Pansio​—Ntshiibi tshiunzulula bua mudimu wa teokrasi anyi?

PANSIO​—bua bavule udi winjila tshiibi pa lupolo lule lua tunyinganyinga ne lua malu makole. Kunyima kua bamane kufinakajibua mu mudimu wa buatshia buatshia udi usuya anyi udi usumpakaja, bavule badi batekemena dipeta pansio bua dibunzuluile tshiibi ku bidimu bia diikisha ne budikadidi. Kadi misangu mivule, tshiibi atshi tshitu tshifikisha ku lunsuya ne dipanga disankishibua. Dijikija lutetuku ne didiolola patupu kabiena bipetesha didiangata ne mushinga ditu mudimu upetesha.

Bua Bantemu ba Yehowa, pansio udi mua kunzulula ‘tshiibi tshinene ne tshia kuenza mudimu mukole.’ (1 Kolinto 16:9) Nansha mudi bukulakaje buikale ne yabu ntatu ne mikalu, bamue bakulakaje mbamone se: ku diambuluisha dia Yehowa badi mua kudiundisha mudimu mumukuatshila. Tangila malu mamona kudi bamue bena nkristo bakulakaje mu ditunga dia Pays-Bas. Mu tshidimu tshia mudimu tshia 1995, bantu 269 ba ku bampanda-njila bapite bungi bua 1 223 (bamanyishi ba Bukalenge ba ku dîba ne ku dîba) bavua ne bidimu 50 anyi kupita apu. Ku bampanda-njila aba 269, bantu 81 bavua ne bidimu 65 anyi kupita apu.

Bamue badi bakumbana mua kuenza bumpanda-njila amu pa kutungunuka ne kuikala ne bia bungi bia kuenza bu mu tshikondo tshivuabu mu midimu ya ku mubidi. (Fuanyikija ne Filipoi 3:16.) Karel, muena nkristo kampanda muena pansio, udi uvuluka ne: “Pamvua ku mudimu wanyi wa ku mubidi, pa tshibidilu mvua ntuadija mudimu mu dinda pa dîba 7:30. Pangakapeta pansio, ngakapangadija bua kutungunuka ne kuenza bia muomumue. Mvua ntuadija dituku pa kufila bumanyishi mu misesu ne bibejibeji kumpala kua ngaala wa kawulu dinda dionso pa dîba muanda-mutekete.”

Didilongolola ne lubatshi didi kabidi nsapi wa dilubuluka. (Nsumuinu 21:5) Tshilejilu, bamue mbakumbane bua kubutshila mfranga mikumbane bua kudiambuluisha buobu bine mu mudimu wabu. Bakuabu mbangate dipangadika dia kukepesha ditula mfranga diabu nkayabu ne kudipetela mudimu wa mêba makese. Tangila Theodore ne Ann. Bakatuadija nsombelu wabu wa bena dibaka bu bampanda-njila too ne pakalua majitu abu a dîku kubanemenena ne kulekelabu bumpanda-njila. Kadi lungenyi luabu lua bumpanda-njila luakashala amu lukole! Pavua bana babu ba bakaji benda bakola, bavua bakankamijibua misangu ne misangu bua kupanda njila. Tshidi ne mushinga kabidi, Theodore ne Ann bavua tshilejilu tshimpe, pa kusadila misangu mivule bu bampanda-njila bambuluishi. Pakamana kukola bana babu ba bakaji aba, Theodore ne Ann bakatuadija kukepesha mudimu wabu wa ku mubidi bua kumona mua kupeta dîba dia kudifila mu mudimu wa budimi.

Kunyima kua dibuela dia bana babu ba bakaji aba mu mudimu wa ku dîba ne ku dîba ne kumbuka kumbelu, Ann wakatuadija bumpanda-njila. Dimue dituku wakakankamija Theodore bua kulekela mudimu wende wa ku mubidi. “Bubidi buetu tudi mua kupanda njila,” ke muakafilaye lungenyi. Theodore wakamanyisha mfumuende wa mudimu tshivuaye usua kuenza. Bualu bua dikema, shefu wende wakamulaya bua kumuambuluisha pa kumupa mudimu wa mêba makese, pa kuamba ne: “Ndi ngela meji ne: udi musue kutumika ku dîba ne ku dîba bua shefu webe udi muamua [mu diulu].” Theodore ne Ann badi basanka mpindieu pa kuenza pamue mudimu wa bumpanda-njila.

Bamue bakatuadija kupanda njila bu diandamuna ku malu kampanda akenzeka mu nsombelu yabu. Lufu lua muanabu wa bakaji ne muikulu wabu wa bakaji luakelesha bena dibaka kampanda bakulakaje meji pa mushindu uvuabu ne bua kutumika ne bidimu biabu bitshivua kumpala. (Muambi 7:2) Pamutu pa kukokeshibua kudi kanyinganyinga, bakatuadija mudimu wa ku dîba ne ku dîba, ukadibu benze mpindieu munkatshi mua bidimu bipite pa muanda-mukulu!

