Bulelela pa bidi bitangila inferno

LUAPOLO kampanda luenza kudi kasumbu ka malongesha manene a Ekleziya wa Angleterre ludi luamba ne: kakuyi bukuabu bua kuamba, inferno ki ntshikutu tshia kapia nansha; bishilangane, mmuaba wa mu lungenyi patupu wa dibenga kuikalaku. “Kudi tubingila tuvule bua dishintuluka edi,” ke mudi luapolo elu lumvuija. “Kadi munkatshi muatu mudi muikale dibenga dia mu lungenyi, dia munda ne dia pambelu pa ditabuja dia Buena-nkristo dìdì dibengangana ne bitendelelu bia buôwa, ne didiunda dia ngumvuilu wa se: ditabuja dia ne Nzambi wakafundila miliyo ya bantu makenga a tshiendelele divua dibengangana ne dibuluibua dia dinanga dia Nzambi mu Kristo.”

Dibenga kumvuangana edi ne mmuenenu ya kale pa bidi bitangila inferno kadiena anu mu Ekleziya wa Angleterre. Bantu ba mu bitendelelu bishilangane badi bamona bikole bua kutendelela Nzambi mudisombuedi udi wosha benji ba mpekatu. “Bantu mbasue Nzambi udi muena luse ne wa kulamata bua kupeta busambi ne disuangana,” ke mudi Jackson Carroll wamba, profesere wa bitendelelu ne nsangilu wa bantu mu Duke University’s Divinity School. “Mbibengangane ne nshidimukilu wa buena lelu bua kuakula bua mpekatu ne tshibawu.”

Bantemu ba Yehowa mbitabuje katshia kuonso aku ne: inferno, anu mudi Bible ulongesha, udi patupu lukita lua pa tshibidilu lua bantu bafue​—ki mmuaba wa makenga a kapia nansha. Badi ne mmuenenu eu, ki mbualu mmumanyike kudi bonso, kadi mbua tshidi Bible wamba ne: “Kadi bua bafue, kabenaku bamanye bualu nansha bumue . . . Kakuena mudimu nansha kulongolola kua malu anyi dimanya peshi meji mu Sheol [“inferno,” Douay Version, wa bena Katolike].”​—Muambi 9:5, 10, NW.

Muikale ne ngumvuilu eu mutokesha pa ngikadilu wa bafue, Charles Taze Russell, mulombodi wa kumpala wa Société Watch Tower, wakandamuna ku mukanda kampanda mu 1896 ne: “Katuena tusangana [mu Bible] muaba bu eu nansha umue wa makenga a tshiendelele bu mudi mitabuja manene ne mikanda ya misambu ne mayisha a bungi, bilongesha mu dipanga dionso. Kadi tudi basanganamu ‘inferno,’ sheol, hades, mùvuà bukua-bantu buonso bufundila tshibawu bua mpekatu wa Adama, ne kùdì bonso bapikudibue bua lufu lua Mukalenge wetu; ne ‘inferno’ au ndukita​—ngikadilu wa lufu.”

Nunku kukadi kupita siekele mujima, Bantemu ba Yehowa mbalongeshe bulelela pa bidi bitangila inferno.

[Tshimfuanyi mu dibeji 32]

Charles T. Russell