Bantemu ba Yehowa badi benza Mpuilu ya bukua-matunga

Kasumbu Kaludiki ka Bantemu ba Yehowa kadi kalongolola bua kuenza mpuilu ya bukua-matunga mu 1998. Dimanyisha edi diakapeta diandamuna dia musangelu mu tshisangilu tshia ku tshidimu tshia Watch Tower Bible and Tract Society of Pennsylvania, tshienza mu Nzubu wa Mpuilu wa mu Jersey City mu Disambombo, dia 5 Kasuamansense 1996.

Pamue ne mpuilu ya pa tshibidilu ya distrike, mpuilu bungi kampanda ya bukua-matunga neyenjibue mu Amerike wa ku Nord mu 1998. Tudi batekemene se: madisangisha aa neateke pamue nkama ya binunu ya Bantemu ba mu bitupa bivule bia pa buloba. Bua kupetesha matunga a bungi mushindu wa kulejamu mpala, biro ne biro bia filiale mipite pa 100 ya Société Watch Tower nebipeshibue bungi kampanda bua baleji-mpala bua tshimenga tshisunguluke tshienzekela mpuilu wa bukua-matunga mu Amerike wa ku Nord.

Mbimueneke patoke se: bonso bikala basue bua kuenza luendu kuya ku Amerike wa ku Nord kabakupeta mushindu wa kuenza nunku. Kadi, kudi mua kuikala mushindu wa bakuabu bantu binunu kubuelabu mu mpuilu wa bukua-matunga pabuipi ne ditunga diabu. Malongolola adi enda enjibua bua mpuilu ya bukua-matunga kuenjibuayi mu matunga abidi anyi asatu a ku Mputu ne mikuabu mu Afrike, Azi, Amerike Latine, Pasifike wa ku Sud, ne mu Karaibe.

Mu tshikondo tshiakanyine, biro bia filiale bia Société nebimanyishe bisumbu mu teritware yabi bua bidi bitangila tshimenga anyi bimenga bia mpuilu mudibi bibikila. Mamanyisha neafidibue pa bidi bitangila matuku a ngondo ne malongolola bua disungula baleji-mpala. Aba badi basue kuuja formilere bua disungula dia baleji-mpala badi mua kutuadija kulama ndambu wa mpetu yabu mu dindila bibilu ebi bia pa buabi.

Bantemu bonso ba Yehowa pa buloba bujima badi batekemena bidi matuku au matulamine mu madisangisha aa a bukua-matunga bua 1998. Mpuilu ya distrike mu matunga onso neyikale ne programe wa muomumue.