Dibaka dia bidimu 403 didi mu tshimvundu

MU Suède, Ekleziya ne Mbulamatadi bivua ne malanda mashême kukadi bidimu bipite pa 400. Mpindieu dibaka pankatshi pa tshitendelelu ne mbulamatadi didi dienda difubidila.

Buena-Luther buakatekibua bu tshitendelelu tshia Mbulamatadi mu 1593, ne bena Suède bonso bavua ne bua kuikala benamu batambuishibue. Panyima pa bidimu, mu bidimu bia 1850, dishintuluka kampanda diakenzeka. Kabivua kabidi bikengela bua bena Suède kutambuishibuabu; nansha nanku, batshivua anu bangatshibua bu bena Ekleziya wa Luther. Pa nanku, bavua balombibue bua kufuta tshia pa lukama 1 tshia lupetu luabu lua ku tshidimu bua kukuatshisha ekleziya ne bua kufuta bua imue midimu ya bena ditunga mibenzela kudi ekleziya. Matuku mashale menemene aa dishintuluka dikuabu diakenzeka. Bituadijile mu 1952, bena Suède bavua mua kulamuka mu mushindu muanyishibue ku ekleziya eu ne nunku kuikala bumushibue ku difuta tshitupa tshinene tshia tshitadi tshia ekleziya.

Mu bidimu bishale ebi Ekleziya wa Luther mmutungunuke ne kujimija bukokeshi buende mu Suède. Etshi katshivua kuepuka, bualu basombi 10 pa lukama ba mu Suède mbena tshimuangi bakena bena Luther, kukonga ne bena Yuda, bena Katolike, pamue ne ba-Mizilma. Nenku, ku ntuadijilu wa 1996, anu bena Suède 86 pa lukama bavua mu Ekleziya wa Luther, ne bungi mbutungunuke ne kukepela.

Didiunda dia kalèngù didi dienda dikolesha dikosoloka pankatshi pa Ekleziya ne Mbulamatadi. Bikavua bimana kuamba ne: kabiena bikengela bua mukalenge kuikalaye muena Luther, ne bana balela kudi muledi muena Luther kabena bangatshibua diakamue bu bena Ekleziya wa Mbulamatadi wa Luther nansha. Kabidi, bilondeshile The Dallas Morning News, pabuipi ne tshidimu tshia 2000, “parwase ya muaba au ne mbulamatadi bidi ne bua kutshinka mushinga wa bintu bivulavulayi ne kubiabanyangana. Ekleziya udi ne bua kukepesha lupetu luende lua ku tshidimu lua dolare muliyare 1,68, tshitupa tshinene tshisangisha ku diambuluisha dia bitadi.” Siekele eu mumane kupita, ekleziya neateke bende bepiskopo ba nsungasunga.

Padi eku kalèngù ne dikepela dia bantu bienda bikengesha Bukua-buena-nkristo, Bantemu ba Yehowa mu Suède badi batungunuka ne kulubuluka. Annuaire des Témoins de Jéhovah 1997 udi uleja ne: kudi bamanyishi ba Bukalenge bua Nzambi 24 487 mu ditunga adi, ne pabuipi ne bantu 10 pa lukama ba kudibu badi bayisha bu ba-ministre bampanda-njila ba ku dîba ne ku dîba. Bavule ba kudibu badi bipatshila masanka matambe bunene a mudimu. Tshilejilu, mu mpuilu ya distrike ya Bantemu ba Yehowa ya mu 1995, balume 20 ne bakaji babu bakuuja formilere bua dilonga bu-misionere ku Tshilongelu tshia Bible tshia Watchtower tshia Gilada. Mu tshikondo atshi, kuvua bena mapolome bu 75 bena Suède ba mu tulasa tushale bavua basadila mu mudimu wa bu-misionere mu bitupa bishilashilangane bia buloba. Kakuyi mpata, tshilejilu tshiabu tshimpe ne mikanda yabu mikankamiji pamue ne makumbula bidi ne buenzeji busonsodi pa aba badi batuma meji mpindieu ku disanka edi dinene dia mudimu.

Nenku, padi eku miliyo ya mu Bukua-buena-nkristo ikenga bua dinyanguka dia tshieledi tshia lungenyi, Bantemu ba Yehowa buobu badi ‘bimba misambu bua disanka dia mu mitshima yabu.’​—Yeshaya 65:13, 14.

[Karte mu dibeji 30]

(Bua kumona malu bimpe, tangila mu mukanda)

Suède