Onso mmasokolola a Nzambi anyi?

SPIRITU wa Nzambi, wakenzeja Bible Munsantu, udiku mua kuikala kabidi muenzeje mikanda mikuabu ìdì bamue bangata bu minsantu anyi? (2 Timote 3:16) Lukonko elu luvua lujula kudi tshikandakanda tshia ba-Jésuite tshia mu Italie (La Civiltà Cattolica), tshipatula “ku bulombodi bua Secrétariat d’Etat [wa Vatican]” ne pa nanku tshiangatshibua bu tshidi ne bukenji mu nkongo ya bena Katolike.

“Nzambi, ku diambuluisha dia tshienzedi tshia Spiritu Munsantu, wakamiamina mamiinu a Dîyi nansha too ne mu imue mikanda minsantu ya bilele bikena bia bena Yuda anyi bia bena nkristo,” ke muakamba tshikandakanda atshi tshia ba-Jésuite. Bua ba-Jésuite, mikanda “minsantu,” bu mudi Avesta wa bena Zoroastre peshi Mikanda Inayi ya bena Confucius, ivua mifundibue “kayiyi mipange kuikala ne bumue buenzeji bua pa buabu bua Spiritu Munsantu, ne pa nanku, mu mushindu kampanda idi ne ‘disokolola dia Nzambi.’”

Kadi, tshiena-bualu etshi tshiakenza ditokesha kampanda. “Bionso bidi mu mikanda minsantu bu eyi kabiena dîyi dia Nzambi nansha,” ke muditshi tshiamba, pa kusakidila ne: aba bakafunda mikanda eyi bavua mua kuikala “bapete buenzeji bua muaba uvuabu bitabuja banzambi bavule anyi bua bena nkindi” muvuabu basombele ne benzela mudimu. Bilondeshile Marco Politi, mufundidi wa tshikandakanda tshia La Repubblica bua malu adi atangila Vatican, mmuenenu eu “udi unzulula njila bua mishindu ivua kayiyi kuelela meji ku kale mu malanda pankatshi pa Ekleziya Katolike ne bitendelelu binene bia kale,” pa kupingana ku lungenyi lua masangisha a disambila dia tshinsangansanga bu mudi edi dia ku Assise mu 1986, ditua nyama ku mikolo ne makanda onso kudi Jean-Paul II.

Yehowa kêna Nzambi wa malu mabuelakane ne makondakane nansha. (1 Kolinto 14:33) Nenku katuena mu buakane buonso mua kukomesha ne: spiritu munsantu wende, peshi bukole buenzeji, uvua mua kuenzeja nansha tshitupa tshia mikanda kayi yonso ikena yumvuangana menemene ne Dîyi diende, Bible. Pamutu pa kukankamija dishemeja malanda a tshinsangansanga pankatshi pa “bilele [bishilangane] bia bitendelelu,” mupostolo Paulo muena nkristo wakafunda ne: kudi ‘ditekemena dimue . . . , Mukalenge umue, ditabuja dimue, dibatiza dimue.’​—Efeso 4:4, 5.

“Ditekemena dimue” adi ndisuikakaja ku diteka ditabuja mu Yezu Kristo. Bible udi wamba mu mushindu muakanyine se: ‘Mu munga muntu yonso kamuena lupandu, bualu bua kakuena dinga dîna muinshi mua diulu, dipa bantu, didi dimanye mua kutusungila.’ (Bienzedi 4:12) Munga “mukanda munsantu” kawena uleja Yezu bu muntu wa mushinga mu dikumbana dia malongolola a Nzambi nansha. Anu bituitaba Bible bu Dîyi dia Nzambi, ke padiye mua kutulongesha malu adi atangila dilongolola dia dinanga dia Yehowa Nzambi bua lupandu.​—Yone 17:3; 1 Tesalonike 2:13.