Bushuwa, bidi bilomba dipangadija dilelela bua kushala mu mudimu wa ku dîba ne ku dîba. Tshilejilu, Ernst ne mukajende, Riek, bakatuadija bumpanda-njila diakamue pakumbuka bana babu kumbelu. Katupa kîpi kunyima ngenda-mushinga nende wa kale wakalaya Ernst mudimu udi ufuta bimpe. Ernst wakamuandamuna se: “Tudi ne mfumu wa mudimu mutambe buimpe ku bonso, ne katuena basue dilekela kumusadila!” Bu muakashala Ernst ne mukajende mu “mudimu” wa Yehowa, masanka makuabu a mudimu akunzuludibua kudibu. Bakasadila mu mudimu wa tshijengu bidimu bipite pa 20 ne mbatungunuke ne kusadila bu bampanda-njila too ne ku lelu’eu. Badiku ne kanyinganyinga bua nsombelu wabu wa didipangisha bimue bintu anyi? Kukadi kupite bidimu bikese, bena dibaka aba bakafunda ne: “Pikala Yehowa mua kusua, mu ngondo isatu tudi batekemene bua kusekelela bidimu 50 bia dibaka dietu, bidibu babikila pa tshibidilu ne: mufikilu wa ngolo. Kadi ne dishindika dionso, tudi tuamba ne: bidimu bietu bia ngolo bia bushuwa biakatuadija tshikondo tshituakabangisha bumpanda-njila.”

Bavule mbamone se: tshiibi tshidi tshifikisha ku mudimu wa bungi tshidi kabidi tshifikisha ku disanka dia bungi! Muanetu kampanda wakatuadija bumpanda-njila mbingu ibidi kunyima kua dikumbaja bidimu 65 udi wamba ne: “Ndi ne bua kuamba ne: katshia tshiena muanji kumona tshikondo kampanda mu nsombelu wanyi tshiuujibue menemene ne mabenesha bu mu bidimu dikumi bishal’ebi bia bumpanda-njila.” Bena dibaka babidi badi benze bumpanda-njila bidimu bipite pa muanda-mutekete badi bamba ne: “Ntshinyi tshikuabu tshidi bena dibaka badi ne bidimu bu bietu ne nsombelu bu yetu mua kuenza? Tudi tumona pa tshibidilu bantu ba muomumue netu mu teritware​—basombe bimpe ku mabu, benda badiunda, bakulakaja, ne bashala kabayi mua kunyungakana bikole. Mudimu udi utulama ne makanda mimpe a mu lungenyi ne a mu mubidi. Tudi misangu yonso pamue. Tudi tuseka bikole ne tusankidila dikala ne muoyo.”

Bushuwa, ki mbakulakaje bonso badi ne nsombelu idi ibapetesha mushindu wa kupanda njila. Bena nkristo aba badi mua kujadika se: Yehowa udi wanyisha tshionso tshidibu mua kuenza mu mudimu wende. (Fuanyikija ne Mâko 12:41-44.) Tshilejilu, muanetu kampanda wa bakaji mukulakaje udi ku nzubu wa bakulakaje. Nansha nanku, tshiibi tshia mudimu tshitshidi amu tshimunzuluila! Munganga wakamuebeja tshidiye wenza bua kupitshisha dîba. Udi ulonda ne: “Ngakamuambila se: pa tshibidilu tshitu ne dîba dia bungi. Kakakumbana bua kumvua bualu ebu. Ngakamuambila ne: bidi nunku bualu matuku anyi mmûle tente ne midimu idi isankisha. Tshiena pa nkayanyi, kadi ndi nkeba bakuabu badi pa nkayabu ne nteta mua kubambila tshidi Nzambi mulongoluele bukua-bantu.” Udi wamba mu tshikoso ne: “Bua muntu ukadi ne bidimu bu 80, katuena mua kutekemena bipitshidile. Sambilayi bualu buanyi bua meme kutungunuka ne kulombola bavule kudi Yehowa.”

Udi muena pansio anyi? Tshiibi tshiunzulula bua diikisha tshidi mua kulobesha bikole, kadi ki ntshiibi tshidi tshifikisha ku dibeneshibua dia mu nyuma. Konkonona nsombelu webe mu bululame buonso. Bumue udi mua kukumbana mua kubuela ku tshiibi tshidi tshifikisha ku mudimu mutambe bunene mu mudimu wa Yehowa.

[Bimfuanyi mu dibeji 25]

Pansio udi mua kufikisha ku dienza bia bungi mu mudimu