Bua tshinyi nsombelu eyi mmibipe bikole nunku?

PAUDI usomba bua kubala tshikandakanda anyi bua kubandila ngumu ku TV peshi bua kuteleja ngumu ku tshisanji, udi mutekemene imue ngumu mibi, ki mmuomu’anyi? Kuena pamu’apa ukema pa kumvua ne: mvita kampanda ya munanunanu ke kufuimayi eku, se: dibunda dia bibawu dia tshinyangu ditshidi ditampakana, anyi se: nzala itshidi ikepesha bukole bua matunga adi alumbila dilubuluka.

Biwikala musombele mutantshi mule ne miaba idi malu aa enzekela, pamu’apa kuena udiumvua misangu yonso mutambe kubungamijibua kudi ngumu bu eyi nansha. Tuamba eku tuela eku, nnganyi udi mua kupanga kumvua luse bua misumba eyi yonso idi ikenga? Nansha nanku, mbikole bia dikema bua kubenga kulengibua patudi tutuilangana mpala ne mpala ne mushindu udi makenga atatshisha bantu. Mu miaku mikuabu, padi eku dibala pa bidi bitangila mvita ne dienza makumi a badi bafue dikale bualu bumue, dibala pa bidi bitangila Adnan, muana wa balume wa bidimu tshitema wa mu Bosnie, muena mamuende wakafua pavua bombe bubutule nzubu wabu, mbualu bukuabu bushilangane. Bakasa tatuende wa Adnan tshingoma kudi muashanganyi musokome anu ndambu wa ngondo kunyima pavuabu bendakana pamue mu musesu. Muanabu wa bakaji mashi akamupatuka too ne ku lufu muîsu muende mbingu mikese patupu kunyima, muakana kudi disashi ditayikile mu lupangu lua tshilongelu. Ba-doktere bakuondapa Adnan bua bubedi bua buôwa bakasangana se: muana wa balume eu ukavua mujimije mpampakenu, nansha nyanji kayi yonso​—peshi mene lutangilu. Buôwa ne divuluka malu a kale bivua binyange nsombelu wende patshivuaye mutabale; bilota bia buôwa bivua bimupangishe dikisha ne tulu tuende. Adnan ki mmufue nansha. Mmuana udi muikale ukenga; katuena mua kumuambuluisha kadi tudi tumumvuila luse.

Mbia muomumue ne nsombelu mikuabu mibi ya mu bulongolodi ebu. Kubala pa bidi bitangila nzala mbualu bumue; kumona tshimfuanyi tshia muana wa bakaji wa bidimu bitanu ne difu diûle ne bidimba binyane, muikale ukenga bikole bua nzala, mbunga bualu menemene. Kubala luapolo ya dibunda dia bibawu mbualu bumue; kumvua bua mukaji kampanda mukulakaje udibu bakuma ne tshikisu tshionso, udibu biba bintu, ne udibu babambidika bua masandi, mbunga bualu menemene. Kubala pa bidi bitangila dinyanguka dia mêku mbualu bumue; kumvua ne: mamu kampanda udi ubenga kupesha muanende biakudia ku budisuile nenku ne lukinu luonso unyanga muanende muine, mbualu bukuabu menemene.

Mbia dibungama bua kubala malu a nunku. Kadi mmunyipu mudibi bitambe bubi padi tshimue tshia ku bipupu ebi bia buloba bujima tshitukuata tuetu bine buludiludi! Paudi wewe muine ukenga bikole, nsombelu wa buloba bujima muleja kudi ngumu ya pa buloba udi mua kulua mukole. Bidi bikuatshisha buôwa bua kumanya muanda wa se: makenga mafumine ku dibunda dia bibawu, mvita, nzala, ne masama adi enda adiunda mu mushindu ukena muanji kuenzeka mu malu a bantu. Buenzeji bua diakama malu adi enzeka mu siekele eu wa 20 budi mua kuikala bunene bushuwa​—dipampakana, buôwa, ne dibungama mbitangalake.

Bena bitendelelu bivule badi bakeba mandamuna a nkonko milubakaji bu eyi: Bua tshinyi malu mmabipe bikole nunku? Bukua-bantu mbutangile kuepi?

Diakabi, lelu’eu mmpukapuka bua bitendelelu kufilabi mandamuna adi asankisha. Pawamonyi bua musangu wa kumpala lukonko elu pa tshizubu tshia tshibejibeji etshi, uvua mua kuikala mubazuke ne mpata​—diandamuna didi mua kumvuika. Bitendelelu bishimatshi ku malu a ntaku misangu mivule bitu bikeba mua kumvuija ku diambuluisha dia Bible tshidi katshiyi mene mu Bible​—dituku dijalame ne dîba bia kabutu ka bulongolodi ebu. (Tangila Matayo 24:36.) Bapatudi ba tshibejibeji etshi mbasue bua kulekela Bible umvuije yeye nkayende. Udi pamu’apa mua kukema pa kulonga ne: dikonkonona dia Bible bua matuku a ku nshikidilu ndilelela ne nditshintshikila. Ne Bible kêna anu umvuija bua tshinyi malu mmabipe bikole nunku. Udi kabidi ufila ditekemena bua matuku atshilualua, nditekemena dia busambi bushuwa. Tudi tukulomba bua kukonkonona biena-bualu bidi bilonda ebi bua kumona mudi muanda eu mulelela.

[Mêyi a dianyisha bua tshimfuanyi mu dibeji 3]

Jobard/​Sipa Press