Bashikuluji badi bakonkonona ngondapilu ikena ya mashi
BASHIKULUJI batue ku 200 ba mu États-Unis bakasangila mu tshimenga tshia Cleveland, ku Ohio, mu Disambombo dia 7 Kasuamansense 1995, bua kukonkonona tshiena-bualu tshidi tshikoka ntema mu mianda ya luondapu: luondapu ne dipandangana bikena bia ditumika ne mashi.
Bakayukidilangana pa nsombelu mivule ya ntatu. Tshilejilu: tshia kuenza ntshinyi padi mubedi muikale ne disama dikole dia mashi ajika? Mmunyi mudi muana wa kabishi wa menemene mua kuondapibua kakuyi diela mashi? Kudiku mushindu wa kupanda muoyo bimpe kakuyi diela dia mashi anyi? Bia kukema, dipandangana kakuyi diela dia mashi—pa kutumika pa tshibidilu ne mishindu idi yambuluisha mubidi bua kudienzelawu mashi—dikadi dimane kutumika nadi mu nsombelu yonso eyi ne bipeta bimpe biakamueneka.a
Bua tshinyi bidi bikengela ngondapilu ikena ya dielangana dia mashi? “Tudi balonge ne: dielangana dia mashi didi misangu mivule disambulujilangana masama, nangananga disama dia mutshima (Hépatite),” ke mudi Sharon Vernon wamba, direktere wa Tshibambalu tshia luondapu ne dipandangana bikena bia dielangana dia mashi mu Lupitadi lua St. Vincent de la Charité mu Cleveland. Udi utungunuka wamba ne: “Nansha padi mashi kaayi asambuluja disama, adi mua kushipa bukole bukubi bua mubidi.” Nansha mudi diambulukilangana dia SIDA dikepesha kudi dikonkonona dia mashi ku biamu, kutshidi’anu masama mavule adi kaayi dikuata ku dienza dia mateta bu aa. Ne nansha mudibi bikengela didilongolola dipite bunene, dipandangana kakuyi diela dia mashi kadiena dilomba mfranga ya bungi bua mpitadi, bu mudidi diumbusha malu a dilumbulula ku tubadi adi mua kupatuka padi babedi bapeta mashi adi ne tuishi.
Bua Bantemu ba Yehowa, kudi kabingila kanene mene bua kubenga diedibua dia mashi: mukenji wa Nzambi mmudikandike. (Bienzedi 15:29) Tshidibi, mbasue kupeta luondapu lupite buimpe ludiku. Nenku mbumvuangane ne ba-minganga badi balombola makebulula mu luondapu lukena lua diela mashi. Luondapu bu elu ludi luambuluisha ki ng’anu Bantemu ba Yehowa, kadi kabidi bakuabu badi batatshishibua pa bidi bitangila njiwu ya dielangana dia mashi.
[Mêyi adi kuinshi]
a Tangila Réveillez-vous! wa mu dia 22 Kasuabanga 1993, mabeji 24-27, ne wa mu dia 22 Tshiongo 1996, dibeji dia 31.
[Mêyi a dianyisha bua tshimfuanyi mu dibeji 32]
Foto OMS kudi P. Almasy