Dikumbana dia mulayi wa mu Bible

MU Imperial War Museum ku Londres, mu Angleterre, badi baleja dîba dinene dia pa buadi ne tshibadikilu tshia bishiferi tshidi tshienda ne nzembu. Padi dîba dinene dienda, tshibadikilu etshi tshidi tshituta mu tusunsa tuonso 3,31. Ku dituta dionso, bungi bukuabu budi busakidibua ku bukavuaku. Dituta dionso, bungi buonso, bidi bileja mulume, mukaji peshi muana udi mufue bu tshipeta tshia mvita ya mu siekele eu.

Tshibadikilu etshi tshiakatuadija dibala diatshi mu Kabalashipu 1989 ne mbatekemene bua kujikijatshi dibala mundankulu mua muladilu wa tshidimu tshia 2000. Mu tshikondo atshi bungi buleja pa tshibadikilu nebufunde bantu miliyo lukama​—bungi butshinka bua badi bapetangane ne lufu lua ku mvita mu mukùngùlù wa siekele wa 20 eu.

Bidimu bitue ku 2,000 ku kale, Yezu Kristo wakadianjila kumanyisha tshikondo kampanda tshivua ne bua kumanyikila ku ‘ditunga dimue diluisha dikuabu ne bukalenge bumue buluisha bukuabu.’ Bia muomumue, Bantemu ba Yehowa mbayishe kukadi matuku a bungi ne: mvita mibutudi ya mu siekele eu, pamue ne bikumina bungi tshianana, bipupu, dipangika dia biakudia, ne bikuabu bidi bimueneka, bionso mu tshi-bungi bidi bikumbaja tshijadiki tshia se: tudi mu ‘matuku a ku nshikidilu’​—lupolo lua tshikondo tshidi tshilonda dijadika dia Kristo bu Mukalenge mu diulu mu tshidimu tshia 1914.​—Luka 21:10, 11; 2 Timote 3:1.

Mu ditumika ne Bible bu mfumu’atshi, Tshibumba tshia Nsentedi tshidi tshimanyisha lumu luimpe elu ne: Bukalenge bua Nzambi nebubutule mu katupa kîpi emu bena tshinyangu ne nebukudimune buloba mparadizu. Ne netuambe tshinyi bua mvita mu matuku atshilualua? Bible udi wamba ne: ‘Luayi bienu, nutangile bienzedi bia Yehowa, bu muakuenzejaye [“malu a dikema,” NW] pa buloba. Yeye udi ulekesha mvita bua ijika too ne ku mfudilu kua buloba; udi utshibula buta, udi ukosa difuma bitupa bitupa; udi wosha makalu a mvita mu kapia.’​—Musambu wa 46:8, 9.

[Mêyi a dianyisha bua tshimfuanyi mu dibeji 32]

Dîba dinene: Ne dianyisha dia Imperial War Museum