“Tshiena ndota to, ki mmuomu’anyi?”

Luapolo ludi lulonda elu lùdì lufumina ku Malawi ludi lutangila umue wa ku mpuilu ya distrike mienda lumu ya “Basamunyi bena disanka” mienza kudi Bantemu ba Yehowa mu tshidimu tshia 1995.

“KU LUSEKE lua njila munene, pamue ne pankatshi pa njila wa muelelu wa ku ouest wa dijiba dia Malawi, kudi tshimanyinu tshiteka bua musangu wa kumpala mu bidimu 29. Mbafundepu ne: ‘Mpuilu wa distrike wa Bantemu ba Yehowa.’

“Kaminyo kanene nkimane ku luseke lua tshimanyinu etshi, ne baleji-mpala bapite pa 200 badi batuluka ku tshisasa tshiaku tshinene bafumina ku tshimenga tshia Mzuzu. Mbalue ne mabuki a bilamba, mbulankete, ngesu, tunti, biakudia, nkunyi, ne Bible bua kupetangana ne bana babu ba ku miaba mikuabu batue ku 3 000.

“Patudi tubela muoyo mu dituluka diabu ku kaminyo, George Chikako, [bidimu] 63, udi ufika, wenda upuusa dikalu mu lusenga, mmudiendeshe mu bule bua matuku abidi kumbukila ku Nkhotakota. Munkatshi mua bidimu bivule, muanetu Chikako uvua mubuele mu buloko misangu inayi bualu uvua mubenge kutupa ku mêyi-maludiki a Bible. Muanabu wa balume wa tatuende mukuabu wakafua bua mututu wakapetaye pavuaye mukuatshibue. ‘Tshiena ndota to, ki mmuomu’anyi?’ ke mudi muanetu Chikako webeja. ‘Mpuilu eu udi wenjibua patoke too, ne bantu aba badi bimba misambu ya Bukalenge ne dîyi dikole! Mu tshikondo tshionso etshi, tuvua ne bua kudisangisha mu mîdima ya butuku, tunungana misambu ya Bukalenge, bu dituta bikashi tuvua tulabakaja bianza diatshimue. Mpindieu tudi tudisangisha pambelu, ne bantu badi bakema pa kumona se: tudi bapite bungi bualu bavua bela meji ne: tuvua bakese!’

“Muaba udi mpuilu wenzekela mmunyungulula ne nsona ne kuvua nshiba miela kuulu apa ne kuaka bua kufila ditalaji. Tuzubu tua bisonsa tukese ne miaba ya kulala ya pambelu bivua biasa bua baleji-mpala kusombelamu. Kapepa ka butuku nkuule ne mêyi a bivuma bia misambu milenga adi kaayi makanga kabidi kudi buôwa bua dikengeshibua.

“Mmunyipu muvuabi biakanyine bu muvua mpuilu ne mutu wa bualu ne: ‘Basamunyi bena disanka’!”

[Mêyi a dianyisha]

Mountain High Maps® Copyright © 1995 Digital Wisdom, Inc.