Dijikila mabanda mu France

BANTEMU BA YEHOWA mu France bavua baludikila mulongolongo wa mabanda matuku adi panshi aa. Pa kubabidila malu a tshimvundu avua atangila tusumbusumbu tua bitendelelu ku Mputu ne mu Japon, tudiomba tuakatangalajila Bantemu ngumu mikonyangaja. Bakalejibua mu mushindu mubi bu kamue ka ku tusumbusumbu tudi tutambe kumuangalaka ne tutambe kumueneka tua njiwu.

Mu madikolela bua kulongamija malu, Bantemu ba Yehowa bakapatula trakte uvua wandamuna nkonko bu mudi eyi: Bantemu ba Yehowa mbanganyi? Mbena nkristo anyi? Batu bitaba diondapibua ne manga anyi? Bua tshinyi batu baya ku tshiibi ne ku tshiibi? Mmunyi mudi mudimu wabu mukuatshisha ne mfranga? Mmunyi mudi Bantemu ba Yehowa bambuluisha mu tshinsanga?

Trakte eu wa mamanyisha mavule mu muakulu wa Mfualansa uvua ne tshiena-bualu tshia Bantemu ba Yehowa​—Tshinudi ne bua kumanya. Bua kushiila bantu bavule trakte eu, bakalongolola kampanye. Kumbukila ku dia 13 Lumungulu too ne ku dia 9 Kabalashipu 1996, kopi mipite pa miliyo tshitema yakabanyibua.

Trakte eu wakakemesha bavule, kukonga ne banene ba Mbulamatadi. “Didiula dienzela Bantemu ba Yehowa didi dinnyengabaja bikole,” ke muakafunda muena tshipangu kampanda wa mu rejon panyima pa dibala dia trakte. “Ndi mufike ku dianyisha misangu mivule ngikadilu wa budisuile ne ukena budinangi wa mudimu wenu.” Ku diandamuna ku trakte, muntu kampanda muena mu Parlema wa ku Mputu wakafunda ne: “Bungi buvule bua bantu mbamanye bimpe menemene mushindu wa kusunguluja dishilangana pankatshi pa tshisumbu tshia bena nkristo tshinudi nuenza ne tusumbusumbu tua malu a Nzambi.”

Mu Bretagne Ntemu kampanda wakafila trakte eu kudi nsaserdose kansanga, wakamuitaba kakuyi dielakana. “Ndi nkuela ka-lumbadi bua tshiudi wenza,” ke muakamba nsaserdose eu. Pashishe wakasakidila ne: “Ndi nkankamija bena parwase wanyi bua kukubueja mu nzubu yabu ne kukupesha dikopo dia kafé. Udi nansha mua kuambila aba baudi upetangana nabu ne: uvua ku nzubu kuanyi. Ndi musue kabidi kukuambila ne: ntu nganyisha dibala mikanda yenu.”

Panyima pa dipeta trakte, muena Mishonyi kampanda wa mu Alsace wakafundila Société Watch Tower ulomba dilonga dia Bible. “Mujimije dieyemena dionso mu ekleziya wanyi,” ke muakafundaye, “Ndi mutekemene ntuadijilu mupiamupia mu nyuma.” Nansha mudiku mabanda adibu babendeshila ku misangu, Bantemu ba Yehowa mu France​—bushuwa, mu bitupa bionso bia pa buloba—​badi batungunuka ne kuambuluisha bantu bua kufikabu ku dimanya dijalame dia malongolola a Nzambi, bu mudibi bileja mu Bible.​—2 Timote 3:16, 17.