Dikumbula ku Buloba Bulaya
FUANYIKIJA ne: mulunda kampanda mmukuambile se: uvua mukusumbile—bienze bu dipa—nzubu mupiamupia mu muaba mulenga, wa ditalala. ‘Mmunyi mudiye?’ ke muwikala mua kukema. Kabiyi mpata, neujinge bikole bua kudimuenena wewe nkayebe nzubu eu, kuendakanamu ne kukenketa bibambalu bionso. Ndekelu wa bionso, ukadi nzubu webe mupiamupia!
Mu 1473 K.B.B., Yehowa wakapesha tshisamba tshia Izalele wa kale nzubu mupiamupia—Buloba Bulaya, tshitupa tshia buloba tshialabale tshidi ne kilometre mitue ku 500 pa kumbuka ku Nord batangile ku Sud, ne mitue ku kilometre 55 mu bunene.a Busanganyibua mu tshitupa tshia buloba tshibikidibue ne: Croissant fertile, Buloba Bulaya buvua muaba wa milowo wa kusombela, muujibue tente ne bimanyinu bikena difuanyikija.
Kadi, bua tshinyi udi ne bua kutabalela lelu’eu malu a “nzubu” uvua mupesha munga muntu, nangananga muntu uvuaku kukadi matuku mulongo? Bualu dimanya kampanda dia buloba ebu bua mushinga mukole didi mua kudiundisha dianyisha diebe dia malu a mu Bible. “Mu buloba bufundilebu Bible,” ke muakafunda profesere Yohanan Aharoni mu matuku mashale aa, “malu a buloba ne malu a kale mmatambe kubuelakana mushindu wa se: amue kaena mua kumvuika bushuwa kakuyi diambuluisha dia makuabu.” Kabidi, ku butumbuke buabu, Buloba Bulaya budi bufila tshilejilu tshia mu bukese tshikala mua kumvuija Mparadizu ku bukokeshi bua Bukalenge bua Nzambi mu katupa kîpi emu bua bukua-bantu pa buloba bujima!—Yeshaya 11:9.
Mu mudimu wende pa buloba, Yezu Kristo wakatumika ne bimuenekelu bimanyike kuonso mu Buloba Bulaya bua kufila malongesha a mushinga. (Matayo 13:24-32; 25:31-46; Luka 13:6-9) Tudi petu mua kulongela bia bungi mu mushindu mupepele ku ditangila imue ngikadilu ya Palestine wa kale. Nunku, tuanjayi kuendakana mu ngakuilu wa mu tshimfuanyi, mu bimue bia ku bibambalu biende, pa kukonkonona bimue bimanyinu bisunguluke bia buloba ebu buvua buambuluishe bu nzubu bua tshisamba tshia Nzambi munkatshi mua nkama ya bidimu. Bu mutuamona, kudi bia bungi bitudi mua kulongela ku Buloba Bulaya.
[Mêyi adi kuinshi]
a Ditumika ne miaku “Buloba Bulaya” mu biena-bualu ebi, didi dileja malu a mu bikondo bia kale, bu mudiwu malejibue mu Bible, ne kabiyi bitangila malu a tshididi anyi a ntendelelu mu tshitupa atshi tshia buloba.
[Mêyi a dianyisha bua tshimfuanyi mu dibeji 2]
Tshizubu: Pictorial Archive (Near Eastern History) Est.
[Mêyi a dianyisha bua tshimfuanyi mu dibeji 3]
Garo Nalbandian