Muanu wa Mvula wa kabutu udi ubingisha muyuki wa mu Bible

MVULA wa kabutu pa buloba bujima mu matuku a Nowa mmuanda mujadika mu miyuki ya kale. Mishindu ya muyuki eu idi isanganyibua mu miyuki milonda ya mu nshidimukilu mivule mishilashilangane pa buloba bujima. Mu ditunga dia Afrike dia Tchad, tshisa tshia Moussaye tshidi tshiumvuija Mvula wa kabutu mushindu’eu:

‘Kuvua dîku kampanda disombele mu muaba kansanga wa kule-kule. Dimue edi, mamu wa dîku edi wakasua kuenzela dîku diende biadidia bia dinono. Nunku wakangata tshinu ne muinshi bua kutua mponda kupeta bukula. Tshikondo atshi diulu divua ditambe kuikala pabuipi kupita mudidi lelu. Bushuwa, bu wewe mua kuolola tshianza tshiebe, uvua mua kudilenga. Wakatua mponda ne bukole buende buonso, ne mponda yakatuaye yakalua lukasa bukula. Kadi pavuaye utua, mukaji eu ne dipanga ntema wakela muinshi muulu mule bikole, ne wakatubula disoso ku diulu! Diakamue, mâyi a bungi akatuadija kudiela pa buloba. Etshi katshivua mvula wa pa tshibidilu to. Wakaloka matuku muanda-mutekete a munya ne a butuku too ne pakabuikila mâyi buloba bujima. Pavua mvula wenda uloka, diulu diakatuadija kutumbuka too ne pakashikidiladi muaba udidi lelu’eu​—muaba mutumbuke ukena kufika. Nkabutu kayipu bua bukua-bantu! Biangatshile ku tshikondo atshi, tuakajimija muabi wetu wa kulenga diulu ne bianza bietu.’

Bualu bua ntema, miyuki ya kale idi yakula bua mvula wa kabutu wa buloba bujima idi isanganyibua pa buloba bujima. Mu nshidimukilu ya ntuadijilu ya bena buloba bua Amerike ne ya bena buloba bua Australie mudi miyuki pa muanda eu. Tunungu tua muyuki tudi mua kushilangana, kadi miyuki mivule idi ne lungenyi lua se: buloba buvua bubuikila kudi mâyi ne anu bantu bakese ke bakapanda mu buatu buenza kudi muntu. Ditangalaka dia tshiena-bualu etshi didi ditua nyama ku mikolo muanda wa se: Mvula wa kabutu wa pa buloba bujima wakenzeka, bu mudibi bilonda mu Bible.​—Genese 7:11-20.