Nkonko ya babadi

Yezu mmumanye mpindieu tshikondo tshiafika Armagedon anyi?

Bidi bimueneka bia meji bua kuitaba se: mmutshimanye.

Bamue badi mua kudiebeja bua tshinyi mene lukonko elu ludi lujuka. Bumue mbua nseka ya Yezu idi isanganyibua mu Matayo 24:36: ‘Kadi bua dituku adi ne pa diba adi kakuena muntu udi mumanye, banjelo menemene ba mu diulu kabena bamanye, Muana kena mumanye, anu Tatu udi mumanye.’ Kuata ka-tshiambilu aka: “Muana kena mumanye.”

Mvese eu ntshitupa tshia diandamuna dia Yezu ku lukonko lua bapostolo: “Utuambile dituku dialua malu aa, ne tshimanyinu tshia dikalaku diebe ne tshia nkomenu wa ndongoluelu wa malu eu.” (Matayo 24:3, NW) Mpindieu mu mulayi wende muende lumu pa bijadiki bidi bienza “tshimanyinu” atshi, wakakula bua mvita, biyole bia nzala, bikumina, dikengeshibua dia bena nkristo balelela, ne makuabu malu pa buloba avua ne bua kuleja dikalaku diende. Ku diambuluisha dia tshimanyinu etshi balondi bende bavua mua kujingulula ne: nshikidilu uvua pabuipi. Wakafila mufuanu wa disemena dia tshikondo atshi pa kuakula bua dîba ditu mutshi wa mfigi ubanga kuela mabeji, bileja ne: muvu wa été ukadi pabuipi. Wakasakidila ne: ‘Nunku nuenu kabidi, panuamona malu aa onso, nenumanye ne, Yeye udi pabuipi, udi kumbelu menemene.’​—Matayo 24:33.

Kadi Yezu kavua muambe ne dishindika dionso dîba divua nshikidilu ne bua kulua to. Bishilangane, wakamba bitudi tubala mu Matayo 24:36. Ke mushindu udibi bibadibua mu Mukanda wa Nzambi, ne ke mutudi tubala kabidi mu nkudimuinu mikuabu ya buena-lelu. Kadi, imue nkudimuinu ya kale kayena ne miaku: “Muana kena mumanye.”

Tshilejilu, tudi tubala mu Bible wa bena Katolike wa Douay Version ne: “Kadi bua dituku adi ne dîba adi muntu nansha umue kêna mumanye, nansha banjelu ba mu diulu, kadi Tatu nkayende.” Tudi tubala bia muomumue mu nkudimuinu wa King James Version. Bua tshinyi miaku “Muana kena mumanye” kayenamu, eku isanganyibua mu Mâko 13:32? Mbualu tshikondo atshi mu siekele wa 17 pavua nkudimuinu eyi ibidi yenjibua, maniskri avua bakudimunyi benza nawu mudimu kaavua ne ka-tshiambilu aka nansha. Kadi mu kupita kua matuku, maniskri mavule a tshiena-Greke akapeteka. Maniskri aa, àvuà ne miaku “Muana kena mumanye” mu Matayo 24:36 avua a pamue ne tshikondo tshifundile Matayo Evanjeliyo.

Bualu bua dikema, nkudimuinu wa bena Katolike wa La Bible de Jérusalem udi ne ka-tshiambilu aka, ne note kuinshi wamba ne: nkudimuinu wa mu Latin wa Vulgate kavua ne ka-tshiambilu aka “pamu’apa bua tubingila tua malu a teoloji.” Bua tshinyi nanku bakuetu! Bakudimunyi anyi batentuludi bàvuà bitaba Busatu Bunsantu bavua ne bua kuikala batete bua kumbusha ka-tshiambilu kavua kaleja ne: Yezu kavua ne dimanya divua nadi Tatuende to. Mmunyi muvua Yezu mua kupangila kumanya bualu kampanda bu yeye ne Tatuende bikale bitupa bia Nzambi wa basatu?

Bia muomumue, mukanda wa A Textual Commentary on the Greek New Testament, wa B. M. Metzger udi wamba se: “Miaku ‘Muana kena mumanye’ kayena mu [maniskri] mavule mu Matayo, kusangisha ne a mifundu ya kunyima ya ku Byzance. Ku lukuabu luseke, [maniskri] a mifundu matambe bulenga a bena Alexandrie, bena Ouest, ne bena Kezare adi ne ka-tshiambilu aka. Diumbushibua dia miaku eyi bua lutatu lua dilongesha dia nshindamenu ludiyi ituala nditambe kumueneka kupita disakidibua diayi pa kufuanyikija” ne Mâko 13:32.​—Disendamija miaku ndietu.

“[Maniskri] matambe bulenga” aa a ku maniskri a kumpala adi atua ku tshia nkudimuinu idi ileja dilondangana dia malu dia meji pa bidi bitangila dimanya edi. Banjelu kabavua bamanye dîba dia nshikidilu; nansha Muana; anu Tatu nkayende. Ne ebi bidi biumvuangana ne miaku ya Yezu ìdì isanganyibua mu Matayo 20:23, mudiye witaba ne: kêna ne bukokeshi bua kufila miaba mitumbuke mu Bukalenge, kadi amu Tatuende ke udi nabu.

Nunku, mêyi a Yezu yeye nkayende adi aleja ne: pavuaye pa buloba kavua mumanye dîba dia ‘nshikidilu wa buloba.’ Kadi wakadimanya pashishe anyi?

Buakabuluibua 6:2 udi uleja Yezu musombe pa kabalu katoke ne upatuka bu “mutshimunyi ne bua kujikija ditshimuna diende.” (NW) Pashishe kudi kupatuka bena tubalu bakuabu badi baleja mvita, nzala, ne makenga, atudi bapete katshia ku dituadija dia mvita ya kumpala ya buloba bujima mu 1914. Bantemu ba Yehowa badi bitabuja ne: mu 1914, Yezu wakatekibua mu nkuasa bu Mfumu wa Bukalenge bua mu diulu, eu walombola mvita idi kumpala ya diluangisha bantu babi pa buloba. (Buakabuluibua 6:3-8; 19:11-16) Mpindieu bu mukadi Yezu mupeshibue bukokeshi bu eu udi ne bua kutshimuna mu dîna dia Nzambi, bidi bimueneka bia meji ne: Tatuende mmumuambile dîba dialua nshikidilu, dîba ‘diajikijaye ditshimuna diende.’

Tuetu badi pa buloba ki mbatuambile dîba adi to, nenku miaku ya Yezu eyi itshidi’amu itumikidibua kutudi: ‘Dimukai, nutabale bimpe, . . . bua kanuena bamanye dituku adi paluadi. . . . Ndi ngambila bantu diyi dinakunuambila ne, Dimukai.’​—Mâko 13:33-37.