Balongeshe kutuadija ku buana buabu

MAKEBULULA a lelu adi aleja ne: “mukuji udi wandamuna ku mêyi.” Bakebuludi ba ku Université wa Caroline du Nord “bakamona se: kunyima kua bamamu bamane kubadila bana babu bavua mu mafu, bana aba bavua bafuma ku diledibua bavua bandamuna kabidi ku malu akavuabu bababadile,” ke mudi tshikandakanda tshia Winnipeg Free Press tshiamba. Padi bakaji badi ne mafu babala ne dîyi dikole, bidi mua kuambuluisha bua kulamika muana bikadilu bilenga. Bible udi wamba ne: Timote ‘uvua mumanye Mikanda ya Tshijila bituadije ku buana buende.’ (2 Timoteyi 3:14, 15, MMM) Bushuwa, mamuende ne kakuende-mukaji bavua bamanye bimpe mushinga wa kumulongesha kutuadija ku buana buende, ne bumue kulongesha eku kuvua kukongoloja dibala ne dîyi dikole.

Dibala ‘nnzanzu ya bukole butambe ya mu nsombelu utudi nende mu tshinsanga tshia bantu lelu’eu,’ ke mudi mufundi Jim Trelease wamba. Dibala ne dîyi dikole didi diambuluisha nzanzu ya diakula ne dimanya miaku.

Mbimpe kubanga kubala ne dîyi dikole pautshidi ubangishilaku kuakula ne muanebe wa katoto. Nansha mudi muanebe utshidi munda anyi utshidi uleledibuaku kayi mua kumvua bangabanga biudi umuambila, bipeta bilenga bialua kunyima mbikumbanyine madikolela aa. Nsumuinu 22:6 (MMM) udi wamba ne: “Longesha muana bibidilu biakane bidiye mua kulonda, pakulakajaye kakubilekela to.”

Mbinganyi biudi mua kubala bidi mua kuikala ne dikuatshisha ne diambuluisha? Badila muanebe Bible ne dîyi dikole dituku dionso. Bala kabidi mikuabu mikanda idi ikengedibua menemene, bu mudi Telejayi Mulongeshi munene, Miyuki ya mu Mukanda wa Nzambi, Le plus grand homme de tout le temps, ne biena-bualu bia mu bibejibeji bia Tshibumba tshia Nsentedi ne Réveillez-vous!

Bulelela, didifila diebe mu mushindu’eu didi dilomba dîba, kadi ndîba dipitshisha bimpe. Mmushindu mutambe buimpe wa kuleja ne: udi utabalela muanebe ne udi mumunange.