Bamanyishi ba Bukalenge badi balonda

Dipeta bantu ba mishindu yonso ne bulelela

MUPOSTOLO Paulo uvua mumanyishi wa tshisumi wa Bukalenge bua Nzambi. Kakalekela bua buluishi bupangishe mudimu wende mumupesha wa diyisha “lumu luimpe.” (1 Kolinto 9:16; Bienzedi 13:50-52) Paulo wakabela bakuabu bua kulonda tshilejilu tshiende.​—1 Kolinto 11:1.

Bantemu ba Yehowa mbamanyike mu buloba bujima bua madikolela abu a tshisumi a diyisha. Bushuwa, badi bakula ne bakuabu “misangu miakane” ne “misangu idi kayi[yi] miakane” bua kukumbaja mudimu wabu udi Nzambi mutumine dîyi wa ‘kuvuija bayidi.’ (2 Timote 4:2; Matayo 28:19, 20) Nansha mu matunga mudibu bapeta buluishi, bantu bena bululame badi benda bapetshibua ne mukenji wa mushinga mukole wa Bukalenge bua Nzambi, bu mudi malu mamonamona adi alonda aa aleja.

◻ Mu tshidiila kampanda tshia mu Pasifike wa ku Ouest mùvuà mudimu wa Bantemu ba Yehowa mukandikibue, muana wa balume wa bidimu 12 wakadimona munyunguluka kudi balunda babi ba mu tshilongelu. Bavule ba ku balongi nende pa tshibidilu bavua banua makanya, babala mikanda ya bantu butaka, batatshisha balongeshi, ne badifila mu diluangana. Nsombelu eu wakanyanguka bikole mu mushindu wa se: muana wa balume eu wakalomba tatuende bikalaye uvua mua kuya mu tshilongelu tshikuabu. Kadi, tatu wakelangana meji ne muanende wa balume bua kubenga lungenyi bu elu, bualu uvua mumvue ne: ngikadilu wa balongi mu bilongelu bikuabu bia pabuipi apu kavua mushilangane to. Kadi, mmunyi muvuaye ne bua kuambuluisha muanende wa balume?

Tatu wakavuluka ne: uvua ne mukanda bua bansonga mu nzubu muende. Uvua dipa dia kudi mulela wende uvua umue wa ku Bantemu ba Yehowa. Nenku wakakeba mukanda, ne pakaupetaye, wakaupesha muanende wa balume. Uvua ne tshiena-bualu tshia Les jeunes s’interrogent​—Réponses pratiques.a Nsongalume wakamona nshapita wa “Mmunyi mundi mua kukandamena buenzeji bua balunda banyi?” muikale nangananga ukuatshisha. Nshapita eu kakamulongesha patupu mushinga wa kulama didinemeka, kadi wakamulongesha kabidi mushindu wa kubenga ne bukalanga buonso pavua bakuabu bakeba bua kumusaka ku dilonda njila ukena wa meji. Mu ditumikila mêyi-maludiki a mu Mifundu mapeta mu mukanda eu, nsongalume wakalonga mua kupita bimpe ne buenzeji bua balunda.

Umona mashintuluka aa mimpe ne makuabu kabidi mu muanende, tatu wakapangadija bua kubala mukanda au. Mukemesha kudi mibelu mipepele mua kulonda mipeta mu mukanda eu, tatu wakalomba dilonga dia Bible dia ku nzubu ne Bantemu ba Yehowa. Pashishe, bakuabu bena dîku diende bakadisangisha nende mu dilonga. Ne bipeta kayi? Nsongalume eu, muakunyende wa balume, tatuende, ne babidi ba ku bakakuende badi mpindieu Bantemu ba Yehowa.

◻ Mu ditunga dimuedimue edi, Bantemu ba Yehowa babidi bavua bedibue mu buloko bua ditumikila diabu ne muoyo umue mêyi-makulu a mu Bible. Nansha nanku, kabakalekela nsombelu wabu ubapangisha bua kuakula ne dikima pa Bukalenge bua Nzambi. Bakaya kudi munene wa buloko ne kupetabu dianyisha dia kuvulukila muine amu Didia dia Dilolo dia Mukalenge. Mmunyipu muvuabu ne disanka pavua bena buloko 14 baleje dijinga dia kumanya Bible ne badisangishe ne Bantemu bua muanda eu wa mushinga! Pakabalekelabu, bamue ba kudibu bakatungunuka ne kulonga Bible ne kudisangisha ne Bantemu ba Yehowa.

Mu matunga mapite pa 25, Bantemu ba Yehowa badi bakenga bu tshipeta tshia makandika peshi mishindu kabukabu ya buluishi anyi ya dikengeshibua. Kadi, anu bu bapostolo, badi batungunuka ‘kabayi balekela kuyisha bantu ne kubambila lumu luimpe ne: Yezu udi Kristo.’​—Bienzedi 5:42.

[Mêyi adi kuinshi]