Dikenga dia bantu: Kadiakujikaku anyi?
MIANDA mikuate buôwa kunyima kua ditayika dia bombe mu tshisalu tshia tshimenga tshia Sarajevo tshiûle tente ne bantu; dishipangana ne dikosa bantu bidimba bia mubidi ku Rwanda; bana bafue ne nzala balomba biakudia ne miadi ku mêsu mu Somalie; bena mêku baletele babadika bintu bidibo bajimije kunyima kua tshikumina ku Los Angeles; bantu kabayi ne mubambuluishi mu Bangladesh muvua mâyi masapalale. Makenga a bantu a mushindu’eu ke atudi tumona dituku dionso ku televizion anyi mu bikandakanda ne mu bibejibeji.
Tshipeta tshibi tshidi dikenga dia bantu dipatula ntshia se: didi difikisha bakuabo ku dijimija ditabuja kudi Nzambi. Bilondeshile mêyi mapatula kudi kasumbu kampanda ka bena malu a Nzambi ka bena Yuda ku Etats-Unis, “Dikalaku dia bubi ditu misangu yonso dipumbisha ditabuja.” Bafundi badi batuma lungenyi ku lufu lua bantu mu tumponya tua dienzejangana midimu mikole tua bena Nazi bu mudi ka Auschwitz ne lua ku bombe bu wakatayika pa Hiroshima. “Lukonko lua se: mmunyi mudi Nzambi muakane ne wa bukole buonso mua kulekelela dibutuka dia mioyo mivule nunku, ludi lutatshisha kuondo ka muoyo ka bena Nzambi ne lutamba kupampakaja,” ke mudi bafundi bamba.
Bia dibungama, bungi bukena ndekelu bua ngumu mikuatshishe luse ke budi bufikisha ku dipapisha mpampakenu ya bantu. Pikala balunda anyi balela kabayi ne bualu, mbikolele bavule bua kuikala ne kanyinganyinga bua dikenga dia bakuabo.
Kadi, bu mutudi mua kumvua luse, nangananga bua banangibue betu, ebu mbualu budi mua kutulongesha pa bidi bitangila Mutufuki. Bible udi wamba ne: muntu wakafukibua “ku tshimfuanyi tshia Nzambi” ne “bu tshimfuanyi [tshiende].” (Genese 1:26, 27) Ebi ki mbuena-kuamba ne: bantu badi bu Nzambi ku tshimuenekelu to. Tòò, bualu Yezu Kristo wakumvuija ne: “Nzambi udi [spiritu, NW],” ne “[spiritu, NW] kena ne munyinyi ne mifuba.” (Yone 4:24; Luka 24:39) Kufukibua ku tshimfuanyi tshia Nzambi kudi kumvuija mutudi mua kumuenesha ngikadilu ya Nzambi. Pa nanku, bu mudi muntu mulelela umvua luse bua aba badi bakenga, tudi ne bua kufika ku nkomenu wa se: Mufuki wa muntu, Yehowa Nzambi, udi ne luse ne udi umvua luse luvule bua bantu bende bakafukaye badi mu dikenga.—Fuanyikija ne Luka 11:13.
Umue mushindu udi Nzambi muleje luse luende mpa kupesha bukua-bantu diumvuija difunda didi dileja tshiledi tshia dikenga. Ke tshidiye muenze mu Dîyi diende, Bible. Bible udi uleja patoke ne: Nzambi uvua mufuka muntu bua kuikalaye ne disanka mu nsombelu, kadi ki mbua kukengaye nansha. (Genese 2:7-9) Udi uleja kabidi ne: bantu ba kumpala bakadikebela dikenga pa kupidia bukokeshi buakane bua Nzambi.—Dutelonome 32:4, 5; Lomo 5:12.
Nansha nanku, Nzambi utshidi amu umvua luse bua bantu badi bakenga. Ebi mbileja patoke mu mulayi wende wa kujikija dikenga dia bantu. “Monayi! Ntenta wa Nzambi udi pamue ne bantu, Yeye neasombe nabo, ne buobo nebikale bisamba biende. Ne Nzambi yeye muine neikale nabo. Ne neakupule tshinsonji tshionso ku mêsu abo, ne lufu kaluakuikalaku kabidi, nansha madilu, nansha mbila, nansha bisama kabiakuikalaku kabidi. Bintu bia kale biajiminyi.”—Buakabuluibua 21:3, 4, NW; tangila kabidi Yeshaya 25:8; 65:17-25; Lomo 8:19-21.
Milayi eyi milenga idi ileja se: Nzambi mmumanye bimpe dikenga dia bantu ne mmupangadije bua kudijikija. Kadi ntshinyi menemene tshiakalela dikenga dia bantu ku ntuadijilu, ne bua tshinyi Nzambi mmudilekelela ditungunuka too ne lelu?
[Mêyi a dianyisha bua tshimfuanyi mu dibeji 2]
Tshizubu ne dibeji 32: Alexandra Boulat/Sipa Press
[Mêyi a dianyisha bua tshimfuanyi mu dibeji 3]
Kevin Frayer/Sipa Press