“Kubipatshi to!”

“BIKALA umue wa ku Bantemu ba Yehowa, peshi babidi bine, mua kuela ngonga ku tshiibi tshiebe, kubipatshi to!” ke mudi tshikandakanda tshia Corriere della Sera tshibela. Tshivua tshitela bualu kampanda buakenzeka ku Treviso, mu Italie wa ku Nord, kùvuà ngenda-mushinga mukuabu muambe kujimija muliyo mujima wa lire (dolare mipite pa 600) bua dipata dia Bantemu babidi bakamukumbula.

Bilondeshile tshikandakanda etshi: Bantemu babidi bakadimanyisha kudi muntu au mu miaku eyi: “Lelu ndituku dimpe buebe wewe. Tudi Bantemu ba Yehowa, ne tudi ne tshintu kampanda tshia mushinga tshia kukupesha.” Ku miaku ayi, ngenda-mushinga eu uvua kayi usankidila bantu wakinjila diakamue tshiibi, kayi nansha mua kuanyisha bua kujikijabu.

Bu muntu eu muteleje, uvua mua kumanya se: Bantemu bavua balue ku nzubu kuende bua kufila kabuta kende ka ku bianza, kavuabu bangule pa tshibasa tshia mu lupangu lua dipitshishila kapepele. Nunku, pa kupanga tshikuabu tshia kuenza, Bantemu bakafila kabuta ne bivuamu ku biro bia bampulushi bia pabuipi apu. Dituku diakalonda, bampulushi bakakalujila mfumuaku.

“Bu muntu mukuabu pa muaba wa [Bantemu] babidi aba bakatuta dikasa dibi,” ke muakamba tshikandakanda tshia Il Gazzettino di Treviso, “uvua mua kuikala . . . mulame lupetu elu luonso luvua mu kabuta. Kadi ki m’Bantemu ba Yehowa, badi ne bua kuikala bena bululame menemene.”

Ntshinyi tshidi tshisaka Bantemu ba Yehowa ku dikala “bena bululame menemene”? Ndinanga diabu bua Nzambi ne bua muntu nabu, mu diumvuangana ne malongesha a Yezu Kristo. (Matayo 22:37-39) Ke bualu kayi Bantemu ba Yehowa badi kabidi baya ku nzubu ne nzubu bua kuamba lumu luimpe ludi lutangila “buloba bupiabupia” bua dikema bulaya kudi Yehowa Nzambi. Mukenji wa ditekemena bu eu udi ne mushinga wa bungi mupite biuma kayi bionso bia ku mubidi!​—2 Petro 3:13, MMM.