Butshimunyi bukuabu bua Bantemu ba Yehowa mu Grèce

MU DIA 6 Kasuamansense 1995, tshilumbu tshivua tshitangila ba-ministre babidi ba ku dîba ne ku dîba ba ku Bantemu ba Yehowa tshivua tshilumbuluisha ku kabadi kenza kudi banzuji basatu mu Athènes. Muanda uvua wa diandamuija ditabuja dia bakuabu, ne tshilumbu tshivua tshifundibue kudi kamanda ka bampulushi panyima pa dikumbula dia Bantemu kuende.

Nkonko miela kudi nzuji mulombodi ivua ileja ne: uvua ne dijinga dikole dia kumanya mudimu wa Bantemu ba Yehowa. Tshilejilu, wakebeja ne: “Kukadi matuku bungi munyi anudi nuenza mudimu eu? Mmunyi mudi bantu banuangate mu bidimu bionso ebi? Nkupeteke diandamuna dia mushindu kayi ku mudimu wenu? Ntshinyi tshinutu nuambila bantu ku biibi biabu?” Bonso bavua mu nzubu wa kabadi bakalonda ne ntema yonso bumanyishi buimpe buakafidibua.

Tshiakakemesha Bantemu bikole tshivua se: nansha prokirere wakabakuila patoke. “Bantemu ba Yehowa badi ne bukenji bua mêyi ne mikandu ki ng’anu bua kuitabuja patupu ne kutendelela Nzambi wabu,” ke muakabambishaye mu mêyi ende a nkomenu, “kadi kabidi bua kumuangalaja ditabuja diabu ku tshiibi ne ku tshiibi, mu miaba ya patoke, ne mu misesu, nansha kuabanya mikanda yabu kakuyi difuta mfranga biajingabu kuenza nanku.” Prokirere wakatela mapangadika kabukabu a dikosa dia bilumbu mapatula kudi tubadi ne Tshipangu tshia Mbulamatadi. Wakatela kabidi tshilumbu tshia Kokkinakis ne ditunga dia Grèce, tshiakakosabu kudi Kabadi ka ku Mputu ka Manême a Bumuntu pa kutua ku tshia Bantemu ba Yehowa.a “Tangilayi bu nenu mua kusua,” ke muakadimuija prokirere, “mbulamatadi wa Grèce wakafuta tshibawu bua tshilumbu etshi. Nunku tudi ne bua kuikala badimuke bikole patudi babikidibue bua kulumbuluisha bilumbu bia mushindu eu. Bushuwa, bilumbu ebi kabiena ne bua kufika bangabanga ku kabadi nansha.”

Kunyima kua muyuki wa prokirere, mulumbuluidi wa Bantemu kavua ne malu mavule mashale a kuamba. Nansha nanku, wakapeta mpunga bua kuela kashonyi ne: mukenji ùdì ukandika diandamuija ditabuja dia muntu kawena umvuangana ne Tshibungu tshia mêyi ne mikandu ne se: mmumueneshe Grèce mabika ne mala mu matunga onso.

Nzuji mulombodi wakatapa patupu dîsu kudi banzuji bakuabu babidi, ne ku dîyi dimue muanetu wa balume ne muanetu wa bakaji bakalekedibua. Tshilumbu etshi, tshiakanenga dîba dijima ne minute dikumi, tshivua butshimunyi bua dîna dia Yehowa ne bantu bende.

Edi ndibinga dinayi bua bilumbu bidi bitangila diandamuija ditabuja dia muntu panyima pa bamane kuteleja tshilumbu tshia Kokkinakis kudi Kabadi ka ku Mputu ka Manême a Bumuntu. Bantemu ba Yehowa ba mu Grèce badi basanka mudi mpindieu bilumbu bidi bisuikakaja ku bumanyishi buabu kabitshiyiku bushuwa ne mudiku mushindu wa kutungunuka ne mudimu kakuyi tshipumbishi.

[Mêyi adi kuinshi]