Udi mua kupeta “mutshima wa ntambue”

BIBLE utu imue misangu ukuata mudimu ne ntambue bua kuleja dikima ne bukitu. Bena bukitu anyi bena dikima mbaleja bu badi ne “mutshima wa ntambue,” ne badi bamba bantu bakane se: “badi ne dikima bu dia muana wa ntambue.” (2 Samuele 17:10, NW; Nsumuinu 28:1, MMM) Nangananga patuye mubunda, ke patu ntambue uleja ne: mmukumbanyine lumu lua mudiye ‘mupite nyama yonso bukole.’​—Nsumuinu 30:30.

Yehowa udi ufuanyikija dipangadija diende dia kukuba bantu bende ne dipanga kutshina dia ntambue. Yeshaya 31:4, 5 udi wamba ne: ‘Bu mudi nyama wa ntambue ne muana mulume wa ntambue ukungula padiaye nyama udiye mukuate, ne pabikilabo tshisumbu tshia balami ba mikoko bua kumuluisha, bu mudiye kayi utshina meyi adibo bamuela, kayi umvuila mbila yabo, nunku Yehowa wa misumba neapueke panshi bua kuluangana mvita pa Mukuna wa Siona . . . neamulame, neamupandishe, neamushiye ne neamusungile.’ Nunku Yehowa udi ujadikila basadidi bende dibakuba dikole, nangananga padibu batutakena ne buluishi.

Bible udi ufuanyikija muluishi mutambe bunene wa bukua-bantu, Satana Diabolo, ne ntambue udi ukungula ne udi ne luonji. Bua kuepuka kulua tshiakudia tshiende, badi batuambila mu Mifundu se: “Dilamayi, nutabale.” (1 Petelo 5:8, MMM) Umue mushindu wa kuenza nunku nkuepuka dibùngila dibi dia mu nyuma. Pa muanda eu Yezu wakamba ne: “Dimukayi! Mitshima yenu kayinemi bujitu ne budiavi ne bukuatshiki bua maluvu, ne ntatu ya muoyo ewu.” (Luka 21:34-36, Muanda Mulenga Lelu) Ee, kuikala mutabale mu nyuma mu ‘matuku a ku nshikidilu’ aa kudi mua kutupesha “mutshima wa ntambue,” ùdì ‘mushindame, weyemena Yehowa.’​—2 Timote 3:1; Musambu wa 112:7, 8.