Bunême bua dianyisha dimanyisha mbushindikulula

NKOSELU wa tshilumbu kampanda mu matuku mashale aa kudi Nzuji wa Makebulula a Kumpala wa ku Kabadi ka Messina, mu Italie, mmushindikulule se: majinga a ngondapilu a mubèdì mukulumpe mmatambe disua dia ba-minganga. Nkoselu eu uvua mumanyisha pa tshilumbu tshivua tshitangila umue wa ku Bantemu ba Yehowa.

Mu Tshiongo 1994, Antonino Stellario Lentini, Ntemu wa bidimu 64 wa bubèdì bua mashi akena akuatakana lukasa, uvua mufila lukasa lukasa ku lupitadi ku Taormina, mu Messina. Mukaji wa Antonino, Catena, wakamanyisha buondapi ne: bu muvuabu Bantemu ba Yehowa, yeye ne bayende kabavua ne bua kuanyisha ngondapilu wa diela mashi mu mubidi nansha. (Bienzedi 15:20, 28, 29) Majinga abu akanemekibua.

Kadi, mu diya ku lukuabu lupitadi, mueyelu wa Antonino wakiimana, bualu e kukola mu njila. Katupa kîpi pashishe, yeye kufua. Catena wakabungama bikole, kadi wakapeta busambi bunene mu dilaya dia mu Bible dia dibiishibua. (Bienzedi 24:15) Kadi, biakamukemesha, banzuji​—bapambula pamu’apa kudi dishima ditangalaja kudi ba-kamona-kamba—​bakamufunda ne: yeye ke uvua mufuishishe bayende bualu uvua mubenge dipandibua divua ba-minganga bamone se: ke divua dikengedibua bua bayende.

Tshidimu tshijima ne ngondo bimane kupita, mu dia 11 Kashipu 1995, Catena wakalekedibua, bu muvuaye kayi mubunde tshibawu. Bushuwa, bujadiki bua buondapi bapiluke buakakosesha se: pa kutangila nsombelu wa mubèdì, dipandibua kadivua mua kuikala ne dikuatshisha mu mishindu yonso.

Kadi mapangadika a Nzuji akafunkuna muanda munene. Wakamba ne: mbikole bua kuitaba lungenyi lua se: bena mudimu wa diondapa badi ne bua kuondapa padi ngondapilu mubengibue kudi mubèdì peshi kudi baleji-mpala bende. Tshisumbu tshia mikenji ya mudimu wa luondapu mu Italie, ke muakakumbajaye, “ntshidianjile kumanya dikengedibua dia didiangatshila dianyisha dimanyisha dia muntu muena bualu kumpala kua dimuondapa kayi dionso.” Nunku, wakaleja se: Catena “uvua muepule bayende bilondeshile mikenji ku difidibua bua ngondapilu bu nunku.”

Nkoselu eu wa nsambu udi ushindikulula bunême bua muntu mukulumpe bua kubenga ngondapilu udi mubengangane ne majinga ende.