Makenga bungi nunku

“BUA tshinyi kudi makenga onso aa makuate buôwa a muntu pa nkayende ne a mu tshi-bungi . . . ? Batu bamba mudi Nzambi muikale mutu mupungila makunyi wa tshipatshila tshionso ne pabi kudi bivule bikena kumvuija mu bulongolodi ebu, makenga a bungi akena kumvuija ne mpekatu ikena kumvuija. Bumue ke tshivua Nietzsche muashile Nzambi tshilumbu pa kumuamba ne: mmuena tshinyangu, mubembedianganyi, muivi wa mayele, mushipianganyi anyi?”​—On Being a Christian, kudi Hans Küng.

Udi mua kumona se: muena teoloji wa bena Katolike Hans Küng udi uleja patupu muanda udi upampakaja bavule​—bua tshinyi Nzambi wa bukole buonso, wa dinanga udi ulekelela makenga bungi nunku? Kuenaku muanji kumvua bantu bela lukonko bu elu anyi? Muntu kayi yonso wa luse udi ubungama bua bidi Küng umvuija bu “musulu wa mashi ukena ndekelu, bisululu ne binsonji, ntatu, kanyinganyinga ne buôwa, bunkaya ne lufu.” Bushuwa, kupita mene musulu, bidi bu mvula wa tshipupu wa buôwa ne njiya udi mubutule mioyo ya miliyo ya bantu mu miyuki ya bantu.​—Yobo 14:1.

Biûle ne “dikenga ne malu a ntatu”

Ela meji bua makenga adi afumina ku mvita, mapeta ki ng’anu kudi badi bakenga ne bafua diakamue, kadi kabidi kudi aba badi bashala mu dibungama, bu mudi baledi ne balela ba bana bakengesha ne bakuabu badibu banyawula. “Mu bidimu 10 bishale ebi,” ke muakambabu kudi bena Nkuruse Mukunze matuku adi panshi aa, “bana 1 500 000 bavua bashipibue mu diluangana ne bingoma.” Mu Rwanda mu 1994, bena Nkuruse Mukunze bakamanyisha ne: “nkama ya binunu ya balume, bakaji ne bana bavua bashipibue mu mushindu wa kanyawu ne mulongolola.”

Katuena kabidi ne bua kulengulula ntatu mikebesha kudi babambidiki ba bana bua masandi. Mamu mukuabu mubungame, wakamba ne: muanende wa balume uvua mudishipe kunyima kua dinyangibua kudi muena mudimu ndeji wa bana, wakashindika ne: “Mulume au uvua munyange muananyi . . . uvua mumubutule pamue ne bungi bukuabu bua bana ba balume mu mushindu mutambe kulongolola, mubipe ne muelela meji.” Ne netuambe tshinyi bua divuluka dia dibungama dipeta kudi bantu bakengeshibue kudi bashipianganyi ba tshikisu peshi bamanji babakudianganyi, bu mudi aba bakakuatshibua mu Grande-Bretagne bàvuà “kakuyi dinyoka munkatshi mua bidimu 25 babakule bantu, babambidike bakuabu bua masandi, babakengeshe, ne babashipe”? Mu tshikondo tshishale, mmumueneke kamuyi mikalu ku malu àdì balume ne bakaji benzelangane bua kubungamijangana ne kukengeshangana.​—Muambi 4:1-3.

Sakidilaku kabidi makenga makebesha kudi masama a mu lungenyi ne a ku mubidi ne dibungama dikole dia tshinyongopelu didi dilunguja mêku padi banangibue babu bafua kumpala kua dîba. Kudi kabidi njiya mipeta kudi badi bakengeshibue bua nzala anyi bua bikuabu bidibu babikila ne: bipupu bia ku bintu bifuka. Bakese nebele mpata pa tshiambilu tshia Mozese tshia se: bidimu bietu 70 peshi 80 mbiûle ne “dikenga ne malu a ntatu.”​—Musambu 90:10, NW.

Bidi mu dilongolola dia Nzambi anyi?

Bidiku mua kuikala, mudi bamue bambe, se: makenga aa akena ajika adi mu dilongolola kampanda dia Nzambi dikena kumvua anyi? Bidi bikengela bua tuetu kukenga mpindieu bua tuetu kushisha kujingulula muoyo ‘mu bulongolodi bulualua’ anyi? Bidiku bushuwa, bu muvua muena nkindi wa bena France Teilhard de Chardin witabuja, bua se: “dikenga dìdì dishipa ne dibolesha, didi dikengedibua bua muntu kumonaye mua kuikala ne muoyo ne kulua spiritu” anyi? (The Religion of Teilhard de Chardin; disendamija miaku ndietu.) Bushuwa nansha!

Mufumbi kampanda mudimuke udiku mua kufuka nyunguluilu mukebi wa lufu ne pashishe kuambaye mudiye mumvuidianganyi wa luse pa kupandisha bantu ku bipeta bia nyunguluilu eu anyi? Nansha kakese! Bua tshinyi Nzambi wa dinanga uvua mua kuenza bualu bua nunku? Nenku bua tshinyi Nzambi mmulekelele makenga? Makenga kaadiakujikaku anyi? Tshiena-bualu tshidi tshilonda netshikomonone nkonko eyi.

[Mêyi a dianyisha bua tshimfuanyi mu dibeji 3]

WHO photo by P. Almasy