndiakanyine ne ditshidi amu ne diumvuija diadi dijima.

Bukalenge bua Nzambi nebuenzele buloba ebu malu ndekelu wa bionso mu mushindu udi ufikisha ku bipeta bia ndekelu, ne ebi ke bitudi nabi mu tshieledi tshia lungenyi patudi tusambila ne tupatula mêyi a muomumue ne aa a mu Disambila dia Mukalenge. Tshilejilu, Danyele 2:44 udi udianjila kumanyisha ne: Bukalenge abu “nebulue” bua kubutula matunga onso ne nebukokeshe buloba ebu bujima. Buakabuluibua 21:2 udi wakula bua Yeruzaleme Mupiamupia udi upueka ufuma mu diulu. Yeruzaleme Mupiamupia mmuenza kudi bena nkristo bela manyi 144 000 bikala mukaji musela wa Kristo. Badi kabidi bapianyi pamue ne Yezu mu Bukalenge. Nunku Buakabuluibua 21:2 udi uleja dituma diabu dia ntema ku buloba, ne mabenesha manene apeta bukua-bantu buena lulamatu.​—Buakabuluibua 21:3, 4.

Too ne pakumbajibua milayi eyi ne mikuabu ya dikema, nebikale anu bikumbanyine bua kusambila Yehowa Nzambi mu diumvuangana ne mêyi a Yezu aa: “Bukalenge buebe bulue.” Kadi tudi ne bua kulama mu tshieledi tshia lungenyi se: Bukalenge ebu kabuakulua pa dibulunge Buloba mu ngumvuilu wa ku dîna. Mbulamatadi wa Bukalenge mmusombele mu diulu, ki mpa buloba nansha.

[Mêyi a dianyisha bua tshimfuanyi mu dibeji 31]

Buloba: bilondeshile foto wa NASA