Nkonko ya babadi

Ndi ngumvua ne: muaku wa mu tshiena-Greke “toʹte” mmutumika nawu bua kuleja bidi bilonda kunyima. Nunku bua tshinyi Matayo 24:9 (NW) udi wamba ne: “Nenku [“toʹte”], nebanufile mu dikenga ne nebanukengeshe,” eku muyuki wa muomumue mu Lukas 21:12 (Mukenji Mulenga) wamba ne: “Kadi bangabanga ne bionso ebi, nebanukuate, banukengeshe”?

Mbushuwa bua se: tudi mua kutumika ne toʹte bua kuleja tshintu tshidi tshilonda kunyima, tshintu tshidi tshitua tshikuabu munyima, mu ngakuilu mukuabu. Kadi katuena ne bua kumvua se: eu ke mushindu umuepele udi Bible utumika ne muaku eu.

Nkonga-miaku wa A Greek-English Lexicon of the New Testament and Other Early Christian Literature, wa Bauer, Arndt, ne Gingrich, udi uleja ne: badi batumika ne muaku toʹte mu Mifundu mu ngumvuilu ibidi minene.

Mushindu umue udi “pa dîba adi.” Bidi mua kuikala “-a dîba dishale adi.” Tshilejilu tshimue m’Matayo 2:17: ‘Nunku bakashiikija dîyi diakambibua kudi muprofete Yelemiya.’ Kabiena bisua kumvuija diakula bua tshintu tshidi mu mulongo ne bikuabu kadi tshidi tshileja bualu bua pa buabu mu matuku mashale, mbuena kuamba ne: pa dîba adi. Bia muomumue, badi mua kutumika ne toʹte ne ngumvuilu wa “-a dîba dialua adi.” Tshilejilu tshimue tshidi mu 1 Bena Korente 13:12 (MMM): “Mpindiewu tudi tumona bibuitshidile, bu muntu umona bintu mu lumuenu; kadi dituku diadia nebikale mpala ne mpala. Mpindiewu ndi mumanye nankunanku, kadi diba adio nemmanye bu mudibo bammanye mpindiewu.” (Disendamija miaku ndietu.) Muaba eu Paulo udi utumika ne toʹte mu ngumvuilu wa ‘pa dîba dialua adi.’

Bilondeshile nkonga-miaku eu, dikuabu ditumika ne toʹte “mbua kuleja tshidi tshilonda kunyima.” Nkonga-miaku eu udi ufila bilejilu bivule bia mu miyuki isatu ya diandamuna dia Yezu kudi bapostolo bende pa tshimanyinu tshia dikalaku diende.a Bua bilejilu bia ditumika ne toʹte “bua kuleja tshidi tshilonda kunyima,” nkonga-miaku eu wakatela Matayo 24:10, 14, 16, 30; Mâko 13:14, 21; ne Luka 21:20, 27. Pa kutangila mvese idi minyunguluke mêyi aa tudi tumona bua tshinyi ngumvuilu wa se: mbualu budi bulua kunyima, mmuakane. Ne bidi biambuluisha bua kupeta bujinguludi bua mulayi wa Yezu uvua ne malu adi alua kumpala.

Nansha nanku, katuena ne tshia kukoma se: muaba wonso udi toʹte mu muyuki udi ne tshia kuleja amu tshidi tshilonda kunyima. Tshilejilu, mu Matayo 24:7, 8, tudi tubala ne: Yezu wakadianjila kuamba ne: ditunga divua ne bua kuluangisha ditunga dikuabu ne kuvua ne bua kuikala biyole bia nzala ne bikumina. Mvese wa 9 udi utungunuka nunku: “Nenku, nebanufile mu dikenga ne nebanukengeshe, kabidi nebanukine kudi matunga onso bua dîna dianyi.” (NW) Bidiku bia lungenyi bua kuela meji ne: mvita, biyole bia nzala, ne bikumina bidianjila kumanyisha bidi ne bua kulua, ne bumue mene kujika, kumpala kua dikengeshibua kubanga anyi?

Ki ndungenyi lujalame, ne kabiena bitua nyama ku mikolo kudi malu atudi bamanye pa dikumbana dia mulayi eu dia mu siekele wa kumpala. Muyuki udi mu mukanda wa Bienzedi udi usokolola se: pa kuamba diakamue kunyima kua dituadija kuyisha dia bena tshisumbu tshipiatshipia tshia bena nkristo, diakamangana ne buluishi bukole diakabanga. (Bienzedi 4:5-21; 5:17-40) Katuena bushuwa mua kuamba ne: mvita yonso, ne biyole bia nzala bionso, ne bikumina bionso bivua Yezu muakule bualu buabi biakenzeka kumpala kua dikengeshibua dia kumpala. Bishilangane, buluishi abu buakalua “bangabanga” ne malu mavule avua mamana kulaya kuenzekawu, ebi bidi mu diumvuangana ne mushindu uvua Luka mutumike ne miaku pa muanda eu: “Kadi bangabanga ne bionso ebi, nebanukuate, banukengeshe.” (Lukas 21:12, Mukenji Mulenga; disendamija miaku ndietu.) Ebi bidi bileja ne: mu Matayo 24:9, toʹte mmutumika nende ne ngumvuilu wa “pa dîba adi.” Mu tshikondo tshia mvita, biyole bia nzala, ne bikumina, anyi pa dîba adi, balondi ba Yezu bavua ne bua kukengeshibua.

[Mêyi adi kuinshi]