Wakasadila Yehowa ne budipuekeshi

“TSHIDI tshitambe kuikala ne mushinga ki mmuaba uudi usadila, kadi eu uudi usadila ke tshidi bushuwa ne mushinga.” John Booth uvua musue bikole kuakula mêyi aa ne wakaalonda mu nsombelu wende. Muoyo wende panu pa buloba, wakatua ku ndekelu mu Dimue dia 8 Tshiongo 1996, mmuleje patoke uvuaye musungule bua kusadila.

Mutshikale nsongalume kale mu 1921, John Booth uvua wenda ukeba tshipatshila tshia muoyo. Wakalongesha mu Kalasa ka Dia lumingu mu Ekleziya Muakajulula wa Hollande, kadi kakitaba lungenyi lua kulonga bua kuluamu ministre bualu wakamona se: bamfumu ba malu a Nzambi bavua ne nsombelu ya budisui. Pakamonaye mukanda uvua umanyisha ku bantu muyuki kampanda uvua ne tshiena-bualu tshia “Miliyo ya bantu bàdì ne muoyo mpindieu kabakufua kashidi,” kakanenga bua kulomba diakamue mikanda ivuawu umanyisha. Mukokibue bikole ku biakabalaye, kakanenga bua kuenda kilometre 24 pa dikalu uya ku bisangilu bia Balongi ba Bible, muvua Bantemu ba Yehowa bamanyike tshikondo atshi. Wakatambuishibua mu 1923 ne kutuadija buambi bua ku nzubu ne ku nzubu mu rejon wa Wallkill, New York, muaba uvua dîku diende ne ferme wa nyama.

Muanetu Booth wakabuela mu mudimu wa ku dîba ne ku dîba mu Tshisanga 1928. Wakayisha mu teritware mumulela ne mu misoko ya ku Sud, ushintakaja mikanda miumvuiji ya Bible bua kupeta biakudia ne muaba wa kulala. Uvua ne bua kuakama ne dikima njiwu bu mudi disambakena ne bantu bavua ne bia kuengulula nabi maluvu makole mu mushindu ukena ulonda mikenji bàvuà batshinyishangana ne bingoma, umue wa kudibu wakasa mpanda-njila muinende wa John Booth tshingoma ne kumutapa mputa. Mu 1935 muanetu Booth wakatekibua mutangidi muena ngendu ne wakatuadija kukumbula bisumbu ne tusumbu tukese mu ditunga. Wakalongolola mpuilu ne kuambuluisha bana betu bua kunanukila nansha muvuaku buluishi. Dituilangana mpala ne mpala ne bisumbusumbu bia tshimvundu, dilumbulula ku tubadi, ne diedibua mu buloko bionso biakalua malu a pa tshibidilu bua muanetu Booth. “Bidi mua kuangata mukanda mujima bua kumvuija mu buondoke bikondo abi bikole,” ke muakafundaye musangu kampanda.

Mu 1941, Joseph F. Rutherford, uvua tshikondo atshi mulombodi wa Société Watch Tower, wakateka muanetu Booth bua kutumika ku Ferme wa Bukalenge, pabuipi ne Ithaca, ku New York. Wakasadila muaba eu ne lulamatu munkatshi mua bidimu 28. Dinanga diende bua mudimu kadiyi dibuitshidila, uvua ne milowo mu kupita kua bidimu bua kudisangisha pamue ne binunu bia balongi ba ku Tshilongelu tshia Bible tshia Watchtower tshia Galaad tshia dilongeshila ba-misionere, tshivua tshisanganyibua muaba au ku Ferme wa Bukalenge too ne mu 1961. Mu 1970, muanetu Booth wakalombibua bua kusadila ku Ferme ya Watchtower ku Wallkill, New York, ne kuluaye nunku yeye muine ku muaba umue umue wakatuadijilaye bumpanda-njila bidimu bu 45 kumpala.

Mu 1974, muanetu Booth wakatekibua muena mu Kasumbu Kaludiki ka Bantemu ba Yehowa ku Brooklyn, New York. Wakasadila ne lulamatu mushindu eu too ne ku lufu luende pakavuaye ne bidimu 93. John Booth uvua munangibue bikole bua bu-muntu buende bua muena nkristo bua budipuekeshi butambe kuondoka ne bua bulenga. Nansha too ne pakajika makanda ende a mubidi ne bukole buende, uvua uyisha ne lulamatu ku nzubu ne ku nzubu ne mu misesu ya mu tshimenga.

Nansha mùdì aba bavua basadile nende pamue badila bua lufu luende, badi bapeta disambibua mu dilaya dia mu Bible didi ditangila bena nkristo bela manyi ba mushindu’eu, dia se: badi babiishibua bua muoyo wa mu diulu, ne se: “malu avuabu benze adi abalonda.” (Buakabuluibua 14:13, NW; 1 Kolinto 15:51-54) Mmuaba mupiamupia bushuwa, kadi mmuaba wikala John Booth mua kusadila Yehowa bua kashidi!

[Tshimfuanyi mu dibeji 32]

John Booth 1902-1996

[Tshimfuanyi mu dibeji 32]

HERALD-AMERICAN, ANDOVER 1234

76 Jehovites Jailed in Joliet

[Mêyi a dianyisha]

Chicago Herald-American